ارقالى جىردىڭ تۇعىرى
1. سۇراق. تاۋەلسىز قازاقستاندى بولجاعان، الىپ يمپەريانىڭ بۇعاۋىنا سىيماعان نازىك تە اساۋ جۇمەكەن تۋرالى وقىرماندارعا نە ايتار ەدىڭىز؟
جاۋاپ: جۇمەكەن ادەبيەت مايدانىنا وتە ەرتە كەلگەن ادام، ول ولەڭدى جاستايىنان جازعان اقىن. ول مەكتەپ قابىرعاسىندا جۇرگەن كەزىندە ەلۋىنشى جىلداردىڭ باسىنان باستاپ جازدى. قازاقتىڭ جەرىن، رەسپۋبليكانىڭ سولتۇستىك وبلىستاردىڭ اۋماعىن بولشەكتەۋگە نيەتتەنگەن يمپەريالىق پيعىل سوناۋ تىڭ يگەرۋ ناۋقانىن باستاعان جىلداردا جاپ-جاس جۇمەكەن باسىن قاتەرگە تىگىپ، ەلىن-جەرىن قالامىمەن قورعاعان باتىر اقىن. بۇرىنعى اتا-بابالارىمىز جەرىن مىڭداعان اسكەرمەن، قارۋمەن قورعاسا، جۇمەكەن قالامىمەن قورعادى.
جۇمەكەننىڭ «مەنىڭ قازاقستانىمى» قازاق ۇلتىنىڭ جۇرەك تەبىرەنىسىن سومداعان شىنايى تۋىندى ەكەنىن ۋاقىت دالەلدەپ وتىر. بۇل اقىننىڭ كوكەيكەستى ارمانى — بولاشاق قازاق ەلىنىڭ تاۋەلسىزدىگى جايىندا ارمانداۋعا عانا، ءتۇس كورۋگە عانا بولاتىن كەزەڭدە جازىلعان ولەڭ. ول كەزدە تاۋەلسىزدىك جايىندا جاق اشىپ، ءۇن شىعارۋ مۇمكىن ەمەس ەدى.
الىپ يمپەريانىڭ بۇعاۋىنا سىيماۋى — كەڭەستىك يدەيانىڭ شارىقتاپ تۇرعان كەزىندە «مەنىڭ — ەلىم، مەنىڭ — جەرىم، قازاعىم» دەپ سول كەزدىڭ وزىندە اشىقتان-اشىق جىگەرلى جىر جازۋى، ونىڭ ەگەمەندىك العان ەلىمىزدىڭ ءانۇرانىنا اينالۋى ەدى.
2. سۇراق. جۇمەكەن ۇلى تۇلعاعا قالاي اينالدى.
جاۋاپ: جالپى، جۇمەكەنگە اقىندىق دارىن سۇيەكتەن دارىعان. اقىندىق قاسيەت ۇرپاقتان-ۇرپاققا بەرىلگەن تۋما تالانت. جۇمەكەننىڭ بەسىنشى اتاسى قارتپامبەت تاريحتا اتى قالعان اتاقتى جىراۋ. ءوز اتاسى ناجىمەدەننىڭ سوعىستان ورالماي قالعان جالعىز ۇلى سابىرەدەنگە ارنالعان 40 شۋماق جوقتاۋى ەل اۋزىندا جاتقا ايتىلادى. ال ءوز اكەسى سابىرەدەننىڭ مايداننان ولەڭمەن جازعان حاتتارى، سوعىسقا كەتكەندە ارتىندا قوڭىر بىلعارىمەن قاپتالعان ەكى داپتەر — اراب تىلىندە جازىلعان ولەڭدەرى قالعان.
