InfoHub Logo

Túrkıada Stambul meri Ekrem Imamoǵlynyń qamaýǵa alynýy eldi dúr silkindirip,jaǵdaıdy odan ári shıelenistirýde,-dep habarlaıdy Infohub.kz.

Túrkıanyń birneshe iri qalasynda bılikke qarsy narazylyqtar órship tur. Oǵan Stambul meri Ekrem Imamoǵlynyń qamaýǵa alynýy sebep boldy. Opozısıa jetekshileriniń biri sanalatyn Imamoǵly "jemqorlyq" jáne "Túrkıada tyıym salynǵan Kúrdterdiń jumysshylar partıasyn qoldaý" aıyptary boıynsha tergelgen soń sot ony qamaýǵa alý týraly sheshim shyǵardy.

Eldi dúrliktirgen ustaý

Stambul merin senbi kúni shamamen bes saǵat boıy tergedi. Ol ózine taǵylǵan aıyptardy joqqa shyǵaryp, munyń bárin saıası qysym dep atady. Túrkıadaǵy opozısıalyq Halyqtyq-respýblıkalyq partıasy (HRP) Imamoǵlyny 2028 jylǵy prezıdent saılaýyna úmitker retinde tańdaýǵa daıyndalyp jatqan edi. Aldaǵy saılaýda ol prezıdent Rejep Taıyp Erdoǵannyń basty qarsylasy bolýy múmkin dep boljanǵan.

Alaıda, sot onyń "qylmystyq top quryp basqarǵanyn, para alǵanyn, bopsalaýmen aınalysqanyn, jeke derekterdi zańsyz tirkegenin jáne tenderler nátıjesin burmalaǵanyn" málimdep, ony tutqyndaý týraly sheshim shyǵardy. Osydan keıin halyq jappaı kóshege shyǵyp, narazylyq bastaldy.

Narazylyqtar jáne qaqtyǵystar

Qala turǵyndary men opozısıa jaqtastary narazylyq aksıalaryn tek Stambulda ǵana emes, Ankara, Izmır, Adana, Antalıa, Chanakkale, Eskishehır, Koná jáne Edirne qalalarynda da ótkizdi. Túrkıanyń ishki ister mınıstri Álı Erlıkaıanyń málimetinshe, narazylyq kezinde 340-tan astam adam ustalǵan.

Stambuldyń Sarachane aýdanynda polısıa demonstranttardy taratý úshin kózden jas aǵyzatyn gaz ben sý atqyshtaryn qoldandy. Keıbir kýágerler polısıanyń rezeńke oqpen atqanyn habarlady. Mınıstr Erlıkaıa narazylyq kezinde bir demonstranttyń polısıa qyzmetkerine qyshqyl shashyp, shabýyldaǵanyn málimdedi.

Bıliktiń reaksıasy

Rejep Taıyp Erdoǵannyń úkimeti narazylardy "eldiń tynyshtyǵyn buzyp, halyqty ekige bóldi" dep aıyptady. Al HRP jetekshisi Ózgýr Ózel Imamoǵlynyń qamaýǵa alynýyn "kelesi prezıdentke qarsy jasalǵan tóńkeris áreketi" dep baǵalady.

Narazylyqqa baılanysty bılik sot ǵımarattaryna baratyn joldardy jaýyp, jaqyn mańdaǵy metro stansıalaryn bekitip, júzdegen polısıa qyzmetkeri men ondaǵan arnaıy tehnıka jumyldyrdy. Soǵan qaramastan, Stambulda halyq besinshi kún qatarynan qala ákimdigi aldyna jınalyp, bılikke qarsy urandar aıtýda.

Qazaqstan konsýldyǵynyń eskertýi

Túrkıada júrgen qazaqstandyqtarǵa Qazaqstannyń Stambuldaǵy bas konsýldyǵy málimdeme jasady. Onda azamattarǵa halyq kóp jınalatyn oryndarǵa barmaý, mıtıńilerge qatyspaý jáne qaýipsizdik sharalaryn saqtaýǵa shaqyrý aıtylǵan. Sondaı-aq, jańalyqtardy qadaǵalap, Qazaqstannyń Túrkıadaǵy dıplomatıalyq ókildikterimen baılanysta bolý usynyldy.

Túrkıa qaıda bet alyp barady?

Ekrem Imamoǵlynyń qamalýy Túrkıadaǵy saıası landshaftqa úlken ózgeris ákelýi múmkin. Onyń tanymaldyǵy artyp kele jatqandyqtan, opozısıa jaqtastary bul áreketti bıliktiń qarsylastaryn álsiretý amaly dep sanaıdy. Al sarapshylardyń pikirinshe, bul jaǵdaı 2028 jylǵy prezıdent saılaýynyń aldynda eldegi saıası shıelenisti kúsheıtpek.

Qazirgi ýaqytta Túrkıada jaǵdaı turaqsyz. Opozısıanyń ary qaraıǵy qadamdary, bıliktiń reaksıasy jáne halyq narazylyǵynyń qanshalyqty sozylatyny aldaǵy kúnderi belgili bolmaq.