اڭشىنىڭ اڭگىمەسى
اڭشى التاي تاۋىندا ان اۋلاپ جۇرەدى. اڭشى ءبىر شوقى تاستىڭ باسىنا شىقسا، استىندا ءبىر توپ تاۋەشكى جۋساپ تۇرادى. اڭشى تاۋەشكىلەردى اتۋعا قيماي قاراپ وتىرىپ ەشكىلەرگە بۇقپانتايلاپ كەلە جاتقان ايۋدى كورەدى. اڭشى نە بولارىن كورمەككە اڭدىپ وتىرادى. ايۋ تاياپ كەلىپ ءبىر ۇلكەن تاستى الادى دا، تاۋەشكىلەرگە قاراي اتىپ جىبەرەدى. ايۋدىڭ تاسى ءبىر ەشكىنى جۇلىپ تۇسەدى. ايۋ قارباڭ – قۇرباڭ ەتىپ تاستان جۇگىرىپ ءتۇسىپ، ولگەن تاۋەشكىنى ادەتى بويىنشا كوتەرىپ جەرگە ءبىر سوعىپ جەي باستايدى. اڭشى ايۋدى اتۋعا وقتالا بەرىپ، قارسى بەتتەن باۋىرلاي جىلجىپ كەلە جاتقان بورىگە كوزى تۇسەدى. قاسقىر باسپالاي ايۋعا جاقىنداي بەرەدى. ايۋعا بەس – التى قادامداي قالعاندا قاسقىر سەرپىلە سەكىرىپ ايۋدىڭ استىنان وتە شىعادى. ەتتىڭ قىزىعىنا تۇسكەن ايۋ ارس ەتىپ ءوز باۋىرىن ءوزى قاۋىپ الادى.
اڭشىنىڭ كوزىنە الىستان ايۋدىڭ باۋىرىنان بىردەمەلەردى الىپ تاستاپ جاتقانى كورىنەدى.
سونشا بولماي-اق ايۋ ءوز ولجاسىن قۇشا جاتا كەتەدى. الدەن ۋاقىتتان كەيىن قاسقىر قايتادان كەلەدى. بۇل جولى قاسقىر قاسىنا ايۋ قارسىلىق كورسەتپەي جاتا بەرەدى. اڭشى ايۋعا ءبىر سۇمدىقتىڭ بولعانىن ءبىلىپ قاسقىردى اتىپ تۇسىرەدى. اڭشى كەلسە ايۋ الدەقاشان ءولىپ قالىپتى. قاسقىر شاپقان كەزدە ونىڭ جۇقا شابىن جارىپ كەتىپتى. دۇلەي ايۋ ءوزىنىڭ شابىنان شىعىپ تۇرعان ىشەك-قارنىن ءوزى سۋىرىپ الىپتى دا ءولىم قاۋىپتى.
****
تاعى بىردە اڭشى اڭ اۋلاي كەلە جاتىپ، مىنا ءبىر قىزىقتى كورىپتى. جايىلا-جايىلا ىنىنەن ۇزاپ كەتكەن سۋىردى جەم ەتۋگە بايقاۋسىز اڭدىپ كەلە جاتقان قاسقىردى كورەدى.
سۋىرعا ابدەن تاقاپ قالعان ءبورى كەنەت ءوز الدىنا ىرىلداپ سەكىرىپ الا جونەلەدى. سۋىر العاشقى كەزىككەن ىنگە ەنىپ كەتەدى. ال قاسقىر وزىنەن ءوزى قارعىپ شورشىپ ارپالىسىپ ءجۇر. مۇنى كورگەن اڭشى شوشي باستايدى. اڭشىعا ءبورىنىڭ القىمىندا ءبىر نارسە جابىسىپ جۇرگەن قۇساپ كورىنەدى.
قاسقىر ءبىراز تۋلاپ بارىپ قۇلاپ تۇسەدى. اڭشى بايقاي-بايقاي قاسىنا كەلسە، قاسەكەڭ ءولىپ جاتىر. تاماعىنان قان جوسىپ جاتىر دا اناداي جەردە شاقار ساسىقكۇزەن قاراپ تۇر.
قاسقىر العاش سۋىردى كورگەندە، قاسقىردى ساسىقكۇزەن كورىپتى. ەسىل دەرتى سۋىر بوپ كەلە جاتقان ءبورىنىڭ القىمىنا ساسىقكۇزەننىڭ جابىسا قالعانىن دا ءا، دەگەندە اڭعارماي قالىپتى.
ال اڭشىنىڭ مەرگەن وعىنان ساسىقكۇزەن دە ءمۇلت كەتپەي مەرت بولىپتى.
You Might Also Like
-
ەرتە، ەرتە، ەرتەدە ءبىر قاريانىڭ كەلىنى بولىپتى. ول ءوزى وتە جۇمساۋىق ەكەن، ماڭايىنداعى اۋىل ءۇي ادامدارىن تالعاۋسىز جۇمساي بەرىپتى. كورشىلەرى ونى سوندىقتان «جۇمساۋىق كەلىن» دەپ اتاپ كەتىپتى.
-
ەرتە زاماندا بايلىعى جاننان اسقان باي بولىپتى. ول كۇندەردە ءبىر كۇنى ناۋقاستانىپ ءولىم حالىندە جاتىپ، مۇراتبەك دەگەن جالعىز ۇلىن شاقىرىپ الىپتى دا:
