InfoHub Logo

Mańǵystaý oblysynda eki apta boıy izdestirilgen Aleksandr Nasıbarıdiń oqıǵasy qaıǵyly aıaqtaldy. Polısıa departamenti joǵalǵan azamattyń denesi tabylǵanyn jáne bul jazataıym oqıǵa emes, qylmystyq is ekenin rastady.

Tártip saqshylarynyń aldyn ala boljamy boıynsha, qaıǵyly jaǵdaıǵa turmystyq janjal sebep bolýy múmkin. Qazirgi tańda tergeýshiler qylmysqa qatysy bar degen kúdiktilerdiń jeke basyn anyqtap úlgerdi.

Oqıǵanyń mańyzdylyǵy sonshalyq, Mańǵystaý oblystyq polısıa departamentiniń bastyǵy, general-maıor Saǵyndyq Aıaǵanov oqıǵa ornyna arnaıy barǵan.

Kúdiktiler ustaldy ma?

Polısıa qazirgi ýaqytta kúdiktilerdi quryqtaý úshin jedel-tergeý sharalaryn júrgizip jatyr. İs generaldyń jeke baqylaýyna alynǵan.

«Atalǵan derek boıynsha qylmystyq is qozǵaldy. Aldyn ala málimetterge súıensek, qylmys ózara kelispeýshilik nemese turmystyq janjal negizinde jasalǵan. Qazir tergeý amaldary jalǵasýda», — dep habarlady vedomstvonyń baspasóz qyzmeti.

Eki aptalyq úmit úzildi

Eske sala keteıik, Aleksandr Nasıbarı bıylǵy jyldyń 24 qarashasynda úıinen shyǵyp ketip, sol kúıi qaıtyp oralmaǵan edi. Týystary dabyl qaǵyp, aqparat áleýmettik jelilerde keńinen taraǵan bolatyn. Eriktiler men polısıa ony tabamyz dep úmittengen.

Alaıda, 8 jeltoqsan kúni sýyt habar jetti. Aqtaý turǵynynyń denesi qala syrtyndaǵy "Radon" ystyq bulaǵy mańynan tabyldy. Saraptama qorytyndysynan keıin oqıǵanyń naqty qalaı órbigeni belgili bolmaq.