InfoHub Logo

باياعى ءىشۋ "مودا" بولعان جىلدارى جەتپىس دەگەن قۇرداسىمىز ۇيىنە شاقىردى. سەبەبىن دە سۇراماي ۇيىنە جەتىپ باردىق. "ءبىزدىڭ وتاعاسى اراقتى مۇلدە قويعالى جاتىر. تالاي-تالاي بەرگەن ۋادەلەرى تاۋسىلدى. بۇگىن سول بالەدەن الا ءجىپ قيىپ، ات قۇيرىعىن كەسپەكشى، سوعان شاقىرعان ەدىك"، - دەدى جەتپىستىڭ كەلىنشەگى ءماريام. سەنەر-سەنبەسىمىزدى بىلمەي وڭ بولسىنىمىزدى ايتىپ، شايعا وتىردى0، ايتقاندارى شىن ەكەن، لەبىزىن ءبىلدىرىپ، تىلەگىن تىلگە تيەك ەتكەندەر اراقتىڭ زيانىن، ونى تاستاپ كەتۋ دەگەننىڭ ەكىنىڭ ءبىرىنىڭ قولىنان كەلمەيتىنىن، جاكەڭنىڭ ەرلىككە بارا-بار قادامىن سوزدەرىنە ارقاۋ ەتتى.

شايدا ون شاقتى ادام تىلەك ايتىپ حرۋستال توستاقتارى سىڭعىر قاقتى. كەزەك ەتكە كەلىپ، قىزىپ العاندار جەتپىسەكەڭدى ارىستانداي ايباتتى، جولبارىستاي قايراتتى، ناعىز سەن تۇر مەن اتايىننىڭ ءوزى عىپ، اسپانداتتى. بايقايمىن، داستارقان يەسى قىزارا ءبورتىپ، "مۇنان بىلاي سەنى جەلكەمنىڭ شۇقىرى كورسىن" دەگەندەي اقاڭدى اۋىزعا ەسەسى كەتكەندەي اقتارا سالادى. ەت جەلىنىپ، جينالعاندار سورپامەن "كوتەرىپ قويدى ".

كەزەك نەگىزگى راسىمگە كەلدى. ەكى جىگىت ءبىر اق، ءبىر قىزىل ءجىپتى كەرە تارتىپ تۇردى. اسابا ءسوز سالىپ: "مىنا ەكى ءجىپتى كوردىڭىزدەر عوي. مۇنىڭ ءبىرى اق اراق، ەكىنشىسى قىزىل شاراپ دەگەندى بىلدىرەدى. ءقازىر جەتپىس اعامىز قولىنا قايشى الىپ مىنا جىپتەردى قيادى. بۇل ىشىمدىك اتاۋلىمەن قوشتاستىم دەگەنى. سودان كەيىن اراق ءىشۋدى مۇلدەم قويادى. بۇل "جىندى سۋلاردى ەندى اۋىزعا المايدى"،— دەدى.

قىزارا بورتكەن جەتپىستىڭ ءتىلى كۇرمەلە باستاعان، بىزگە جالتاق-جالتاق قارايدى. قينالىپ-اق تۇرعانى بەت-اجارىنان بايقالادى. بەينە ءبىر "قيماسىنان" ايىرىلعان جانداي كوزى جاساۋراپ، كەمسەڭدەپ تۇر. جىپكە تاياپ باردى، جۇرت دۋىلداتا قول سوعىپ جاتىر. "ال، قانە جاكە، قانە، باستاڭىز" دەپ قويادى. كەنەت جاكەڭ بىزگە قاراپ تۇرىپ: "ءاي، جىگىتتەر، وسىنىڭ قىزىل ءجىبىن قويا تۇرساق قايتەدى"، دەمەسى بار ما؟!..

"ۇرلىق قالسا دا ادەت قالمايدى" دەگەن راس-اۋ، جاكەڭ ءالى دە... ازداپ جۇزدەتەدى.

---