InfoHub Logo

^{فوتو: ءارحيۆتى فوتو}

«80-جىلدارداعى ۇستازدار» دەگەندە سول جىلداردىڭ ىشىندە وزىمىزگە ساباق بەرىپ جۇرگەن ۇستازداردىڭ ءبىر لەگى تۋرالى وقۋشىلىق كوزقاراسپەن ايتىلىپ وتىر.

ۇستازدار

I. بايمانوۆا ايناش اپاي. №25 مەكتەپتىڭ ماتەماتيكا ءپانىنىڭ ءمۇعالىمى. 4-سىنىپتان 10-سىنىپقا دەيىن ساباق بەرگەن ۇستاز. جالپى، ايناش اپايدى بىلەتىن ورتا ول كىسىنى ۇلاعاتتى جان رەتىندە تانيدى. ول كىسىنىڭ الدىڭعى بۋىن شاكىرتتەرى تۋرالى كوپ ايتىلادى. بىردە ۇستازدى سول الدىڭعى بۋىن شاكىرتتەرى – ۇلدارى مەكتەپكە ىزدەپ كەلگەن ەدى. وزدەرىنىڭ قالاۋلارى سول بولدى ما ەكەن، ۇستاز ولاردى دا ساباعىنا قاتىستىردى. ولار ۇلكەن جىگىتتەر بولاتىن. ولاردى وسى سىنىپتاعى ىنىلەرىنىڭ جاندارىنا وتىرعىزىپ قويدى. ولار دا بالالارمەن بىرگە ساباق وقىدى، بالالارمەن بىرگە ەسەپ شىعاردى.

ايناش اپاي تاقتامەن جۇمىس ىستەپ جاتقان كەزدە، ساۋساعى اپپاق بورعا مالىنىپ تۇراتىن.

بولاشاققا ارتىپ بارلىق سەنىمىن،
ولار تەككە وتكەرگەن جوق ءومىرىن.
مەكتەبىمەن بىرگە جىلدار جاساسىپ،
قۇرمەتىن كورگەن تالاي ەلىنىڭ.

جاندار ەمەس بوسقا ۋاقىت وتكەرگەن،
بار ءومىرى بالا، شاكىرت دەپ كەلگەن.
ولار كەشە جاساي العان ۇلىلىق،
ءبىلىم بەرىپ قارا تاقتا، اق بورمەن.

ۇستاز تالىم-تاربيەلىك ساعاتتارىن وتكىزىپ جاتقان كەزدە وتە ۇلاعاتتى، اسەرلى سويلەيتىن. ءسىرا، كورنەكتى پەداگوگتەردىڭ شىعارمالارىن كوبىرەك وقيتىن بولسا كەرەك. سەبەبى سونداي دۇنيەلەردەن مىسالدار كەلتىرىپ وتىراتىن ەدى.

ەسەپ شىعارىپ جاتقان بالاعا توبەدەن لوباچيەۆسكيي قاراپ تۇراتىن. بىردە ايناش اپاي تاقتادا تۇرعان بالاعا: «مەن ساعان ايتىپ جاتىرمىن، ال سەن لوباچيەۆسكييگە قاراپ تۇرسىڭ عوي، ساعان لوباچيەۆسكيي ەمەس، ماتەماتيكانى ۇيرەتەتىن مەن عوي» دەگەنى بار. 90-جىلداردىڭ ىشىندە بۇل كابينەتتە سوفيا كوۆاليەۆسكايانىڭ اتاقتى ءسوزى ءىلۋلى تۇردى: «اقىنجاندى بولماعان ادام ماتەماتيك تە بولا المايدى». بۇل كەزدە ماتەماتيكانىڭ جەتەكشى ۇستازى جۇماعامبەتوۆا رايحان اپاي ەدى. ول كىسى مەكتەپكە 80-جىلداردىڭ اياق شەنىندە كەلگەن بولسا كەرەك. سەبەبى ول ۇيدەگى اعامىز اۋدان كولەمىندە ءار جەردە جاۋاپتى قىزمەتتەر اتقارعان كىسى. 80-جىلداردىڭ اياق شەنىندە ەنگەلس شارۋاشىلىعىن باسقارۋعا جىبەرىلگەن. سوۆحوز ديرەكتورى.

