InfoHub Logo

ەرتە، ەرتە، ەرتەدە ەتەك جەڭىن سۇيرەتكەن ەسەنباي دەگەن شال بولىپتى. ەسەنباي، جاڭادان العان توقالى، اسقان سۇلۋ قىزى-ۇشەۋ عانا تۇرادى ەكەن. شالدىڭ سۇلۋ قىزىنا جىگىتتەر قىزىعىپ، كوز سالىپ جۇرسە كەرەك.

ءبىر كۇنى ايلالى اسان دەگەن جىگىت شالدىڭ ۇيىنە كەلەدى. شال ونى ۇيىنە كىرگىزبەي دالادا ءجۇرىپ الادى. سول كەزدە، ولگەن بىرەۋدى جەرلەۋگە اكەتىپ بارا جاتقان ادامدارعا قاراپ اسان:

— اناۋ ادام ولگەن كىسى مە؟ الدە ءتىرى كىسى مە؟ – دەپ سۇرايدى ەسەنبايدان.

— ءتىرى ادامدى كورگە اپارۋشى ما ەدى، – دەپ ۇرسادى شال.

         اسان تاعى دا:

— مىنا ەگىننىڭ يەسى بار ما، الدە يەسىز ەگىن بە؟ – دەيدى.

         ەسەنباي ودان ءارى اشۋلانىپ:

— سەن ءوزىڭ اقىماقپىسىڭ، يەسىز ەگىن شىعۋشى ما ەدى، – دەيدى.

         جىگىت تاعى دا شالدان:

         — ۇلكەن كىسى توسەگىڭىزگە نەشە كىسى جاتاسىزدار؟ – دەپ سۇرايدى.

         — نەشەۋىڭ نە، توقالىم ەكەۋىمىز – دەپ اقىرادى دا ءجۇرىپ كەتەدى. اسان ارتىنان قالماي تاعى دا:

         — قىزىڭىز شەشەسى ولگەن جەتىم ەكەن. ۇنەمى جىلاپ وتىرا ما؟ – دەيدى.

         شال:

         — جىلامايدى، كۇرسىنىپ وتىرادى، – دەپ كەتە بەرەدى. ىزالانعان شال، ۇيىنە كەلىپ توقالى مەن قىزىنا:

         — اقىماق جىگىتكە كەزىكتىم، – دەپ ونىڭ سۇراعانى مەن قايتارعان جاۋابىن ايتادى. سوندا قىزى:

         — اكە، بارىنە تەرىس جاۋاپ بەرىپسىز. انا كىسى ءتىرى كىسى مە، ءولى كىسى مە دەگەنى ارتىندا بالاسى بار ما، جوق پا دەگەنى ەكەن. اناۋ ەگىننىڭ يەسى بار ما، جوق پا دەگەنى-كۇتىمى جوق ەگىننىڭ جارىمى ءوسىپ، جارىمى وسپەگەنىن سۇراعانى. توسەگىڭىزگە نەشە كىسى جاتاسىزدار دەگەنىنە-كۇندىز ەكەۋ، تۇندە تورتەۋ دەمەپسىز. ويتكەنى، تۇندە بۇرىڭعى كۇيەۋىن، ءسىز كەمپىرىڭىزدى ويلايسىزدار عوي. قىزىم كۇرسىنىپ وتىرادى دەگەنشە-سىلكىنىپ وتىرادى دەپ ايتپاعان ەكەنسىز، – دەيدى. ەسەنباي ويلانىپ بارىپ، ول اقىماق ەمەس، اقىلدى جىگىت ەكەن، بارىپ جاۋابىن بەرەيىن، – دەپ جىگىتكە كەلەدى.

         اسان قىزدىڭ قايتارعان جاۋابىنان، سىلكىنىپ وتىرامىن دەگەنى بوي تۇزەپ وتىرامىن دەگەنىن تۇسىنەدى دە شالعا:

— ۇيىڭىزگە بارىپ قوناق بولۋعا بولا ما؟ –دەيدى.

         سوندا شال:

         — ساعان ءدامدى تاماق ىستەپ بەرەتىن ءوز كەمپىرىم ولگەن. توقالىم ءدامدى تاماق ىستەي المايدى، ال قىزىم قازان وشاققا ارالاسپايدى، – دەيدى. سوندا جىگىت:

         — مەن قىزىڭىزدىڭ سىلكىنگەنىنە تويامىن، – دەيدى. قىزدىڭ سىلكىنگەنىنە تويامىن دەگەنىن ەسەكەڭ جەتىم قىزدى مۇسىركەگەن ەكەن عوي دەپ ويلايدى دا جىگىتتى ۇيىنە ەرتىپ بارادى.

         ءبىرىن-بىرى وسىلاي كورگەن جىگىت پەن قىز بۇدان كەيىن ءوزارا ۇناتىسىپ ارمانىنا جەتىپ، قوسىلىپتى-مىس.

---