InfoHub Logo

وتە ەرتە كەزدە ەسىرىك دەگەن ەل بولىپتى. ول ەلدىڭ اۋلەكي دەگەن ءبيى بولىپتى. اۋلەكي بي ەلدەگى يگى جاقسىلاردى جيىپ، يسلام ءدىنى شىققانىنا جار شاشىپ، حالقىنا ورازا ۇستاۋدى، ناماز وقىتۋدىڭ امالىن ىزدەستىرەدى. جيىلعان ادامنىڭ ەشبىرى اقىل ايتپاعان سوڭ، بەس مىقتى جىگىتتى سايلاپ الىپ، ەلىنەن جەتى ءجۇز ءدىلدا جيىپ بەرەدى دە:

            — وسىعان ورازا، ناماز تاۋىپ ساتىپ اكەلىڭدەر. ەگەر تاۋىپ اكەلمەسەڭدەر، باستارىڭدى الامىن،– دەپ بۇيىرادى. ورازا- ناماز ىزدەگەن اۋلەكي ءبيدىڭ بەس جىگىتى اي ءجۇرىپ ارىپ، جىل ءجۇرىپ جۇدەپ، باتىستاعى ءبىر ەلگە كەلەدى. ەل ىشىنە كەلىپ، وزدەرىن تۇگەندەسە بىرەۋى جوق. قالاي ساناسا دا تورتەۋ بولىپ شىعادى. جىگىتتەر وسىلاي  جوعىن ىزدەپ تۇرعاندا سول ەلدىڭ تۇيەشى شالى مۇرال قاستارىنا كەلىپ، نەگە ابىگەر بولىپ جاتقاندارىن سۇرايدى. جىگىتتەردىڭ بىرەۋى ەلىنىڭ ءبيى اۋلەكي جەتى ءجۇز ءدىلدا بەرىپ، ورازا ناماز تاۋىپ اكەل – دەپ جۇمساعانىن، ەگەر تاپپاي بارسا باستارىن الاتىندىعىن ايتىپ، ەلدەن شىققاندا بەسەۋ ەدىك، جول-جونەكەي ءبىرىمىز، جوعالدى، سوعان ابىگەر بولىپ جاتىرمىز – دەيدى. قۋ شال بۇلاردىڭ ساسىپ تۇرعانىن ءبىلىپ:

         — جوق ادامدارىڭدى تاۋىپ بەرەيىن، اقىسىنا نە بەرەسىڭدەر؟– دەيدى. جىگىتتەر:

         — ويباي، اعاتاي، ەلۋ ءدىلدا الىڭىز – دەيدى.  مۇرال جىگىتتەردى اتتارىنان ءتۇسىرىپ، بولەك بايلاتادى. سوسىن بىرىنە ساناتسا، اتتارى بەسەۋ بولىپ شىعادى. ەندى اتتارىڭا مىنىڭدەر – دەيدى. جىگىتتەر سوندا، وزدەرىنىڭ تۇگەل ەكەندىگىن بىلەدى.

         بۇل ءبىر بىلگىش ادام ەكەن، وسىعان ورازا، ناماز تاپقىزىپ الايىق، – دەپ ويلايدى جىگىتتەر.

         — ءسىز اۋليە ادام ەكەنسىز، ءبىزدىڭ قالعان ءدىلدامىزدى الىپ، ورازا، ناماز تاۋىپ بەرىڭىز – دەيدى. سوندا مۇرال:

         — مەنىڭ تۇيەمدى ءۇش كۇن باعا تۇرىڭدار، سەندەرگە ورازا، ناماز تاۋىپ كەلەمىن – دەپ كۇنشىلىك جەردەگى ارا باققان كىسىگە كەلىپ، ەكى شەلەك ارانى بالىمەن ساتىپ الادى. ءىشى گۋ-گۋ ەتكەن ەكى شەلەك ارانى مۇرال جىگىتتەرگە الىپ كەلىپ، ءبىرىن ورازا، ءبىرىن ناماز،– دەپ بەرەدى دە ءدىلدالارىنىڭ ءبارىن الادى. جىگىتتەر:

         — مۇنى قالاي پايدالانامىز، – دەيدى. سوندا مۇرال:

         — ەلدەرىڭە اپارىپ، التى قانات اق وردانى تىگىپ، ەلىڭنىڭ ورازا، نامازعا سيىناتىندارىن ورداعا جيناپ، ەسىگى مەن تۇندىگىن اشىلمايتىنداي ەتىپ بەكىتىڭدەر. سوسىن ورازا، نامازدى ۇعاتىن بولاسىڭدار، – دەيدى. ورازا، ناماز تاپقان بەس جىگىت اۋلەكي بيگە كەلىپ ەكى شەلەكتى تاپسىرادى. اۋلەكي بي تىڭداپ كورسە، شىنىندا دا ورازا، ناماز كۇبىرلەگەن سياقتى بولادى. سوسىن ەلىنىڭ يگى-جاقسىلارىن جيناپ، ۇلكەن اق وردانىڭ ىشىنە ءبارىن جالاڭاش كىرگىزىپ، ەسىگى مەن تۇندىگىن جاپتىرىپ الادى دا، ەكى شەلەكتىڭ اۋزىن قاتار اشادى. نەشە كۇننەن بەرى اشىققان ارالار يگى جاقسى، ءۋازىر، بايلار مەن بيلەردىڭ جالاڭاش ەتتەرىنە قادالىپ شاعا باستايدى.  وتىرعاندار  توزە الماي، وردانىڭ بىت-شىتىن شىعارىپ قاشىپ شىعادى. ىسىپ-كەۋىپ دالاعا قاشىپ شىققان بايلار مەن ۋازىرلەر وزدەرىن تۇگەندەسە، اۋلەكي بي جوق بولىپ شىعادى. اۋلەكي ءبيدى ىزدەپ سۇراستىرسا، ءبىر قويشى:

         — ەكى ناماز سوڭىندا، ەرگەنشەگى موينىندا، سايدا قۋالاپ كەتىپ بارا جاتقان – دەيدى. سويتسە ەسىكتەن ەڭ الدىمەن شىعامىن دەپ ۇمتىلعان اۋلەكي ءبيدىڭ موينىنا ەرگەنشەك ءىلىنىپ، اشىققان ارا ارتىنان قالماي، ءبىر سايعا كەلگەندە تالىپ جىعىلعان جەرىنەن ۋازىرلەر تاۋىپ الادى. جىعىلعان ءبيدى تۇرعىزعان  ۋازىرلەرى:

         — ەسىرىك دەگەن ەلىمنىڭ، اۋلەكي ءبيى دەگەن بايقۇسىم-اي،– دەپ ەلىنە الىپ قايتىپتى.

---