بايمانوۆا ايناش اپاي 90-جىلداردىڭ ىشىندە №25 مەكتەپتە ساباق بەرگەن جوق. جالپى، ول كىسى «بوزكول» اۋىلىنا قونىس اۋدارىپ كەتكەن ەدى. سەبەبى اپايدىڭ وتباسىنداعى وتاعاسى ەنگەلس شارۋاشىلىعىنىڭ جۇمىسشىلار كوميتەتىنىڭ ءتوراعالىعىنان بوزكولدىڭ كەڭەس ءتوراعالىعىنا قىزمەتكە اۋىسقان بولاتىن. وسىعان بايلانىستى وتباسى قونىس اۋداردى.

II. جانيەتوۆ وتەگەن اعاي. ماتەماتيكا ءپانىنىڭ ءمۇعالىمى. 80-جىلداردىڭ ىشىندەگى №25 مەكتەپتىڭ جاس ۇستازى. قىزىلوردا پەدينستيتۋتىنىڭ ماتەماتيكا فاكۋلتەتىنىڭ تۇلەگى.
جانيەتوۆ وتەگەن اعاي سىنىپقا تۇراقتى تۇردە ساباق بەرگەن جوق. جوعارىدا ايتىلعان بايمانوۆا ايناش اپاي ساباقتا بولا الماي قالعان كەزدە ورنىنا ساباعىن جۇرگىزەتىن. ايناش اپاي ءوزىنىڭ ماتەماتيك ارىپتەسىن جوعارى باعالايتىن ەدى. ونى بالالارعا اشىپ ايتادى. «ەرتەڭ مەن ساباقتا بولا المايتىن شىعارمىن. سەندەرگە ساباقتى وتەگەن اعايلارىڭ جۇرگىزەدى. وتەگەن اعايلارىڭ – ءبىلىمدى ماتەماتيك» دەپ ايتىپ كەتەدى.

جانيەتوۆ وتەگەن اعاي تاقتامەن جۇمىس ىستەپ جاتقان كەزدە، تاقتاعا سيفرلار مەن ماتەماتيكالىق تاڭبالاردى سالىپ جاتقاندا، قولىنداعى بور تاقتاعا تىق-تىق ەتىپ ءتيىپ جاتاتىن ەدى. وسىلاي سارت-سۇرت ەتكىزىپ ەسەپتى شىعارىپ تاستايدى دا، تاقتانىڭ الدىندا تۇرعان سۇرتكىشپەن ساۋساعىنا جۇققان بوردى ءسۇرتىپ تاستاپ، سول تىكەسىنەن تىك تۇرعان قالپى، ول كىسى، جالپى، ورىندىققا كوپ وتىرا بەرمەيدى، ءمۇعالىمنىڭ ۇستەلىنىڭ ۇستىندە جاتقان كلاستىڭ جۋرنالىنا قاراپ: «ال ەندى ءوزىمىز وسى بويىنشا ەسەپتەر شىعارىپ كورەيىك» دەر ەدى.

جانيەتوۆ وتەگەن اعاي مەكتەپتە كومسومول جەتەكشىسى بولدى. جينالىستى دا ناقتى جۇرگىزەتىن. «ازشىلىق كوپشىلىككە باعىنادى». بۇل – وتەگەن اعايدىڭ ءسوزى. كومسومول مۇشەلەرى الدەبىر ماسەلەنى داۋىسقا سالىپ جاتقاندا ايتىلادى. دەموكراتيانىڭ تالابى.

