Sen de kettiń,
Men de kettim,
Ol da ketti aýyldan.
Osynymyz uıat boldy-aý, uıat boldy-aý,qaýymnan!
Uıat boldy-aý,
Uıat boldy-aý,
Uıat boldy-aý, baýyrlar!
Momyn jurttyń, arqa súıer,
Azamaty biz edik.
Tulparlardan, tuǵyrlardan,
Qalǵan bir-bir iz edik.
Biz de kettik,
Basqa jaqqa betimizdi túzedik.
...Estımisiń, qulaq túrshi,
Qyrdan esken samalǵa.
Sálem aıtyp jatyr aýyl,
Saǵan, oǵan, maǵan da.
Telegraf symy turǵan súıenip ap baǵanǵa.
Kóremisiń,
Zańǵar taýlar jaýlyqtaryn bulǵaıdy,
Shaqyrady Aqbas shaldar,
Sybyzǵy etip qýraıdy.
Eske salyp, qaıtqan qustar
Eldiń jyryn jyrlaıdy.
Kúte-kúte,
Kózi talyp,
Kún sarǵaıyp batqandaı,
Kúte-kúte,
Juldyzdardyń janary da aqqandaı,
Zırat ekesh zırattar da,
Bizdi joqtap jatqandaı...
Momyn eldiń,
Arqa súıer,
Azamaty biz edik,
Jeke-jeke baqyt izdep,
Jeke ómir túzedik,
Jeter endi!..
Týǵan jerdiń topyraǵyna tize búk!

---