Bul jaryqqa aıaq basyp týǵan jer,
Kindik kesip, kirim sende jýǵan jer.
Jastyq - altyn, qaıtyp kelmes kúnimde
Oıyn oınap, shybyn-shirkeı qýǵan jer.
Jaratyldym topyraǵyńnan, sen - túbim.
Jalǵany joq, bári senen jan-tánim.
Senen basqa jerde maǵan qarańǵy,
Jaryq bolar Sholpan, Aıym, sen - Kúnim.
Tátti sýyń dámi aýzymnan esh ketpes,
Qalyń nýyń, qyr, sýyńa jer jetpes.
Keń dalańda oıyn oınap qalsamshy,
Jazý bolyp adamzatqa er jetpes!..
Balaq túrip, qozy qýyp, jarysyp,
Batpaǵynda teń qurbymen alysyp.
Túnde - aqsúıek, altybaqan, al kúndiz
Úıretem dep asaý taıǵa jabysyp.
«Adam basy - Alla doby» degen ras,
Qalaı qýsa, solaı ketpek sorly bas.
Kim biledi, men de shetke ketermin,
Týǵan jerim, seni tastap basym jas.

---