اقساق قۇلا
ەرتەدە ءبىر ساراڭ باي بولىپتى. ونىڭ ادام بالاسىندا جوق جالعىز قۇلا تۇلپارى بار ەكەن. باي قۇلا تۇلپارىنىڭ تۇقىمىن ءوسىرىپ، داڭقىن اسىرا تۇسكىسى كەلىپتى. ءسويتىپ، قۇلا تۇلپاردىڭ قاسىنا ءبىر بيەنى قوسىپ، جويقىن تەڭىزدىڭ ورتاسىنداعى ادام اياعى باسپايتىن يەن ارالعا الىپ بارىپ تاستاپتى. تۇلپار قاسقىرعا دا، ادامعا دا الدىرمايتىن تارپاڭ ەكەن.
ارادا ءبىراز جىلدار وتەدى. تۇلپاردىڭ تۇقىمى كوبەيىپ، ءۇيىر-ۇيىر جىلقى بولىپتى. جىلقىسىنىڭ قانشا ەكەنىن كورگىسى كەلگەن باي ارالعا كەلسە، شاقار تۇلپار ماڭىنا جولاتپاي قويىپتى. بۇعان قىزىققان باي ۇستاماق بولعان كەزدە، تۇلپار تەۋىپ ءولتىرىپتى. كەرەمەت تۇلپارلار تۇقىمىنىڭ ارالدا ەكەنىن ەستىگەن ۇرىلار قۇلا تۇلپاردى ۇيىرىمەن ايداپ كەتۋدى كوزدەپ، ارالعا بارىپتى.
اۋەلدەن تارپاڭ، ونىڭ ۇستىنە ۇزاق جىل بويى ادام كورمەي، تاعى بوپ كەتكەن قۇلا تۇلپار ۇرىلاردى كورە سالا قارسى شابادى. الدىنا كەلگەنىن تىستەپ، ارتىنا شىققانىن تەۋىپ، ماڭىنا جولاتپايدى.
قۇلا تۇلپارمەن الىسىپ، ابدەن قالجىراعان ۇرىلار الدىرمايتىنىنا كوزدەرى جەتكەن سوڭ، ساداقپەن اتادى. ساداق وعى تۇلپاردىڭ اياعىنا ءتيىپ، اقساتادى. جارالانعان اقساق قۇلا بۇرىنعىدان بەتەر قۇتىرادى. ۇرىلار توبىنا قاسقىرداي ءتيىپ، تاپتاي باستايدى. امالى تاۋسىلعان ۇرىلار ءبىر شۇڭقىرعا ءتۇسىپ، جان ساۋعالاماق بولادى.
اقساق قۇلا مۇنى كورگەن سوڭ، وزىنەن وربىگەن ءۇيىر-ۇيىر تۇقىمىن ىلەستىرىپ كەلەدى دە قاراقشىلاردى تاپتاپ وتە شىعادى. وڭاي ولجا تاپپاق بولعان ۇرىلار جانشىلىپ قالىپتى.
ءسويتىپ، قۇلا تۇلپار ۇيىرىمەن جابايىلانىپ كەتىپتى. ودان كەيىن جالپاق دالاعا تاراپتى. سول جابايى جىلقىنىڭ تۇقىمى قۇلان ەكەن.
You Might Also Like
-
بۇرىنعى وتكەن زاماندا ءبىر جالماۋىز پاتشا بولىپتى. ول ۇشقان قۇستى ۇستاپ الىپ، شەتىنەن جەي بەرەدى ەكەن. قۇستاردىڭ كوبىن تۇمسىعىن تەسىپ، جىپكە ءتىزىپ تاستايدى. ءسويتىپ، كوكتەگى قۇستىڭ ءبارىن اۋلاپ، ۇستاپ...
-
بىردە تىمىسكىلەنە سۇمەڭدەپ كەلە جاتقان تۇلكىگە توعايدى شارلاپ جۇرگەن جولبارىس كەزدەسىپتى. سونان سوڭ ەكەۋى جولداس بولىپ، ساپار شەگىپتى. كەشكە تامان ءبىر كولدىڭ جاعاسىنا كەلىپ، سول ارادا تۇنەمەك بولىپ...
