InfoHub Logo

Áz Jánibek han toǵaı ishinde ań aýlap júrgende joldastarynan bólinip oqshaýlaý júrip bir kúrkege kez bolady. Han atynan túsip, kúrkege kirip kelse, shashyn tarap bir qyz otyr eken. Qyz:

— Apyr-aı, aýyz demeı kirgen soń qapalanyp qaldym-aý! — dep, ornynan túrekeledi.

Han:

— Atańyz qaıda? — dep suraıdy. Qyz:

— Alty aıaqtymen ańǵa ketti, — deıdi. Han:

— Anańyz qaıda? — deıdi. Qyz:

— Segiz aıaqtymen dámge ketti, — deıdi de:

— Ózińiz kim boldyńyz? — dep suraıdy. Han:

— Men áz Jánibek han bolamyn, — deıdi.

Eki aradaǵy áńgimeden keıin áz Jánibek han úıine kelip bılerine aıtady. Ózi de, onyń bıleri de qyzdyń bul sózine túsine almaıdy. Sol kezde Jırenshe jas jigit eken. Han bul sózdiń sheshýin Jırensheden suraıdy. Jırenshe:

— Qyzdyń ákesi bir qus, bir tazy ertip ańǵa ketken eken. Sheshesi býaz ingen minip tuzǵa ketken eken, — depti. Han qyzyǵyp, qyzdy almaq bolyp jaýshy jiberedi. Ákesi qyzdy hanǵa bermek bolady. Qyz ákesine:

— Berińiz, tek qalyń malymdy ózim suraımyn. Meniń qalyń malyma on bes laq teke, jıyrma bes qoshqar, otyz bes buqa, qyryq bes aıǵyr, elý bes býra, alpys aq bas atan bersin! — deıdi. Jaýshy qyzdyń osy sózderin aıtyp qaıtyp keledi. Han sózge túsinbeı, qyzdyń suraǵandaryn ázirletip jatady. Bul habardy estip hanǵa Jırenshe keledi. Jırenshe:

— Qyzdyń sózderi maǵynaly sózder. Onyń maǵynasy on bes — laq tekedeı ediń, jıyrma bes — qoıdy ıirgen qoshqardaı ediń, otyz bes — ókiretin buqadaı ediń, qyryq bes — azynaıtyn aıǵyrdaı ediń, elý bes — kúrkiregen býradaı ediń, alpys — atan boldyń degeni, — depti. Han buǵan túsinip, Jırenshege bir tulyp altyn aparyp beripti desedi kári qulaq qarttar.

---