جانيەتوۆ وتەگەن اعاي 90-جىلداردىڭ ىشىندە №25 مەكتەپتە ساباق بەرگەن جوق. ول كىسى قازالى اۋداندىق ءبىلىم بولىمىنە قاراستى وزگە مەكتەپتەرگە مەكتەپ ديرەكتورى بولىپ كەتكەن ەدى.

III. جادييەۆ اقنيەت اعاي. اسكەري دايىندىق ءپانىنىڭ ءمۇعالىمى. جوعارىدا ايتىلعان جانيەتوۆ وتەگەن اعايدىڭ اعاسى، 80-جىلداردىڭ ىشىندە وزىمىزگە حيميا پانىنەن ساباق بەرگەن ۇستاز جادييەۆ جانيەت اعايدىڭ ءىنىسى. جالپى، بۇل اۋلەت ۇستازدار اۋلەتى دەپ اتالادى. وسى اۋلەت جايلى 1999 جىلى ماقالا جازىلعان بولاتىن. ول قازالى اۋدانى ءبىلىم ءبولىمىنىڭ تاپسىرماسىمەن جازىلدى. سەبەبى قازالى اۋدانىنىڭ ءبىلىم بولىمىنە وبلىس ۇستازدارىنىڭ «سىر مەكتەبى» گازەتىنىڭ بەتىندە ارنايى بەت بەرىلەتىن بولعان ەدى. وسى سەبەپتى اۋداندىق ءبىلىم ءبولىمى ماقالانىڭ جازىلۋى جونىندە مەكتەپ باسشىسىنا تاپسىرعان. «بايتەرەك جايىپ جاپىراق...» اتتى وسى ماقالاعا شاكىزات دارماعامبەتوۆ اعامىز ماقالا جاريالانعاننان كەيىنگى ۋاقىتتاردىڭ بىرىندە جىلى ءسوزىن ايتقان ەدى. شاكىزات دارماعامبەتوۆ سىر بويىنداعى بەلگىلى جۋرناليست. بىرنەشە باسىلىمدا، سونىڭ ىشىندە رەسپۋبليكالىق «سوسياليستىك قازاقستان» گازەتىندە قىزمەت ىستەگەن. سول كەزدە وبلىس ۇستازدارىنىڭ «سىر مەكتەبى» گازەتىندە جاۋاپتى حاتشى بولىپ ىستەيتىن. وسى ماقالادا ىشىندە «قۇرمەت بەلگىسى» وردەنىنىڭ يەگەرى جانە ۇستاز ەڭبەگى ءۇشىن بەرىلگەن باسقا دا ماراپاتتاردىڭ يەگەرى بار ءبىر اۋلەتكە عانا تيەسىلى 20 شاقتى ۇستازدىڭ ەسىمى اتالسا، بۇل قاتار ودان بەرگى ۋاقىتتا اۋلەتتىڭ ۇستازدىق جولدى قالاپ العان كەيىنگى تولقىنىمەن تولىعا تۇسكەنى انىق.

