InfoHub Logo

Toqaev pen Orban Astana men Býdapesht arasyndaǵy strategıalyq áriptestikti tereńdetýge kelisti

ASTANA. Memleket basshysy Qasym-Jomart Toqaev Majarstan Premer-mınıstri Vıktor Orbanmen kelissóz ótkizip, qazaq-majar qarym-qatynasyn jan-jaqty damytý máselelerin talqylady.

Prezıdent 2023 jyly Býdapeshtke jasaǵan memlekettik sapary aıasynda qol jetkizilgen strategıalyq kelisimderdi eske alyp, bul sapar Astana men Býdapesht arasyndaǵy ózara túsinistikti nyǵaıtýda mańyzdy ról atqarǵanyn atap ótti.

Saýda jáne ınvestısıa – basym baǵyt. 2024 jyly ekijaqty saýda kólemi 200 mln dollar bolǵan, al bıylǵy alǵashqy toqsanda bul kórsetkish 37% ósken. Qazaqstanǵa tartylǵan majar ınvestısıasynyń kólemi 370 mln dollardan asty. Qazirgi ýaqytta 700 mln dollardy quraıtyn 16 birlesken joba júzege asyrylyp jatyr. Olar mashına jasaý, aýyl sharýashylyǵy jáne logıstıka salalaryn qamtıdy.

Kelissózde Toqaev erteń ótetin Túrki memleketteri uıymynyń beıresmı samıtiniń mańyzdylyǵyna toqtalyp, Qazaqstannyń TMU aıasynda barlyq basym baǵyt boıynsha syndarly yntymaqtastyqty jalǵastyrýǵa daıyn ekenin aıtty.

Vıktor Orban saparǵa shaqyrǵany úshin alǵys bildirip, eki el arasyndaǵy qarym-qatynastyń qarqyndy jáne turaqty damý ústinde ekenin erekshe atap ótti. Premer-mınıstr Qazaqstan tarapyna samıtti uıymdastyrýda kórsetilgen qoldaý úshin rızashylyǵyn jetkizdi.

Kezdesý barysynda taraptar energetıka, saýda jáne ınvestısıa salalaryndaǵy birlesken jobalardyń iske asyrylý barysyn, sondaı-aq halyqaralyq kún tártibindegi ózekti máselelerdi talqylady.