InfoHub Logo

Bir qaraǵanda Zakarpatedegi (Ýkraına) Velıkaıa Kopaná aýylynyń basqa da júzdegen aýyldan esh aıyrmashylyǵy joq sıaqty. Alaıda ol týraly jergilikti jáne álemdik basylymdar jıi jazady. Sebebi bul aýylda 61 egiz jup turady. Ár besinshi januıadan egizderdi tabýǵa bolady.

Velıkaıa Kopaná aýylyn «egizder astanasy» dep ataıdy, óıtkeni onda 4000 turǵynǵa 122 egiz keledi. Bul mekende egizder 1940 jyldan bastap jappaı týyla bastaǵan. Sondyqtan, aýylda júrgende qarttar arasynan da, besiktegi sábıler arasynan da birdeı adamdardy kórýge bolady.

Turǵyndar egizderdiń kóp bolýy genetıkalyq erekshelikke emes, bulaq sýyna baılanysty dep esepteıdi. Jergilikti bulaq kózi týý kórsetkishin arttyrýǵa kómektesetin erekshe qasıetke ıe deıdi olar. Jáne bul kórsetkish tek osy aýylǵa ǵana tán emes. Birde sýdyń «ǵajaıyp qasıeti» jaıly estigen bedeý áıel Velıkaıa Kopanáǵa keledi. Jergilikti sýdy iship, biraz ýaqyttan keıin... árıne, egiz bosanady. Qazirde aýylda, bulaqtyń aınalasynda ár jerden kelgen adam óte kóp.

Ǵalymdar bulaqtyń sýyn tájirıbeden ótkizip kórgen eken, sonda onyń quramynda selen kóp ekeni anyqtalǵan. Selen áıelder men erlerdiń jynys júıesine jaqsy áser etedi.

Bir qyzyǵy, Velıkaıa Kopanáda egizder adamdar arasynda ǵana kóp emes. Bul aımaqta egiz sıyrlar da óte kóp. Velıkaıa Kopaná aýyly Ýkraına Rekordtar kitabyna engen. Endigi kezek Gınnes Rekordtar kitabyna ený.

---