بۇل اۋلەتتەن مەكتەپ ديرەكتورلارى شىققان. مىسالى، جادييەۆ جانيەت اعايدىڭ ءبىر ءىنىسى – جادييەۆ جانداۋلەت اعاي قازالى اۋداندىق ءبىلىم بولىمىنە قاراستى №190 مەكتەپتىڭ مەكتەپ ديرەكتورى بولىپ قىزمەت اتقارسا، جادييەۆ جانيەت اعايدىڭ تاعى ءبىر ءىنىسى – جادييەۆ شىنتاس اعاي قازالى اۋداندىق ءبىلىم بولىمىنە قاراستى №102 مەكتەپتىڭ مەكتەپ ديرەكتورى بولىپ قىزمەت اتقارعان. جادييەۆ جانيەت اعايدىڭ تاعى ءبىر ءىنىسى – جادييەۆ جانعازى اعاي قازالى اۋداندىق ءبىلىم بولىمىنە قاراستى №97 مەكتەپ ديرەكتورىنىڭ وقۋ ءىسى جونىندەگى ورىنباسارى بولىپ قىزمەت اتقارسا، قازاق ءسسر-ىنىڭ وقۋ ۇزدىگى جادييەۆ جانيەت اعايدىڭ ءوزى №25 مەكتەپ ديرەكتورىنىڭ تاربيە ءىسى جونىندەگى ورىنباسارى بولىپ قىزمەت اتقارعان. جادييەۆ جانيەت اعايدىڭ تاعى ءبىر ءىنىسى – جادييەۆ ءومىرزاق اعاي №97 مەكتەپتىڭ ۇستازى بولىپ قىزمەت اتقارسا، جادييەۆ جانيەت اعايدىڭ تاعى ءبىر ءىنىسى – جادييەۆ اقنيەت اعاي №25 مەكتەپتىڭ ۇستازى بولىپ قىزمەت اتقارعان. ۇستازدار اۋلەتى وسى كىسىلەردەن ءارى قاراي تاراي بەرەدى. ۇستازدار اۋلەتى جايلى 2008 جىلى مەكتەپتەن عىلىمي جوبا قورعالىپ، ول وبلىستىق عىلىمي جوبالار جارىسىنان «العىس حات» يەلەنگەن. جەتەكشىسى – سامال سارسەن، شاكىرتى – جانيەت نۇرگۇل.

جادييەۆ اقنيەت اعاي ۇستىنە ارنايى فورما كيىپ جۇرمەسە دە، مىنەز-قۇلىق، داعدى، جيناقىلىق جاعىنان العاندا اسكەري ادام سياقتى اسەر قالدىراتىن ۇستاز ەدى. ول كىسى سپورتقا جاقىن جان بولعان. كەيدە فيزكۋلتۋرادان دا ساباق بەرەتىن. ءبىراق نەگىزگى قىزمەتى – اسكەري دايىندىق ءپانىنىڭ ءمۇعالىمى. وسى ءپاننىڭ شەبەر ۇستازى، سونىمەن بىرگە بىلىكتى، ساۋاتتى پەداگوگ بولعان.

قانداي دا ءبىر مەكتەپ بولماسىن، ءار ءپاننىڭ ءوزىنىڭ ءبىر ۇزدىك شاكىرتى بولاتىندىعى بەلگىلى. وسى پاندەگى سونداي ۇزدىك شاكىرتتىڭ ءبىرى – ءىلياسوۆ جانتاس بولعان ەدى. ءىلياسوۆ جانتاس كەيىن مەرزىمدى اسكەري قىزمەتىن اسكەري-تەڭىز فلوتىندا وتەدى. ول سيەۆاستوپول قالاسىنداعى اسكەري بولىمگە تۇسكەن بولاتىن.

جادييەۆ اقنيەت اعاي 90-جىلداردىڭ ىشىندە №25 مەكتەپتە ساباق بەرگەن جوق. ول كىسى بۇل كەزدە زەينەت دەمالىسىنا شىعىپ كەتكەن ەدى. ۇستازدار مەرەكەسىندە مەكتەپكە كەلىپ تۇراتىن. ال بۇل كەزەڭدە اقنيەت اعاي بەرگەن ءپاندى ءىلياسوۆ ساحيتجان، ءدارماحانوۆ كادىربەك ەسىمدى ۇستازدار جالعاستىردى. بۇل كەزەڭ قازاقستاننىڭ ءتول اسكەرىنىڭ قۇرىلعان ۋاقىتى ەدى.

