InfoHub Logo

Halyq maqtanyshy - Baýyrjan Momyshulynyń týǵanyna 110 jyl!

Bıyl 24 jeltoqsan kúni Keńes Odaǵynyń batyry, polkovnık, jazýshy, qazaq halqynyń maqtanyshy- Baýyrjan Momyshulynyń týǵanyna 110 jyl tolady. Baýyrjan Momyshuly 1910 jyly Jambyl oblysynyń Jýaly aýdany, Kólbastaý aýylynda dúnıege kelgen.

Qazaq halqy úshin birtýar dara tulǵa, erlik pen eldikpen tanylǵan batyr 1941 jyldyń qyrkúıeginen bastap Uly Otan soǵysy shaıqastarynda 16-shy armıanyń 316-shy atqyshtar dıvızıasynyń 1073-shi atqyshtar polkiniń batalónyna komandır boldy. Qapıada oı taýyp, qarańǵyda jol taýyp, eren erligimen aty álemge ańyz bolyp, sol kezde alǵash ret Baýyrjan jaıly daryndy komandır retinde aıta bastady. 7 qarashada general Panfılov Volokolamsk baǵytyndaǵy erlikteri úshin aǵa leıtenant Momyshulyn Lenın ordenine (sol kezdegi eldiń eń joǵary nagradasyna) usyndy.

Batyrlyq, adaldyq jáne qaısarlyq – Baýyrjan Momyshulyn halyq qaharmanyna aınaldyrdy. Patrıotızmniń joǵary rýhy, sheshim qabyldaýdaǵy batyldyq, tártiptilik, danalyq pen ádeptilik onyń jeke basyn sıpattaıdy.Onyń kózqarasy boıynsha senim-bul adamgershilik pen adaldyqqa ákeletin kúsh. Senim-úmit tamyry. Jastarǵa arnaǵan sózinde ol: "Sen ata – anańnyń úmitisiń. Sen – derbes, sen – jasampaz ómir, sondyqtan sený kerek.»

Baýyrjan Momyshulynyń murasy batyrlyqqa, tártip pen patrıotızmge toly, onyń ómiri adaldyq, ádildik jáne parasattylyq qaǵıdattaryna negizdelgen. Ol óziniń otanshyldyǵymen, ultjandylyǵymen, qaharmandylyǵymen, joǵary adamgershilik qasıetterimen, urys júrgizýdegi áskerı sheberligimen, tapqyrlyǵymen jáne jeke basynyń erligimen kózge túsip, aty ańyzǵa aınaldy.

Búginde onyń atyn mektepter men áskerı ınternattar alyp júr, onyń esimimen Qazaqstan qalalarynyń kósheleri atalǵan, ol týraly kóp jazady, aıtady, oqıdy. Baýyrjan Momyshulynyń kim ekenin bilmeıtin qazaq joq. Ýaqyt bárin óz ornyna qoıdy, adamdar ony umytpady, onyń dańqy jyldar ótken saıyn kóbeıedi.

Ý.M.Djoldybaeva Ál-Farabı atyndaǵy QazUÝ-niń Qazaqstan tarıhy kafedrasynyń dosenti

D.Á.Áshim Ál-Farabı atyndaǵy QazUÝ-niń Geografıa jáne tabıǵatty paıdalaný fakúltetiniń 1-kýrs stýdenti

---