الماتىدا وقۋشىلاردىڭ تاماقتانۋىنىڭ ءبىرىڭعاي ستاندارتى ەنگىزىلەدى
الماتىدا جاڭا وقۋ جىلىنان باستاپ، وقۋشىلاردىڭ تاماقتانۋ جۇيەسىنىڭ جاڭا ستاندارتى ەنگىزىلەدى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگ بارىسىندا ايتىلدى.
«ءبىرىنشى رەت قازاقستان تەرريتورياسىندا الماتىدا وقۋشىلاردىڭ دۇرىس تاماقتانۋىنىڭ ءبىرىڭعاي ستاندارتى ەنگىزىلەدى. 4 اپتالىق ءمازىر قازاقستان تاعامتانۋ اكادەمياسىمەن، ۇلتتىق دەنساۋلىق ورتالىعىنىڭ ماماندارىنىڭ نۇقساۋلىعىمەن جاسالدى»، - دەدى قالالىق قوعامدىق دەنساۋلىقتى ساقتاۋ دەپارتامەنتىنىڭ باسشىسى ايزات مولداقاسىموۆا.
ونىڭ ايتۋىنشا، بۇل وقۋشىلاردىڭ دەنساۋلىعىن نىعايتۋعا، يممۋنيتەتىن كۇشەيتۋگە، دۇرىس تاماقتانۋ رەجيمىن قالىپتاستىرۋعا باعىتتالعان شارا.
ەندى قالانىڭ بارلىق مەكتەپتەرىندە تاماقتانۋ قىزمەتىن اتقاراتىن كاسىپورىنداردىڭ بارلىعى تاعامدى ءبىر ستاندارت بويىنشا دايىندايتىن بولادى.
ءبىرىڭعاي ستاندارت بويىنشا 7-10 جاستاعى بالالار ساباق مەزگىلىندە - 840 ككال، 11-14 جاستاعى بالالار - 951 ككال، 15-18 جاستاعى بالالار 1020 ككال تاعام تۇتىناتىن بولادى.
You Might Also Like