1985 جىلى جۇمەكەننىڭ 50 جىلدىعىنا بايلانىستى وتەباي قاناحين، اقۇشتاپ باقتىگەرەيەۆا ت.ب. جازۋشىلار مەنىڭ اكەم شاكۋالييەۆ ءحاميتتىڭ ۇيىندە قوناقتىقتا بولىپ، سوندا اكەم جۇمەكەننىڭ اكەسىنە ارنالعان «سابىرجانعا» دەگەن تولعاۋدى باستان-اياق ورىندادى. ماقامى ەرەكشە، جانعا ءجايلى. ويتكەنى، اكەمنىڭ اكەسى شاكۋالى مەشىت ۇستاعان ادام بولىپتى. كەڭەس ۇكىمەتى 1932 جىلى مەشىتىن ورتەپ، ايەلى مەن ەكەۋىن ايداپ اكەتكەن. وتەاقاڭ تاعى ايتىڭىز دەپ، ءبىراز تولعاۋ ايتقىزىپ، تىڭدادى. وتەباي اعامىز سوسىن بىزگە ۇرىستى: «مىنا كىسىنىڭ داۋسىنداي داۋىس ەستىگەن ەمەسپىن، بۇل ەرەكشە اۋەن. قازاق ونەرىنە قوسىلار ۇلەس. داۋسىن مىندەتتى تۇردە ءۇنتاسپاعا جازىپ الىڭدار» دەپ تاپسىردى. اكەم الماتىعا كەلە المادى، قولىنداعى بالالارى بويكۇيەزدىككە سالىنىپ، داۋسى جازىلماي قالدى. اكەم 1992 جىلى 79 جاسىندا قايتىس بولدى.
جۇمەكەننىڭ جاستايىنان العان تاربيەسى ونىڭ ومىردە ءوز ورنىن العان تۇلعا بولىپ قالىپتاسۋىنا نەگىز بولدى. اتاسى ناجىمەدەن نەمەرەسىن كىشكەنتايىنان قاسىنا الىپ جاتىپ، جىر-قيسسالاردى، ەرتەگىلەردى وقىپ بەرەدى ەكەن. جۇمەكەن اتاسىنان جانە ءوزى العاشقى ۇستازىم دەپ وتىراتىن حاميدوللا قابدەشوۆ دەگەن اعاسىنان ەستىگەن جىر-قيسسالارمەن سۋسىنداپ وسكەن. سول كەزدە تىيىم سالىنعان ساكەننىڭ، ءىلياستىڭ شىعارمالارىمەن دە تانىسادى. ورال قالاسىندا وقىپ جۇرگەن اۋىلدىڭ ءبىر بالاسىنان «ءبىرجان-سارا»، سۇگىردىڭ ۇلى ناسيحاتتىڭ جىرلارىن الدىرىپ وقىعانىن جوعارىدا اتالعان اعاسى ەستەلىكتەرىندە ايتىپ ءجۇر.
جۇمەكەن جىرلارىنىڭ تەرەڭ ويلىلىعى، ءتىلىنىڭ شۇرايلىلىعى، اقىندىق شەبەرلىگىندەگى ەشكىمگە ۇقسامايتىن دارالىعى ونىڭ ۇلاعاتتى اتانىڭ جاستايىنان بويىنا سىڭىرگەن تاربيەسىنىڭ دە جەمىسى ەكەنى داۋسىز.
ۋاقىت — ءادىل قازى. جۇمەكەن بويىنداعى ۇلىلارعا عانا ءتان قاسيەتى ونىڭ جىرلارىنىڭ بولمىسىنان تانىلادى. ادەبيەت جاناشىرلارى جانە «مەنىڭ وقىرماندارىم — بولاشاق ۇرپاقتار» دەپ ءوزى ايتىپ كەتكەنىندەي، جيىرما ءبىرىنشى عاسىردىڭ وقىرماندارى ونى ۇلى تۇلعاعا اينالدىردى.
3. سۇراق. اعانىڭ اقىندىعى، كۇيشىلىگى جايىندا.
جاۋاپ: جۇمەكەن بالا كەزىنەن كىتاپتى كوپ وقيتىن ورنىقتى مىنەزىمەن، شەبەر دومبىرا ورىنداۋشىلىعىمەن اتى شىقتى. جۇمەكەننىڭ اجەسىنىڭ اكەسى — ۇلكەن ناعاشىسى قايىپ اتامىز كۇيشىلىك ونەرىمەن ەل اۋزىنا ىلىككەن شەبەر دومبىراشى ادام بولعان. دومبىرانى ءوزىنىڭ ارقا تۇسىنا ۇستاپ وتىرىپ تارتاتىن شەبەرلىگىن بىلەتىندەر تاڭ قالا ەسكە الىپ وتىرادى ەكەن. قايىپ اتا جايىندا كۇي تارتىپ بەرىپ، قالىڭمالسىز قىز العان دەگەن دەرەك بار.