IV. فايزەكەيەۆا راحيما اپاي. 80-جىلداردىڭ ىشىندە №25 مەكتەپتە وزىمىزگە تاريحتان، قوعامتانۋدان ساباق بەرگەن بىلىكتى، تاريحشى ۇستاز. رۋحاني باي ءارى قوعامدىق ىستەرگە جاقىن جۇرگەن ۇستاز بولعان. ساباقتى وتە زەردەلى تۇسىندىرەتىن. ول كىسى جونىندە اپايدىڭ تۋعان ءسىڭلىسى، ءبىر كەزدە الماتى قالاسىنداعى قازاق ءتىلى مەن ادەبيەتىن تەرەڭدەتە وقىتاتىن مەكتەپتە وقىعان، سونان سوڭ سول الماتىدان پەداگوگيكالىق وقۋ ورنىن بىتىرگەن №25 مەكتەپتىڭ ۇستازى سامال سارسەن بىلاي دەيتىن:

«ەگەر مەنىڭ بويىمدا رۋحاني ىسكە دەگەن ءبىر جاقىندىق بولىپ جاتسا جانە ۇستازدىق جۇمىسقا دەگەن بەيىمدىلىك بولسا، وندا وعان راحيمادان العان تاربيەنىڭ دە ۇلەسى مول. ويتكەنى الماتىدا وقىپ جۇرگەنىمدە راحيمانىڭ تاربيەسىن كوپ كوردىم عوي».

فايزەكەيەۆا راحيما اپاي 90-جىلداردىڭ ىشىندە №25 مەكتەپتە ساباق بەرگەن جوق. ول كىسى بۇعان دەيىن وتباسىسىمەن الماتىعا قونىس اۋدارعان ەدى. سول جاقتا الماتى سۋ شارۋاشىلىعى تەحنيكۋمىنا (97-دەن باستاپ كوللەدج) وقىتۋشى بولدى.

فايزەكە قىزى راحيما اپاي 2016 جىلدىڭ قاراشا ايىندا مەرەيتويلىق جاس بيىگىنە كوتەرىلگەن بولاتىن. سول كەزدە وسىعان بايلانىستى ءسىڭلىسى، ءوزى دە ۇستاز سامال سارسەن ءوز تىلەگىندە بىلاي دەگەن ەدى:

جانىندا تاعى، مىنە، دوستار بار-دى،
وسىلاي 60-ى دا اسقارلاندى.
تاتەنىڭ سوقپاق جولى الماتىعا
تۋعان جەر – قازالىدان باستالعان-دى.

ۇستاز بولدى وندا دا اسقاق ابىرويلى،
شاكىرتى تاريح جولدان تانىدى ويدى.
ءوزى دە رۋحاني ىسكە جاقىن،
جان بولدى جانى تازا، تاعى دا ويلى.

كىتاپ دەپ جان بايلىعىن تانىپ كەلدى،
ماقساتىن ىزگى ىستەردەن انىق كوردى،
اقىرى تاتەمىزدى ىزگى سوقپاق
الماتى – ءۇشقوڭىرعا الىپ كەلدى.

مۇندا دا ۇستاز بولدى اسقارالى،
كوتەرىپ جاقسى ىستەردى، باستامانى.
شاكىرت بار، ەندى، مىنە، ۇل-قىزى بار،
ەستىلەدى تاربيەلى جاستار ءانى.

ەسكە الساق تۋعان جەر مەن جۇراعاتتى،
باستاۋدان بايمىرزا اتتى بۇلاق اقتى.
اكەمىز سوعان جاساپ ەلاعالىق،
جان بولىپ ەدى زامانىندا ۇلاعاتتى.

دەگەن ەك جىردان ءسوزدى قۇرايىق-تى،
وسىلاي وتكەننەن سىر ۇعايىق-تى.
تاتە دە ەل سىيلاعان اكەمىزگە
پەرزەنت بولدى مىنا ومىردە لايىقتى.

ەڭبەگى جاندى ۇستازدىق، باعالاندى،
ورتادان قاسيەتىمەن دارالاندى.
ءوسىردى عاني، مەرەي، سالتاناتتى،
وقىتتى وزىندەي عىپ بالالاردى.

بالالار ءومىر جولدان باقتى الىپ ءجۇر،
قىزمەتىن ابىرويلى اتقارىپ ءجۇر.
وسىعان تاتە بۇگىن قۋانىپ ءجۇر،
«بالالار – باقىتىم» دەپ ماقتانىپ ءجۇر.

جۇبايى بولعان ءار كەز سۇيەۋ دارا،
جەزدەمىز بايمىرزا ەلگە كۇيەۋ بالا.
سپورتقا جاقىن ەدى اۋەل باستان،
تەمىردى گالستۋكشە يەر دارا.

بۇل كۇندە جان بايلىعى – اتبەگىلىك،
اكەسى سونىڭ سىرىن وتكەن ۇعىپ.
مىرزەكەڭ دە اتسەيىس تۇلپار باپتار،
جۇيرىك دەسە جانى تۇرار كوكتە كۇلىپ.

قىزمەتتە ابىرويمەن وسكەن ۇلى،
تاتەمىز جۇرەكتە ءار كەز ەسكەرىلدى.
جاراسقان، مىنە، وتباسى – تاتە، جەزدە،
يبالى سالەم ساپ تۇر قوس كەلىنى.

شاپقىلاپ ءوسىپ جاتىر نەمەرەلەر،
كەڭەيەر ءالى تالاي كەرەگەلەر.
مىرزاعابىل، راحيما اۋلەتىنەن
وسىلاي تاراي بەرەدى ونەگەلى ەل.

جاستىق شاق، بالالىق شاق ارمانىمدا،
تاتەنىڭ تاربيە العام مەن قولىندا.
وزىندەي جان بايلىعىن ۇلگى ەتتى دە،
كەلەمىن سونىڭ ءالى مەن جولىندا.

دەگەندەي ءبىلىم جولىن تۇگەسىپ ال،
ءومىردىڭ ۇستاز جولدان ۇلەسىن ال.
بۇل كۇندە بولسام ۇستاز ابىرويلى،
تاتەنىڭ وسى جولدا ۇلەسى بار.

ءيا، ءوزى ايتقانداي، راحيما فايزەكەيەۆا سىندى ۇستاز-اپكەنىڭ ءتالىمىن كورگەن سامال سارسەن – 2016 جىلى وبلىستىق كەزەڭىنەن I ورىن الۋ ارقىلى پاۆلودار قالاسىندا وتكىزىلگەن، ۇلى ۇستاز ىبىراي ءالتىنساريننىڭ 175 جاسقا تولۋىنا وراي ۇيىمداستىرىلعان «ءبىلىم بەرۋدەگى يننوۆاسيالار مەن تاجىريبە: ۋاقىت تالابى» تاقىرىبىنداعى ءىى رەسپۋبليكالىق
پەداگوگيكالىق وقۋلارىنا قاتىسىپ قايتقان ۇستاز. سامال سارسەن – باستاۋىش سىنىپتىڭ ۇستازى.

