24 قازاقستاندىق قىتايدا تەگىن ءبىلىم الادى
اسپان استى ەلىندە 24 قازاقستاندىق ستۋدەنت تەگىن ءبىلىم الادى. سونىمەن قاتار، ولارعا جىل سايىن 12 مىڭ يۋان شاكىرتاقى تولەنەدى. وقۋ مەرزىمى 3 جىل. ونىڭ ىشىندە ءبىر جىلى جۇڭگو ءتىلىن ۇيرەنۋگە ارنالادى. وسىنداي تاماشا مۇمكىندىككە يە بولعان جاستاردى اتا-انالارى مەن ۇيىمداستىرۋشىلار قىتايعا سالتاناتتى تۇردە شىعارىپ سالدى.
قازاقستاندىق جاستار ءۇشىن وقۋ جىلى قازان ايىنىڭ سوڭىنان باستالادى. الەۋمەتتىك ءبىلىم بەرۋ جوباسى الماتى وبلىسىنىڭ كاسىپكەرلەر پالاتاسى (پالاتا) جانە گانسۋ پروۆينسياسىنىڭ وقۋ ورىندارى اراسىندا ىسكە استى. وتكەن جىلى وبلىستىق كاسىپكەرلەر پالاتاسىنىڭ باستاماسىمەن قحر پروۆينسياسىندا ەكىجاقتى كەزدەسۋ ءوتىپ، ونىڭ ناتيجەسى بويىنشا الماتى وبلىسى ستۋدەنتتەرىمەن ءبىلىم بەرۋ باعىتى بويىنشا ءوزارا الماسۋ جوباسىن ىسكە اسىرۋ جونىندەگى كەلىسىمگە قول جەتكىزگەن بولاتىن. وسى جىلدىڭ مامىر ايىندا تالدىقورعاندا كاسىپكەرلەر پالاتاسى جانە سزيۋسيۋان كاسىپتىك-تەحنيكالىق كوللەدجى، لانچجوۋ مۇناي-حيميا كوللەدجى مەن لانچجوۋ رەسۋرستار جانە قورشاعان ورتا كاسىپتىك-تەحنيكالىق كوللەدجى اراسىندا مەموراندۋمعا قول قويىلدى. كەلىسىم اياسىندا «جۇمىسشى ماماندىقتاردى قىتايدا مەڭگەرەيىك» اتتى الەۋمەتتىك ءبىلىم بەرۋ جوباسى ىسكە اسىرىلدى.
«جوبانىڭ باستى ەرەكشەلىگى - جاستار كاسىپورىندارعا قاجەتتى ماماندىقتاردى تەگىن تۇردە وقيدى. اتالمىش ماماندىقتارعا ەلىمىزدە سۇرانىس جوعارى. وسىعان دەيىن قىتايلىق كوللەدجدەرمەن تانىسۋ بارىسىندا ولاردىڭ كادر دايىنداۋ دەڭگەيىنە ءتانتى بولدىق. جالپى، جۇڭگو ءۇشىن بۇل نەگىزگى دامۋ باعىتتارىنىڭ ءبىرى بولىپ تابىلادى. وسىلايشا ولار الەم ەكونوميكاسىنداعى جەتەكشى ەلگە اينالدى. قازاقستاندىق ستۋدەنتتەر ەڭ ساپالى حالىقارالىق ءبىلىم الاتىنىن بولادى»، - دەپ اتاپ ءوتتى الماتى وبلىسى كاسىپكەرلەر پالاتاسىنىڭ ادامي كاپيتالدى دامىتۋ ءبولىمىنىڭ باسشىسى الماگۇل وڭعارايەۆا.
كاسىپكەرلەر پالاتاسىنا قازاقستاننىڭ بارلىق وڭىرىنەن وقۋعا قاتىسۋ ءۇشىن 50-دەن استام ءوتىنىم كەلىپ تۇسكەن. قازىرگى تاڭدا كوميسسيانىڭ ىرىكتەۋى مەن سۇحباتتاسۋ كەزەڭىنەن الماتى، قوستاناي وبلىستارىنان، سونداي-اق، الماتى جانە استانا قالالارىنان 24 جاس تاڭدالدى. ولار تۋريزم، ءىت، تاۋ ءىسى، مۇناي-حيميا، ۆەتەريناريا، دانەكەرلەۋ ءىسى، مۇناي جانە گازدى پايدالانۋ، گەولوگيا، قارجى جانە ەكونوميكا، مەتاللۋرگيا، ەلەكتروتەحنيكا، ينجەنەرلىك ولشەمدەر تەحنيكاسى ماماندىقتارى بويىنشا ءبىلىم الادى.
قازاقپارات
You Might Also Like
-
كوپ كىتاپ وقۋ كەرەك. كىتاپ وقۋ ادامنىڭ ءبىلىمىن، ءوي-ورىسىن، ءتىل بايلىعىن دامىتادى. سويلەمدەردى جاقسى قۇرا الۋدى، ءدىلمارلىق قابىلەتىن جەتىلدىرەدى. كوپ وقۋ، كوپ نارسە ءبىلۋ ماڭىزدى، سونىمەن قاتار بىلەت...
-
وتباسى – جەكە تۇلعالاردىڭ الەۋمەتتەنۋى مەن ومىرگە قادام باسۋىنا، ياعني ولاردى ومىرگە دايىندايتىن مەكتەپ.
