Keýdede – ot, ishte – jalyn, kózde – jas,
Kúni-túni qaıǵy jutqan sorly bas.
Saban tósek, dym, qarańǵy jataǵy,
Nany qara, shaıy qara, qarny ash.

Kún túsirmes meıirimi joq qara
Aǵarmaı ma mundaı úıde qara shash?
Janynda joq jany ashıtyn jaqyn júz,
Tasbaýyrlar yńǵaıyna qaramas.

Jaryq sáýle – ne Aı, ne Kún kórsetpes,
Jaqynynyń “Oı, baýyrymyn!” estirmes.
Is sanaýly, sóz ańdýly, erik joq,
Óz qolymen unamdy ton pishtirmes.

Qaıǵylanba, sorly tutqyn, esh netpes,
Kún batqanmen, tań atpaıtyn tún jetpes.
Er júrekti azamattyń basyna
Bul jalǵanda neler kelip, ne ketpes?!

---