InfoHub Logo

تالاي تۇلەكتىڭ ارمانىنا اينالعان قازۇۋ-دا وقۋ مۇمكىندىگى بۇيىردى. اللاعا شۇكىر. شىنىندا دا، ارمان بولارلىقتاي اتىنا زاتى ساي اسەم قالاشىق مەنىڭ جۇرەگىمدى بىردەن جاۋلاپ الدى. ءوز ءبىلىمى مەن دارىنىنا سەنەتىن كوڭىلدى دە ىزدەنىمپاز جاستاردىڭ ورداسى ەكەنى كوزگە كورىنىپ-اق تۇر، مەن ءوزىمنىڭ وسى كۇننەن باستاپ جاڭا ومىرگە ارالاسا باستاعانىمدى سەزىندىم. وسىلايشا مەنىڭ ستۋدەنتتىك ءومىرىم باستالىپ تا كەتتى...

ستۋدەنتتىك شاق دەگەن الدەبىر روماننان نەمەسە الدەبىر اۋىزەكى اڭگىمەلەردەن ەستىپ جۇرگەن قىزىقتى دا بايىپتى شاققا ەنىپ، تاعى ءبىر قادامىمىزدى جاسادىق. الماتىداي ۇلكەن قالاعا كەلىپ جالعىزسىراۋ، بوتەنسىنۋ دەگەن جاعىمسىز اسەر اتىمەن جوق. ءسىز بىلسەڭىز، ونداي وي وقۋ ورداسىنا، كيەلى شاڭىراققا قادام باسقان ساتتەن باستاپ-اق جوق بولادى. سەبەبى جاڭا تانىس بولعان ۇزەڭگىلەس دوستاردىڭ، ءبىلىم دەپ ازۋىن ايعا بىلەگەن جالىندى جاستاردىڭ ورتاسىندا تەك قانا جاڭا دەم پايدا بولعانداي ەدى. قازۇۋ بولاشاققا نىق قادام باستىرار سانالى عۇمىردىڭ ءبىر ايعاعى ىسپەتتى. سەزىم مەن كوڭىلدىڭ جەتەگىمەن كەتۋگە دە بولماس، ايتايىن دەگەنىم، ەلىمىزدىڭ باستى وقۋ ورنى مەنىڭ ءبىلىم الۋعا دەگەن پوتەنسيالىمدى ورلەتكەندەي بولدى. ونىڭ سەبەبى دە از ەمەس. ساناپ كورەيىك...

قارا شاڭىراقتىڭ قولاستىنا جيىلعان جيىرما مىڭعا جۋىق ىزدەنۋشىنىڭ تالابىن تاۋعا قاراي دومالاتار جاعدايدىڭ بارلىعى دا جاسالعان. ارينە مۇنى عاجايىپ الەم دەسە دە بولار، ەڭ باستىسى تالاي بالا كىراننىڭ قاناتىن ۇشتاپ، قياعا سامعاتقان ستۋدەنتتەر سارايى، تاريحى تەرىندە جاتقان قازۇۋ-دى ءبىر ساتكە كوز الدىنا ەلەستەتەتىن جەكە مۇراجاي، زامان تالابىنا ساي جابدىقتالعان ءۇش ءجۇز ادامدىق ينتەرنەت ورتالىعى تاعىسىن تاعىلار، ايتا بەرسەڭ تولىپ جاتىر.

قازۇۋ-عا كەلگەن ءار ستۋدەنتتى دارىندى ءارى ءبىلىمدى دەپ ايتا المايسىز. جاڭا وقۋ جىلىن جاڭا تانىستارمەن باستاعانىممەن، كەيىن كەلە كىمنىڭ كىم ەكەنى ايقىندالا باستادى، ءتىپتى وقۋ ۇردىسىنە ىلەسە الماي، شەتتەپ قالىپ اۋلىنا قايتىپ جاتقاندار دا بولدى. مەنى تولعاندىرعان تاعى ءبىر ءجايت: ءوزىمىز قازاق بولىمىندە وقىپ جۇرسەك تە، كوپتەگەن ساباق ماتەريالدارىن تەك ورىس ءتىلدى كىتاپتاردان عانا تابامىز، قازاقشا كىتاپ قورى جەتىسپەيدى، بار بولسا دا، ۇلتتىق كىتاپحانادا ىزدەۋگەت تۋرا كەلەدى. مەنىڭ باستى ءۇمىتىم مىناۋ سالىنىپ جاتقان ميليونداعان كىتاپ قورى بار ەلەكتروندى كىتاپحانا كوڭىلىمىزدى توق ەتەر دەگەن ويدامىن.

قالاي دەسەم دە، قازۇۋ-مەن ماقتانامىن، ءتىپتى حالىققا تانىمال بولىپ جۇرگەن ازاماتتاردى ءبىزدىڭ تۇلەگىمز دەپ ەستىگەندە، كوڭىلىم كوتەرىلىپ، ءبىر مارقايىپ قالاتىنىم بار. مەن سول تۇلعالاردىڭ وتىرعان اۋديتورياسىندا وتىرىپ، سول كىسىلەرگە ساباق بەرگەن ۇستازداردان ءتالىم الىپ جۇرگەنىم ماعان جىگەر بەرەدى. الەمدىك دارەجەدەگى ءبىلىم مەن سپورت سايىستارىندا توپ جارىپ جۇرگەن قازۇۋ ستۋدەنتتەرى سول اعا بۋىننىڭ جالعاسى شىعار، مەن دە سول ۇردىسكە ىلەسە السام، جەتىلگەنىم جانە سامعاپ ۇشا الاتىنداي بولعانىم دەپ سەنەمىن.

---