اقشولپان (ءىى نۇسقا)
بىردە مامەن كۇيشى جولاۋشىلاپ كەلە جاتىپ، شولپان اتتى قىزدىڭ ۇزاتىلۋ تويىنا تاپ بولادى. شولپان اتىنا زاتى ساي، توڭىرەگىنە اقىل كوركىمەن ۇناعان اياۋلى ارۋ بولسا كەرەك.
سونسوڭ دا ەل-جۇرتقا ەركىن، ەركە بولىپ بوي جەتىپ ەدى دەيدى. توي ۇستىندە، ءبىر جاعى سول ەركەلىگى بار، ءبىر جاعى قيماستىق سەزىمى بار، شولپان قىز توڭىرەگىندەگى قۇربى-قۇرداستارىنا ءبىر بازىنا ايتادى: «ءقادىرلى كوز كورگەن قۇربى-قۇرداستارىم، قىز داۋرەنى قىزعالداقتاي كەلتە ەكەن، باۋىر باسىپ، بوي جەتكەن ەل-جۇرتىمدى قيماي، كوڭىلىم الابۇرتىپ وتىر. مەنىڭ وسى ءبىر كوڭىل-كۇيىمدى كۇي تىلىندە سويلەتەر كىم بار؟!» — دەپتى.
ويىن-تويدىڭ ونەرپازسىز بولمايتىنى قاشانعى ادەتى ەمەس پە، سول جەردە اققۋ مويىن دومبىرا قولدان-قولعا كوشىپ، نەبىر اسەم كۇي كۇمبىرلەي تارتىلادى. ءبىراق بۇل كۇيلەردىڭ ەشقايسىسى شولپاننىڭ كوڭىلىنەن شىقپايدى. ءبارى دە بۇرىن تالاي تارتىلىپ، تالاي ەستىلىپ جۇرگەن كۇي بولسا كەرەك. شولپاننىڭ نازىك جۇرەگى جاڭا ساز، تىڭ سارىن تىلەپ، قازىرگى كوڭىل-كۇيىنە ۇندەسەر كۇي ىزدەيدى.
وسى كەزدە دومبىراعا مامەن قول سوزادى. وتىرعاندار العاشقىدا كولدەنەڭدى كوك اتتىنىڭ ۇيرەنشىكتى قوناقكادەسى بولار دەپ ءمان بەرە قويمايدى. ءبىراق مامەن دومبىرانى باپتاپ الىپ، لەكىتە قاعىپ جونەلگەندە ءۇيدىڭ ءىشى سىلتىدەي تىنادى. كۇي سۇلۋ سازىنا قوسا مۇڭدى سىرىمەن جان تەربەيدى. سول قالپىندا قىزۋى باسىلماستان لەكىلدەپ كەلىپ تىنادى. شولپان قىزدىڭ جانارىنا تاڭعى شىقتاي مولدىرەپ جاس ىركىلەدى. ريزاشىلىعىنىڭ بەلگىسىندەي، شولپان ورنىنان تۇرىپ، ءوز قولىمەن مامەننىڭ يىعىنا شاپان جابادى.
وسى جولى تارتىلعان كۇي ەل ىشىنە «اقشولپان» دەگەن اتپەن تاراعان ەكەن.
You Might Also Like
-
ەل اراسىندا ءقاراتوس اتانعان ايماعامبەت دەگەن اتاقتى دومبىراشى بولىپتى. ءقاراتوستىڭ جاسى قازانعاپتان ۇلكەن ەكەن. قازانعاپ قاراتوسپەن كەزدەسىپ، كۇي تارتىسادى. ءبىراق ءبىرىن-بىرى جەڭە المايدى. قازانعاپتى...
-
دايراباي مەن كوبەن دەگەن جاماعايىن بايدىڭ اراسى جاقسى بولماپتى دەيدى. مۇنداي قىربايلىققا سەبەپشى كوبەننىڭ شولجىڭ بولىپ وسكەن جالعىز بالاسى بولسا كەرەك. كوبەن باي وزىمەن يىقتاس قانجىعالى بايىنىڭ اجا...
