InfoHub Logo

«Úı jınaýǵa jumysqa shaqyrǵan» Shymkentte 26 jastaǵy áıeldi 17 jastaǵy jasóspirim pyshaqtap óltirdi

Shymkentte 21 shildede iz-tússiz ketken 26 jastaǵy Dıana Ońǵarbaeva qaza tapty. Qaıǵyly oqıǵa eldi dúr silkindirdi. Eki balanyń anasy jumys izdep, Telegram arnasynda jarıalanǵan «úı jınaý qyzmeti kerek» degen habarlama boıynsha belgisiz mekenjaıǵa barǵan. Artynsha úıine oralmaǵan.

Marqumnyń týystarynyń málimetinshe, Dıanany 17 jastaǵy jasóspirim 16 ret pyshaqtap óltirip, denesin qoqysqa laqtyryp ketken. Jantúrshigerlik aqparatty zańger Lázzat Raqysheva da áleýmettik jelide rastady.

– Qyzdy úıine shaqyrǵan. Alaıaqtyq jolmen tuzaǵyna túsirip, aıaýsyz óltirgen. Artynda joldasy men eki búldirshini qaldy. Bul – jaı ǵana qylmys emes, júıeli qaýipsizdik dabyly, – dedi zańger.

Polısıa bul derek boıynsha QR Qylmystyq kodeksiniń 99-baby ("Adam óltirý") boıynsha is qozǵap, kúdiktini qamaýǵa aldy. Qazir tergeý amaldary júrip jatyr.

Bul qandy oqıǵa Telegram sekildi ashyq platformalarda jumysqa shaqyrýdy jamylyp jasalatyn qylmystardyń kóbeıip kele jatqanyn kórsetip otyr. Sarapshylar mundaı jarnamalarǵa senbeýdi, kez kelgen jumys usynysyna saqtyqpen qaraýdy eskertedi.