InfoHub Logo

كۇندەردىڭ كۇنىندە ءامىر تەمىر ەل بيلەۋشى بولىپ، جورىققا شىعا باستاعان كەزىندە قوجا احمەت ياساۋي تۇسىندە ايان بەرىپتى. «سەن مەنىڭ باسىما عيمارات تۇرعىز، مەنىڭ ءارۋاعىم سەنى دەمەپ جۇرەدى»، — دەپتى. سوندا ءامىر تەمىر: «مەن سەنى قايدان تابامىن؟» — دەگەندە، — «جولدى مەن ءوزىم كورسەتىپ وتىرامىن»، — دەگەن ەكەن. سونىمەن [تاۋەكەلگە] بەل بايلاپ، ءامىر تەمىر قوجا احمەتتى ىزدەپ شىعىپتى. ۇزاق ءجۇرىپ، تۇركىستان شاھارىنا كەلگەندە، تۇسىندە ايان بەرىپ، جاتقان جەرىن ايتادى. تاڭەرتەڭ ەرتەرەك بارىپ قاراسا، شىنىندا دا كىشكەنە عانا مازارات تۇر ەكەن. قۇران وقىپ، ەرتەسىنە ءىس باستاپتى. كەشكە دەيىن ءبىراز دۋال قالاپ قويعان ەكەن، تاڭەرتەڭ بارسا، بۇزىلىپ جاتقانىن كورەدى. باسىنا قاراۋىل قويادى. تاڭ الدىندا ۇيىقتاپ كەتىپ، كىمنىڭ بۇزعانىن بىلمەي قالا بەرەدى. بولماعان سوڭ ءۇشىنشى كۇنى ءوزى بارادى. تاڭ الدىندا ۇيقى قىسادى، ۇيقىعا بوي الدىرا بەرگەن سوڭ قولىن قانجارمەن ءتىلىپ جىبەرىپ، ۇيىقتاماۋ ءۇشىن تۇز سەۋىپ قويادى. سونىمەن ءبىر كەزدە قاراسا، ۇلكەن وگىز كەلىپ، دۋالدى مايقانداپ جاتىر ەكەن. نە ىستەرىن بىلمەگەن ءامىر تەمىر ويلانىپ قالادى. تۇسىندە قوجا احمەت تاعى دا ايان بەرىپ، بىلاي دەپتى: «ول كوك وگىز ارىستان باپتىڭ ارۋاعى، ساعان قاپالانىپ بۇزىپ تاستاپ جاتىر. ول — مەنىڭ ۇستازىم، سەن ونىڭ ارۋاعىن اتتاپ ءوتتىڭ، سول ءۇشىن الدىمەن ونىڭ باسىنا عيمارات تۇرعىز. سودان سوڭ ماعان قايتا كەلەرسىڭ»، — دەپتى. «مەن ونى قالاي تابامىن؟» — دەگەندە، — «مەن ءوزىم جول سىلتەپ وتىرامىن»، — دەپ جاۋاپ بەرەدى.

سونىمەن ەرتە تۇرىپ، وتىرارعا بەت الادى. كەشكە سوندا جەتىپ، ۇيىقتاپ جاتقاندا، تۇسىندە ايان بەرىپ، جاتقان جەرىن كورسەتەدى. تاڭ اتا، ەرتە باسىنا بارىپ، قۇران وقىپ، قۇرىلىستى سالۋعا كىرىسەدى. باستالعان قۇرىلىس ويداعىداي اياقتالعان سوڭ، دەمالىپ جاتقاندا جانە تۇسىندە ايان
بەرىپ: «مىنە، ەندى ءساتتى بولدى، ەندى كەلىپ مەنىڭ باسىما عيماراتىڭدى سالدىرا بەر! — دەيدى. سونىمەن تۇركىستانعا قايتا كەلىپ، قوجا احمەت مەشىتىن سالۋدى باستاعان ەكەن. ءبىراق قۇرىلىس جۇمىستارى جاقسى ءجۇرىپ جاتقاندا، سامارقاندا باسقا ءبىر قاۋىرت جۇمىس شىعىپ، قۇرىلىس سالىپ جاتقان ۇستا سول جاققا كەتىپ، كوپتەگەن سەبەپتەرمەن قايتا ورالماعان-دى. سودان عيمارات قۇرىلىسى تولىق بىتپەي قالادى. سول كەزدەن باستاپ ءامىر تەمىر جورىققا شىعار كەزىندە ۇنەمى تۇركىستانعا كەلىپ، احمەت ءياساۋيدىڭ باسىنا زيارات ەتىپ، اس بەرىپ، تايقازاننان ءدام تاتۋ ادەتكە اينالعان ەكەن. سونداي ءبىر ساپارمەن كەلگەندە، قاتتى سىرقاتتانىپ، وسى جەردە قايتىس بولعان دەسەدى. ونىڭ ايتقان ءوز وسيەتى بويىنشا، ول سامارقانعا قايتۋى كەرەك ەدى. ءبىراق حالىق اراسىندا شۋ شىقپاسىن دەپ، بىلدىرمەي، «ءامىر ناۋقاس» دەپ، جول ءجۇرىپ كەتەدى. سول جولدا وتىراردان بەرى جايلاسقان تەمىر ستانساسىنا كەلگەندە، ءبىر دەمالىس جاساعان كورىنەدى. سونىڭ قۇرمەتىنە «تەمىر» اتالىپ كەتىپتى. سودان تەمىرلان دەگەن جەرگە بارعاندا، حالىق ءامىر تەمىردىڭ قايتىس بولعانىن ءبىلىپ قويىپ، سىر اشىلعان كورىنەدى. مىنە «تەمىرلان» اتالۋى سودان شىققان ەكەن دەپ ەل اڭىز ەتىسەدى.

---