V. ەسەتوۆ امانباي اعاي. №25 مەكتەپتىڭ 80-جىلداردىڭ ىشىندە ساباق بەرگەن تاعى دا ءبىر بىلىكتى، تاريحشى ۇستازى. سىنىپقا راحيما اپاي دا، ەسەتوۆ امانباي اعاي دا ساباق بەرگەن. ەسەتوۆ امانباي اعاي سىنىپتا ساباق بەرىپ تۇرعان كەزدە، الدەبىر تاريحي وقيعانى بايانداپ جاتقاندا، سول تاريحي وقيعانى بەينەلەپ، اسىرەلەپ، داۋىس مانەرى دە، داۋىس قۇيىلىسى دا سوعان ساي قۇبىلىپ، سوعان ساي وزگەرىپ تۇراتىن ۇستاز ەدى. مىسالى، «300 جىلداي پاتشا بولعان رومانوۆتار اۋلەتى!..» وسى ءسوزدى ايتىپ جاتقان كەزدە سىنىپتا ساباق بەرىپ تۇرعان ۇستازدىڭ داۋسى دا ساڭق ەتە تۇسەدى. وقۋشىنى ەرىكسىز قاراتادى، ەرىكسىز نازار اۋدارتادى. ءبىراق سويلەم ءالى اياقتالعان جوق. ەندى سويلەمنىڭ قالعان بولىگىن ايتىپ جاتقان كەزدە امانباي اعايدىڭ الگى داۋىس قۇيىلىسى دا بىرتە-بىرتە، بىرتە-بىرتە باسەڭدەپ، تومەن قاراي تۇسە بەرەر ەدى: «...ءبىر-اق كۇندە جەرمەن-جەكسەن قۇلادى». سونان-سوڭ تىنىشتىق ورناپ قالادى. اۋىل مەكتەبىندە رەسەيدەگى 1917 جىلعى تاريحي وقيعا باياندالىپ جاتىر. ۇستازدىڭ اسەرى سونداي، ونىڭ سوناۋ 80-جىلداردىڭ ىشىندە ايتىلعان سويلەمىنە دەيىن جادىڭىزدا قالىپ قويار ەدى. ەسەتوۆ امانباي اعاي ءار ۋاقىتتا قوعامدا بولىپ جاتقان جاڭالىقتار مەن وزگەرىستەرگە، ساياسي وقيعالارعا سەرگەك، وياۋ كوڭىلمەن قاراپ وتىراتىن ۇستاز بولعان. ۇستاز سونى تالدايدى، تۇسىندىرەدى.

ەسەتوۆ امانباي اعاي – امانگەلدى اعايدىڭ ءىنىسى. ەسەتوۆ امانگەلدى اعاي دا – 80-جىلداردىڭ ىشىندە ساباق بەرىپ جۇرگەن ۇستاز جانە مەكتەپتىڭ ديرەكتورى. ەسەتوۆ امانگەلدى اعايدىڭ سول كەزدە ساباق بەرەتىن سىنىپتارىنداعى ماتەماتيكاعا وتە جاقىن كەلگەن وقۋشىلارى «امانگەلدى اعاي ساباقتى كۇشتى بەرەدى!» دەيتىن وزدەرى. ويتكەنى ەسەتوۆ امانگەلدى اعاي – ماتەماتيكا ءپانىنىڭ ۇستازى.

ەسەتوۆ امانباي اعاي 90-جىلداردىڭ ىشىندە №25 مەكتەپتە ساباق بەرگەن جوق. ول كىسى قازالى اۋداندىق ءبىلىم بولىمىنە قاراستى وزگە مەكتەپكە مەكتەپ ديرەكتورى بولىپ كەتكەن ەدى.

