InfoHub Logo

     5-synyptyqtardyń mektepten muǵalimdik tájirıbeden ótý kezinde ózderine synyp jetekshilik jasaǵan jáne sabaq bergen apaılaryn qaıtadan kútip júrgenderine de birshama ýaqyt bolyp qalǵan edi. Sebebi apaılary bularǵa senderdi taǵy da izdep kelemin degen.
     Ózderiniń synyptarynan muǵalimdik tájirıbeden ótken jas stýdent qyzǵa 5-synyptyqtar az ǵana ýaqytta ábden-aq baýyr basyp qalǵan edi. Endi sol apaılary qaıtar kezde bularmen qoshtasyp turyp, senderdi taǵy da izdep kelip turamyn dep ýáde berdi. Sodan beri 5-synyptyqtar apaılaryn kútip júr.
     Dál eń sońǵy kúni bularǵa apaılarymen qoshtasý ońaıǵa túsken joq. Olar apaılaryn odan da ári shyǵaryp salmaq edi, biraq apaı bularmen aýlada qoshtasýdy jón sanady. Sol kúni 5-synyptyqtardyń janarlary kádimgideı jasaýrap turdy. Tipti apaıdyń óziniń de janary jasaýrap turǵandaı kóringen. Sonan soń bularǵa men senderdi taǵy da izdep kelip turamyn dedi.
     Endi, mine, sodan beri birshama ýaqyt ótti. Biraq apaılary kelgen joq.
     Álde apaılary bulardy umytyp ketti me? Al bular she?.. Apaılarynyń aıtqanyn qylmady ma? Qyldy ǵoı. Oqýdan tys ýaqyttaǵy
is-sharalardyń kezinde onyń janynda shúpirlep júrmedi me? Júrdi. Basqa synyptardaǵy osyndaı apaılardyń aldynda óz apaılaryn uıatqa qaldyrmaýǵa tyryspady ma? Tyrysty. Tipti basqa muǵalimderge kelgende qyrsyq minez tanytatyn uldardyń ózi de tyrysty. Endeshe, apaılary osynyń bárin qalaı ǵana umytady?! Eger apaılary osynyń bárin umytyp ketetin bolsa, onda ádildik bolmaǵany.
     Álde... Álde apaılary bulardy jaı sózben aldarqata saldy ma? Basqa adam aldarqatsa, aldarqatsyn, keıde tipti áke-shesheńniń ózi de aldarqata salýy múmkin. Biraq apaılar olaı etpesin. Eger apaılar olaı etse, shákirt kúmbezdiń kúldireýishi shytynar... Joq! Apaılary aldarqata salǵan joq. Ol keledi!..
     Qyz kóılegin kıip kóktem de keldi. 5-synyptyqtar osy bir kóktemniń únine ilesip, synypqa apaılary kúlimdep kirip keletindeı elegizidi. Biraq apaı kelgen joq.
     Kóp uzamaı mektep óziniń kezekti bir oqý jylynyń aıaqtalǵanyn qońyraý únimen bildirdi. 5-synyptyqtardy jazǵy kanıkýldaryna shyǵaryp saldy. Olardy endi 6-synyptyń sabaqtary kútip tur. Osy bir jyl ózderin tym eseıtip jibergendeı sezindi.
     Múmkin apaılary bulardy 6-synypta izdep keletin bolar?! Sóıtedi áli! Óıtkeni apaılar eshqashan da aldamaıdy!

---