جۇمەكەننىڭ دومبىراعا اۋەستىگىنە كوڭىل اۋدارعان جۇمەكەننىڭ اتاسى قوشالاققا بەلگىلى تەسىك تاماق سابىر دەگەن دومبىراشىنى ۇيىنە شاقىرتىپ الىپ، جۇمەكەنگە 4-5 جاسىنان باستاپ دومبىرا ۇيرەتىپتى.
جۇمەكەننىڭ اتاقتى شەبەر رومانەنكو جاساعان كۇرەڭ دومبىراسى اقىن تەبىرەنىپ، شابىتى شىمىرقانىپ، كەمەرىن كەرنەگەن بۋىرقانىسقا تولى تۇستارىندا قولىنا الىپ، شەرىن تارقاتاتىن جان سەرىگى ەدى. ەكى جىل ماسكەۋدە وقىعاندا دا كۇرەڭ دومبىراسى قاسىنان قالعان ەمەس. دومبىرانى سەرىك ەتۋى — جۇمەكەن كونسەرۆاتوريادا وقىعاندىعىنان ەمەس. كەرىسىنشە، ونىڭ بويىنداعى تۋما تالانتى جۇمەكەننىڭ كونسەرۆاتوريادا ءدارىس الۋىنا سەبەپشى بولدى.
جۇمەكەننىڭ ورىنداۋىنداعى توعىز كۇيدى 1968 جىلى اتاقتى شاڭقوبىزشى گۇلسارا ءپىرجانوۆانىڭ كۇيەۋى اتاقتى گەولوگ ءبانساتدين كۇزدەبايەۆ ءوزىنىڭ ماگنيتوفونىنا ءۇنتاسپاعا جازىپ الدى. كەيىن ءوز قاراجاتىما نوتاعا ءتۇسىرتىپ الدىم. ول ورىنداعان كۇيلەر نوتاسىمەن بىرگە اقىننىڭ ارحيۆىندە ساقتاۋلى. جۇمەكەن توكپە كۇيلەردى دە، شەرتپە كۇيلەردى دە وتە شەبەر ورىندايتىن. قازاق راديوسىنىڭ التىن قورىنان ونىڭ ورىنداۋىندا «قايعىلى قارانى» جانە «اقشولپاندى» اندا-ساندا اۋە تولقىنىنان بەرىپ تۇرادى.
اقىننىڭ 1967 جىلى جارىق كورگەن «كۇي كىتابىندا» اقىن كۇيدى جىر تىلىنە كوشىرەدى. بۇدان اسقان تاپقىرلىق، شەبەرلىك بولادى دەپ ويلامايمىن.
جۇمەكەننىڭ كۇيەۋ بالاسى فيلولوگيا عىلىمدارىنىڭ كانديداتى، دوسەنت سامال ءدارىباي ۇلى 2005 جىلى جۇمەكەننىڭ «كۇي كىتابىنىڭ» نەگىزىندە «كۇي كىتابى» اتتى ديسكى جازدىرىپ، جارىققا شىعاردى.
4. تانىمال تۇلعالارمەن بايلانىسى تۋرالى ايتساڭىز.
جاۋاپ: جۇمەكەننىڭ توڭىرەگىندەگى جاقىن ارالاسقان قازاقتىڭ ءبىرتۋار ۇل-قىزدارى، ادەبيەت پەن ونەر سالاسىنداعى مارقاسقالار بولاتىن. ولار جۇمەكەننىڭ ۇستازدارى احمەت جۇبانوۆ، شامعون قاجىعالييەۆ، نۇرعيسا تىلەندييەۆ، قۇبىش مۇحيتوۆ.