ال 90-جىلداردىڭ ىشىندە تاريح ءپانىن جوو-نىڭ «تاريح» ماماندىعىنىڭ سول كەزگى تۇلەكتەرى كۇلايشا كارىبايەۆا، ايگۇل قارجاۋبايەۆا، گۇلباعيدا قوسبارماقوۆالار جۇرگىزە باستاعان ەدى. بۇل كەزەڭ قوعامدا ۇلتتىق تانىم، تاريحي سانا قالىپتاستىرۋ كەزەڭى بولعاندىعى بەلگىلى. «ءبىزدىڭ تاريح بۇل دا ءبىر قالىڭ تاريح، وقۋلىعى جۇپ-جۇقا ءبىراق تاعى» دەپ جازعان ەدى قادىر مىرزالييەۆ. وسىعان وراي 1996 جىلى اۋىل ساحناسىندا قازاق حاندىعى قۇرىلۋىنىڭ 540 جىلدىعى، جەلتوقسان وقيعاسىنىڭ 10 جىلدىعى، قازاق تاۋەلسىزدىگىنىڭ 5 جىلدىعى، 1916 جىلعى ۇلت-ازاتتىق كوتەرىلىسىنىڭ 80 جىلدىعىنا بايلانىستى مەكتەپتىڭ جاس ۇستازدارى، مەكتەپتىڭ كىتاپحاناشىلارى، اۋىلدىق مادەنيەت ءۇيىنىڭ قىزمەتكەرلەرى، اۋىلدىڭ جۇمىسشى جاستارى، مەكتەپتىڭ جوعارى سىنىپ وقۋشىلارى جانە سونىمەن بىرگە اۋىل كىتاپحاناسىنىڭ بىرىگۋىمەن، اراندى اۋىلدىق وكرۋگىنىڭ اكىمى راحمانبەرگەن جۇماعامبەتوۆ، №25 مەكتەپتىڭ ديرەكتورى الماس تەمىربايەۆتاردىڭ تىكەلەي دايىندىق بارىسىن وزدەرى قاداعالاپ وتىرۋىمەن، كەمەڭگەر وتەپ جانە سامال سارسەننىڭ جۇرگىزۋىمەن، تاقىرىپقا ساي دۇنيەلەرمەن ارلەنگەن، «قازاق حاندىعىنىڭ قۇرىلۋى»، «اقتابان شۇبىرىندى»، «سوتتاعى سوڭعى پروسەسس» كورىنىستەرىنەن تۇراتىن «ءبىز، قازاق، ەجەلدەن ەركىندىك اڭساعان» اتتى تاريحي سيپاتتاعى كەش وتكىزىلسە، وسى كەشتىڭ تاريحتى ءار كەزەڭگە ءبولىپ، تاريحي دەرەكتەرگە تولى باياندامالارىن جاساپ شىققان وسى №25 مەكتەپتىڭ تاريحشى ءمۇعالىم قىزدارى بولاتىن.

بايمانوۆا ايناش اپاي، جانيەتوۆ وتەگەن اعاي، جادييەۆ اقنيەت اعاي، فايزەكەيەۆا راحيما اپاي، ەسەتوۆ امانباي اعايلار. بۇلار – 80-جىلداردىڭ ىشىندە وزىمىزگە مەكتەپتە ساباق بەرگەن ۇستازداردىڭ ءبىر لەگى عانا. ارينە، ۇستازدار قاتارى مۇنىمەن عانا شەكتەلمەك ەمەس. 1998 جىلى جازىلىپ، اۋىلدىڭ مادەنيەت ءۇيىنىڭ ساحناسىنا 10-كلاسس وقۋشىسى سەرىك وتەپبەرگەنوۆ الىپ شىعىپ دومبىرامەن ورىنداعان، كەيىننەن، 1999 جىلى الماتىدان دارىگەر-پروفەسسور، عىلىم دوكتورى بەگالى ايتبەمبەت سىندى بەلگىلى مەكتەپ تۇلەكتەرى كەلگەن جيىنداردا اۋىلدىق مادەنيەت ءۇيىنىڭ تەرمەشى-ونەرپازى نۇرگۇل شايىقوۆالار ورىنداپ شىققان مەكتەپ تەرمەسىندە ايتىلعانداي،

ماقتاۋلى ۇستاز كوپ ەدى،
ىسىمەنەن ناندىرار.
ايتا بەرسەڭ بارلىعىن،
جىرشىڭىز تاڭدى تاڭعا ۇرار.
بىلىمىنە شولىركەپ،
قاشاننان-اق جان قۇمار.
شاكىرتتەر شىقتى الدىنان
ايىزىڭدى قاندىرار، –
دەگەندەي، مەكتەپتىڭ ۇزىن-ىرعاسى تاريحىندا ايىز قاندىرار شاكىرتتەر شىعارعان ماقتاۋلى ۇستازدار قاتارى از ەمەس.

---