InfoHub Logo

Mysyq pen tyshqan dos bolypty. Bir kúni eki dos kele jatyp, bir qumyra maı taýyp alypty.

          Mysyq bilgirsinip:

          — Qumyradaǵy maıdy qysta jeıik, – dep, shuńqyr qazyp, kómip tastapty. Kúnder óte beredi. Qys keledi. Aıaz qysyp, qarny ashyp jatqan mysyqtyń esine ózi kómip qoıǵan qumyradaǵy maı túsipti. Endi mysyq syltaýratyp:

          — Tyshqan, meniń apam ul taýypty, soǵan toı jasaıdy eken, meni shaqyryp ketti, – deıdi de ketip qalady. Sonan soń qumyradaǵy maıdyń tóbesin ǵana oıyp jep qaıtady. Aldynan tyshqan shyǵady.

          — Bóbektiń atyn kim qoıdyńdar? – dep suraıdy.

          — Tóbelshe qoıdyq, – deıdi mysyq.

          Kelesi kúni mysyqtyń taǵy da qarny ashady. Qumyradaǵy maı esine túsedi. Tyshqanǵa kelip:

          — Meniń taǵy bir apam ul taýypty, toıǵa shaqyrtypty, baraıyn, – dep, ketip qalǵan mysyq maıdy ortalaı jep alady. Tyshqan taǵy da aldynan shyǵady.

          — E, bóbektiń atyn kim qoıdyńdar? – dep suraıdy.

          — Beldemshe qoıdyq, – deı salady mysyq. Birneshe kúnnen keıin mysyqtyń taǵy da qarny ashyp, qumyradaǵy maıǵa barmaq bolyp, tyshqanǵa keledi:

          — Meniń taǵy bir apam bar edi, sol ul tapqan eken, shaqyrtypty, – dep, ketip qalady. Mysyq qumyradaǵy maıdyń qalǵanyn jep kele jatady. Aldynan tyshqan shyǵady:

          — E, bóbektiń atyn kim qoıdyńdar? – dep suraıdy.

          — Qaldyqsha qoıdyq, – deıdi mysyq.

          Bir kúni qysqy aıaz qysady. Dalaǵa shyǵýǵa dátteri shydamaıdy. Tyshqan men mysyqtyń qarny ashady, ashyǵa bastaıdy. Sol kezde tyshqannyń esine ózderi tyǵyp qoıǵan qumyradaǵy maı túsip, mysyqqa aıtady.

          Mysyq pen tyshqan kómgen maılaryna kelse, qumyradaǵy maıdyń juǵyny da qalmapty. Sonda tyshqan:

          — İm-m... bildim, bildim, – deıdi renjip, – sen úsh ret úıden shyǵyp ketip ediń. Birinshi kelgende, tóbesin jep, Tóbelshe, ekinshisinde ortasyn jep, Beldemshe, úshinshisinde qalǵanyn jep, Qaldyqsha dediń ǵoı, á? – deıdi.

          Óz qýlyǵyn tyshqan bilip qoıǵan soń, doıyr mysyq ashýǵa býlyǵyp, tyshqandy bas salyp talaıdy. Tyshqan bir tesikke kirip ketip áreń qutylady. Mysyq pen tyshqannyń dostyǵy sonymen bitken eken.

---