ادەبيەت، ونەر ساڭلاقتارى ءابۋ سارسەنبايەۆ، تاحاۋي احتانوۆ، سىرباي ماۋلەنوۆ، عافۋ قايىربەكوۆ، ءابىش كەكىلبايەۆ، اسقار سۇلەيمەنوۆ، زەينوللا سەرىكقالييەۆ، سايىن مۇراتبەكوۆ، ءشامشى قالداياقوۆ، ءازيدوللا ەسقالييەۆ، گۇلسارا ءپىرجانوۆا، سەيفوللا وسپانوۆ، ورازبەك سارسەنبايەۆ، ت.ب. ەدى.
بۇلاردىڭ ءارقايسىسى ادەبيەتتەگى، ونەردەگى قايتالانباس دارا تۇلعالار. ءبىز تۇعىرى بەرىك دوستىقتى، ادامگەرشىلىكتى قاستەرلەپ ەسەيدىك. ءومىر اتتى ۇلى شەرۋدىڭ ءسان-سالتاناتىندا جاراسىم تاۋىپ، ونەردى، ادەبيەتتى كيە ءتۇتاتىنبىز.
جۇمەكەن وزىمەن بىرگە تۋعان اعا نە ءىنىسى بولماعاندىقتان سىرباي ماۋلەنوۆ پەن عافۋ قايىربەكوۆتى تۋعان اعالارىنداي، ال تەمىرحان مەدەتبەكوۆ پەن كەڭشىلىك مىرزابەكوۆتى تۋعان ىنىسىندەي كورەتىن. ءابۋ سارسەنبايەۆ — جۇمەكەننىڭ رۋحاني اكەسى بولعان ادام. جۇمەكەننىڭ ۇلى اقىندىعىن كوزى تىرىسىندە تايسالماي ايتقان اعاسى دا وسى عافۋ اعاي بولاتىن. جوعارىدا اتالعان دوس-جولداستارى ەكى ءۇيدىڭ بىرىندەي بولىپ ارالاسقان ادامدار.
5-سۇراق. جۇمەكەن اقىننىڭ تراگەدياسى نەدە دەپ ويلايسىز؟
جاۋاپ: جۇمەكەننىڭ تراگەدياسى — تىڭعا تۇرەن سالعانىندا. ونىڭ جىرلارىنداعى تەرەڭدىگىندە، وزىنە دەيىنگىلەردىڭ ەشقايسىسىن قايتالامايتىندىعىندا. ەشكىمگە ەلىكتەمەۋىندە. وزىندىك دارا پىكىرى، تەمىرقازىعى بولۋىندا. وزىندىك قىرىمەن تانىلۋىندا.
جۇمەكەن ءوز زامانىنان وزىپ تۋعان اقىن. جۇمەكەننىڭ ولەڭىندە سىلدىر ءسوز، اسىرەقىزىل كوز الدايتىن جىلتىراقتىق جوق. جۇمەكەن ولەڭىنىڭ ءاربىر جولى زاماننىڭ جۇگىن ارقالاپ تۇرعانداي. جۇرەكپەن جازعان اقىن، ول داقپا-داق ۇيقاس قۋالاۋ، ساۋساق بۇگىپ، بۋىن ساناۋ دەگەن تاپتاۋرىنعا باعىنباعان اقىن. ءتىپتى ادام رەتىندە دا ەرەكشە جاراتىلعان تۇلعا دەپ ايتا الامىن. سول دارالىعىمەن وزگەلەرگە ۇقسامايتىن. الدەكىمگە لاۋازىمى نەمەسە قولىندا بيلىگى بولعانى ءۇشىن جاعىنۋ، جارامساقتانۋدى بىلمەيتىن.
كوزى تىرىسىندە باسپاعا ءوز قولىمەن ۇسىنۋعا ۇلگەرە الماي كەتكەن سوڭعى جيناعى «مەنىڭ توپىراعىمنىڭ» 186-بەتىندەگى «اتى جوق ولەڭدى» وقىعان زەردەلى ادام «ولگەننەن سوڭ كورىنەر ءوتىمدى ءىسى، بوتەن كىسى، سەن جالعىز جەتىم كىسى! سەن — ۋاقىتتىڭ الدىنا ءتۇسىپ كەتكەن راديو-سيگنال سەكىلدىسىڭ» دەگەن جولداردان ءوزى ءتۇيىن جاساي الادى. مۇنداي، قۇلاققا ەمەس، زەردەگە ارنالعان جولدار اقىننىڭ بولمىسىن تانىتادى.
