InfoHub Logo

Túrkistan oblysyndaǵy tórt jasar Alı Adambek erekshe qabiletimen tanylyp, mektep tabaldyryǵyn attady. Bala qazirdiń ózinde bastaýysh synyp baǵdarlamasyn tolyq meńgerip, esep shyǵarýdan da, oqýdan da oza shapqan.

Bul týraly Infohub.kz aqparat agenttigi habarlaıdy.

Alıdiń erekshe qabiletin ata-anasy eki jasynda baıqaǵan. Bul jasta ol áripterdi jattaı bastaǵan, al úsh jasynda kóbeıtý kestesin meńgerip, eki amaldy esepterdi sheshe alǵan. Ol tipti úlken aǵasynyń úı tapsyrmalaryna kómekteskende ata-anasyn tań qaldyrǵan.

Muǵalimderdiń tańdanysy

Alıdiń muǵalimi Álıa Mıatbekova balanyń bilim deńgeıiniń joǵary ekenin aıtady. «Onyń bilimi meniń shákirtterimnen áldeqaıda joǵary. Alı oısha esepterdi qosyp, azaıta alady. Qıyndaý tapsyrmalar berdim, bárine de jaýap berdi. Álippeni oqyttym – eshbir qatesiz, retimen oqyp shyqty», – deıdi muǵalim.

Ata-ananyń qoldaýy

Alıdiń anasy Nurgúl Myrzaǵalı ulynyń matematıkaǵa degen qyzyǵýshylyǵyn erekshe atap ótti. «Ulymda úshinshi synypqa arnalǵan matematıka jınaǵy bar. Ózi esepterdi sheshedi. Tipti uıyqtar aldynda da menimen birge esep shyǵarǵysy keledi. Biz onyń qyzyǵýshylyǵyn qoldaımyz. Kúndelikti jarty saǵattaı kitap oqyp, jańa maqsattar qoıamyz», – deıdi anasy.

Qazirgi tańda Alı qazaq alfavıtin tolyq meńgerip, ata-anasymen birge aǵylshyn tilin de úırenip júr. Onyń bul jetistikteri kópshilikti tań qaldyrýda.