InfoHub Logo

Elimizdegi notarıýstar sońǵy úsh jylda 280 myńnan astam jalǵan atqarýshylyq jazbany zańsyz shyǵaryp, qazaqstandyqtardyń moınyna joq qaryzdy ilgen. Bul áreketter arqyly olar kolektorlyq jáne mıkroqarjy uıymdaryna 400 mıllıon teńgege jýyq qarajatty zańsyz ıelenýge jol bergen. Osy zańsyzdyqqa tosqaýyl qoıý maqsatynda depýtattar notarıat qyzmeti máseleleri boıynsha zań jobasyn birinshi oqylymda maquldady.

Bul týraly Infohub.kz aqparat agenttigi habarlaıdy.

Notarıýstardyń zańsyz áreketteri

Májilistiń plenarlyq otyrysynda depýtat Baqytjan Bazarbek 2023 jylǵy prokýrorlyq shara týraly aktini jarıa etti. Onda elimiz boıynsha ondaǵan notarıýstyń jalǵan qaryzdar, jalaqylar jáne memlekettik satyp alýlar boıynsha atqarýshylyq jazbalardy zańsyz shyǵaryp kelgeni aıtylǵan.

«Kóptegen notarıýstar qaryz alýshylardan jazbasha moıyndaýdy nemese mindettemelerdi oryndamaǵany týraly tıisti dálelderdi talap etpeı, zańnan attap ketti. Keıbir notarıýstar mıkroqarjy uıymdary, lombardtar men kolektorlardyń paıdasyna zańsyz túrde osyndaı jazbalardy shyǵaryp, adamdarǵa jalǵan qaryz nemese mindettemelerdi júktegen. Odan keıin jeke sot oryndaýshylary bul somalardy jappaı óndirip alyp, azamattardy qorqytty», — dedi Bazarbek jáne osyndaı zańgerlerdiń esimderin atap ótti.

Onyń aıtýynsha, elde talaptarǵa saı kelmeıtin 280 myń jazba anyqtalǵan. Árbir «solqyldaq» jazba úshin notarıýs MQU jáne kolektorlardan orta eseppen 5 myń teńge alǵan. Tabystyń jartysyn olar keıinnen tapsyrys berýshilerge syıaqy retinde qaıtarǵan — úshinshi tulǵalar arqyly MQU qyzmetkerlerine aýdarǵan nemese qolma-qol bergen.

Zańdastyrylǵan reketke tosqaýyl

«Úsh jyl ishinde bul notarıýstar MQU jáne kolektorlyq uıymdardyń qyzmetkerlerine 400 mıllıon teńge aýdarǵan. Bul endi notarıat emes, zańdastyrylǵan reket! Buǵan qosa, prokýrorlyq shara áli oryndalǵan joq. Tulǵalar jaýapqa tartylmady! Qamaýlar qaıda? Qylmystyq ister qaıda? Bul suraqqa eshkim jaýap bere almaıdy!» — dep ashýlandy Bazarbek.

Ol usynylyp otyrǵan túzetýler notarıýstardyń jaýapkershiligin qatań kúsheıtýi kerektigin atap ótti. Mysaly, jeke derekter týraly talaptardy buzǵany úshin jaza engiziledi, azamattardyń ESQ-syn úshinshi tulǵalarǵa berýge tyıym salynady, sondaı-aq notarıýstyń mámilege qatysýshylarmen baılanysy bolǵan jaǵdaıda qatań shekteýler qoıylady.

Óz kezeginde, májilismen Nursultan Baıtilesov zań jobasyn usynyp, endi atqarýshylyq jazba qaryz alýshynyń tirkelgen jeri boıynsha ǵana jasalatynyn habarlady. Turǵylyqty aımaq sáıkes kelmese, avtomatty túrde buǵattaý tetigi iske qosylady. Buǵan qosa, notarıýstar atqarýshylyq jazbanyń kóshirmesin mindetti túrde elektrondyq úkimet portaly jáne SMS arqyly jetkizilgenin tirkep, qaryz alýshyǵa jiberýge mindetteledi.

«Zań jobasymen notarıýstardyń jeke sot oryndaýshylarymen, mıkroqarjy uıymdarymen jáne basqa da qatysy bar tulǵalarmen baılanysyn boldyrmaý úshin qosymsha shekteýler belgileý usynylady. Atap aıtqanda, jaqyn týystyq nemese ózge de táýeldilik bolǵan jaǵdaıda notarıattyq áreketter jasaýǵa tyıym salynady. Memlekettik jáne kvazımemlekettik sektor sharttary boıynsha atqarýshylyq jazbalardy notarıýstardyń quzyretinen múldem alyp tastaý usynylady. Bul máseleler sottyń qaraýyna beriledi», — dedi Baıtilesov.