6-سۇراق. جۇمەكەن اعا ەكەۋڭىزدىڭ ماحابباتىڭىز جايىندا ايتاسىز با؟ سىزدەر قالاي تانىستىڭىزدار؟
جاۋاپ: جۇمەكەن ەكەۋمىز دە ەس بىلگەلى ءبىر-بىرىمىزدى سىرتتاي ەستىپ-بىلىپ وستىك. وعان سەبەپ مەنىڭ اجەم مەن جۇمەكەننىڭ اتاسى ءبىر توپىراقتا تۋىپ-وسكەن (باتىس قازاقستان وبلىسىندا) رۋلاس ەكەن. ءسويتىپ، ۇلكەندەردىڭ قارىم-قاتىناسى، ولاردىڭ اڭگىمەلەرى ارقىلى بالا كەزىمىزدەن ءبىر-بىرىمىزدى كورۋدى ارمانداپ وستىك.
مەن جۇمەكەن دەگەن اتتى ەستۋمەن ەر جەتتىم. ەكەۋمىز دە اتا-اجەمىزدىڭ باۋىرىندا وستىك، ايىرماشىلىعى — ول ءوز اتاسىنىڭ، مەن — ناعاشى اتامنىڭ باۋىرىندا ءوستىم. ەكەۋمىز دە سول وڭىرگە — قوشالاق قۇمىنا اتى شىققان قوس قاريانىڭ تۇڭعىش نەمەرەلەرى بولدىق. ءبىر-بىرىمىزدى سىرتتاي جاقسى بىلدىك. مەنى تاربيەلەگەن بالسەكەر مامام الاشا رۋىنان، ول كىسى: «ءناجاقاما سالەم بەرەم، كورىسىپ كەلەم» دەپ كورىسۋ كەزىندە باراتىن ەدى. مامام اعاسىنا كورىسىپ كەلگەن سايىن ايتاتىن ءسوزى: «ءناجاقامنىڭ جالعىز نەمەرەسى جۇمەكەنجان ادام بولايىن دەپ تۇرعان بالا ەكەن، جالعىزدان قالعان تۇياق قوي، جاسى ۇزاق بولعاي. قاشان بارسام دا قولىندا كىتاپ، بالا بولىپ ويناعانىن كورگەن ەمەسپىن» دەپ ماقتاپ كەلەدى. مەنىڭ ماماما ەشكىم ۇناماۋشى ەدى، ول قانداي بالا ەكەن دەپ ىشىمنەن ويلاپ قويامىن. سول مامامنىڭ كوڭىلىنە قونعان جۇمەكەن دەگەن ات ءبىر بۇيىرىمدە جاتتى.
جۇمەكەننىڭ اكەسىنە تەتە قارىنداسى، مۋزىكا زەرتتەۋشىسى، عىلىم كانديداتى جۇماگەلدى ناجىمەدەنوۆتىڭ اناسى مۇلىك اپاي (شىن اتى — مۇلكيما) ەر مىنەزدى، سوزگە شەشەن، وتە قايراتتى ادام ەدى. ول دا اپام مەن جەزدەمە كورىسەم، سالەم بەرەم دەپ ءبىزدىڭ ۇيگە كەلىپ تۇرادى. سونداي ارالاس-قۇرالاس ساتتەردە ول دا ماعان قىزىعاتىن كورىنەدى. «جەزدەمنىڭ قىزى ءاپپاق ۇلپەرشەكتەي بولىپ ءوسىپ كەلە جاتىر ەكەن، كەستەنى، شىلتەردى شەبەر تىگەدى، ءوزى وتە يبالى ەكەن» دەپ ايتاتىن كورىنەدى، ەكەۋمىز قوسىلعاننان كەيىن اپامنىڭ وسى سوزدەرىن جۇمەكەن ماعان ايتىپ بەردى. مەنى كورگەنشە ول دا ىشتەي «قانداي قىز بولدى ەكەن» دەپ ويلاپ جۇرەدى ەكەن.
