InfoHub Logo

Elpeńdeı júgirip kele jatqan túlkiniń sıraǵy saryshunaqtyń inine túsip ketip, keptelip qalypty. Qansha áýrelense de qaıta tartyp shyǵara almaıdy. İninde jatqan sarshunaq suǵynyp turǵan túlkiniń tabanyn qytyqtaı bastaıdy. Qytyqqa shydaı almaǵan túlki ózinen-ózi yrjańdap, kúle beredi. Sóıtip, kúlip turǵanda, qasyna qasqyr keledi.

          — Oý, túke, nege kúle beresiń, qandaı qyzyq kórdiń? – dep suraıdy tańdanyp.

          Sonda túlki:

          — Álemde bolyp jatqan qyzyqty kórseń, seniń de ishek-sileń qatar edi, – deıdi yrjalaqtap.

          Buǵan qasqyr nanyp qalady da sol qyzyqty kózimen kórgisi kelip yntyǵady.

          — Qane, qane, maǵan kórsetshi! – dep jalynady. Túlki qylmańdaı qaraıdy qasqyrǵa.

          — Ol úshin myna tesikke aıaǵyńdy tyǵyp, týra qarsy aldyńnan kóz almaı qarap turýyń kerek.

          — Endeshe bylaı tur! – dep, qasqyr kımelep kep, túlkiniń aıaǵyn innen sýyryp alady da óziniń jýan túkti sıraǵyn suǵyp jiberedi.

          Muny kórip, indegi sarshunaq oılanyp qalady. «Jańa qytyqtap edim, sonda da ketpeı qoıdy. Endi muny suqpastaı qylaıyn», – dep, qasqyrdyń ókshesin kemire bastaıdy.

          Qasqyrdyń jany kózine kórinip, túlkige jalynady:

          — Qutqara gór, dosym!..

          — Dúnıe kezek degen osy, óziń maldy qalaı jeýshi eń, endi seni de bireý sıraǵyńnan kemirip kórsin! – dep, kete beripti túlki aldy-artyna qaramaı.

---