InfoHub Logo

AQSH-tyń burynǵy prezıdenti Donald Tramp Vladımır Zelenskııdiń Qyrym máselesindegi ustanymyna qatysty pikir bildirdi. Onyń aıtýynsha, Ýkraına basshysy túbekten bas tartýǵa daıyn kórinedi, dep jazady Infohub.kz Alash.kz saıtyna silteme jasap.

— Meniń oıymsha, ol daıyn, — dedi Tramp Qyrym týraly suraqqa jaýap bere otyryp.

25 sáýirde Time jýrnalyna bergen suhbatynda Tramp Qyrymdy Reseı quramynda qaldyrý beıbit kelisimniń bir bóligi bolýy múmkin ekenin alǵa tartty. Buǵan deıin amerıkalyq birneshe basylym AQSH Qyrymdy Reseıdiń bir bóligi retinde resmı moıyndaýǵa daıyndalyp jatqanyn habarlaǵan edi.

Eske sala keteıik, Qyrym 2014 jyly ótkizilgen referendým nátıjesinde Reseı quramyna qosylǵan bolatyn. Prezıdent Vladımır Pýtın Qyrymnyń mártebesi týraly máseleni "birjolata sheshilgen" dep málimdegen edi. Máskeýdiń basty sharttarynyń biri — Qyrymdy Reseıdiń aýmaǵy retinde halyqaralyq deńgeıde taný.

Óz kezeginde Zelenskıı Qyrymdy Reseıge tıesili dep moıyndamaıtynyn birneshe márte qaıtalaǵan. Dese de, ol túbekti qaıtarý ońaı bolmaıtynyn jáne Tramptyń sózi belgili bir dárejede shyndyq ekenin moıyndaǵan. Zelenskııdiń aıtýynsha, másele "adam kúshiniń jetispeýshiliginde emes, qarý-jaraqtyń tapshylyǵynda".

Tramp, sondaı-aq, Ýkraına 11 jyl boıy Qyrym úshin nege kúrespegenin, al Reseıdiń bul aımaqty "bir oq shyǵarmaı" baqylaýyna alǵanyn túsinbeıtinin jetkizdi. Bul pikirtalas Tramptyń alǵashqy prezıdenttik merzimindegi AQSH ákimshiliginiń ustanymyn eske saldy: sol kezde Memlekettik hatshy Maık Pompeo Qurama Shtattardyń Reseıdiń Qyrymdy aneksıalaýyn moıyndamaıtynyn jáne Ýkraınanyń aýmaqtyq tutastyǵy qalpyna kelmeıinshe osy saıasatty ustanatynyn aıtqan bolatyn.