مەن جەتى جىلدىق مەكتەپتى ءبىتىرىپ، جۇمەكەن وقىپ جۇرگەن ونجىلدىق مەكتەپكە كەلگەنىمدە جۇمەكەندى ءبىرىنشى رەت كوردىم. بۇل — 1952/53 وقۋ جىلى بولاتىن.
جۇمەكەن ماعان جازعان العاشقى حاتىن ەلۋ ءۇشىنشى جىلى 27ء-شى ناۋرىز كۇنى كانيكۋل كەزىندە ءوز قولىمەن بەرىپ ەدى. ءتورت جىل بويىنا جازىلعان حاتتارى وزىمدە ساقتاۋلى.
جۇمەكەننىڭ اسپان تۇستەس شاعىن چەمودانى بولاتىن. چەمودان تۇبىنە توسەلگەن «لەنينشىل جاس» گازەتىنىڭ اراسىنا مەنىڭ جازعان حاتتارىمدى شەتىن قارا جىپپەن تىگىپ، ۇقىپتاپ جيناپ جۇرەدى ەكەن. سول ولەڭدەرىن جانە مەن سىيلاعان كەستەلى تەر ورامالدى ساقتاپ ءجۇر ەكەن. مۇقياتتىلىعىنا ءالى كۇنگە تاڭ قالامىن.
ءبىز مەكتەپتە وقىپ جۇرگەن كەزدە قىزدار وزدەرىنىڭ جاقسى كورەتىن بالالارىنا، سىيلاس، سىرلاس دوستارىنا كەستەلى ورامال سىيلاۋشى ەدىك. جۇمەكەن كەيىن ءبىر سوزىندە: «ماعان تالاي قىزدار ورامال سىيلادى، سولاردىڭ قايدا قالعانىن بىلمەيمىن. سەن سىيلاعان ورامالدى جوعالتىپ الامىن با دەپ كوپ ۇستامايتىن ەدىم» دەيتىن.
ەكەۋمىز باس قوسقان جىلدارى، جاستىعىم دا بولار، قازاق قىزىنا ءتان ۇياڭدىعىم با ەكەن، الگى ءوز حاتتارىمدى ءوزىم وقىپ، ۇيالىپ جىرتىپ تاستادىم.
جۇمەكەن ەكەۋمىزدىڭ بولاشاق جولىمىزدىڭ توعىسۋى، ءبىر-بىرىمىزدى سىرتتاي كورۋدى ارمانداپ، كورگەننەن كەيىن ءبىر-بىرىمىزدى ۇناتۋىمىز كەزدەيسوق ەمەس. اتا-انالارىمىزدىڭ دا ارمان-تىلەگى بولۋى عاجاپ ەمەس.
جۇمەكەن ەكەۋمىزدىڭ ماحابباتىمىزدىڭ كۋاسى — ەلۋ جەتى جىلدان بەرى ساقتالىپ، قاعازى سارعايعان ءوز قولىمەن جازعان حاتتارىنىڭ بىرىنەن ءۇزىندى كەلتىرەيىن:
سەنسىز ءومىر مەن ءۇشىن — جوق سەكىلدى،
سەنسىز شاتتىق قادالادى وق سەكىلدى.
سەنسىز كورگەن قۋانىش قاپامەن تەڭ،
سەنسىز ءومىر وزىمە كوپ سەكىلدى.
17/VI 53
7-سۇراق. جاستارعا جار تاڭداۋدا قانداي تىلەك ايتار ەدىڭىز؟
جاۋاپ: جاستارعا ايتارىم، مەن ءوزىم تەكتىلىك دەگەندى ۇلكەندەردىڭ اۋزىنان كوپ ەستيتىنمىن. «تەكتىلىكتىڭ كيەسى ۇرادى» دەگەندى انامىز ءجيى ايتاتىن. اتا سالتىن ۇستاعان قازاق ۇرپاق تازالىعىن ساقتاۋعا مۇقيات قاراعان. ۇرپاعىنا قولدان كەلگەنىنشە تەكتى جەردەن قىز اپەرۋگە تىرىسقان. ۇلى باليعاتقا تولعاندا تەكتى جەرمەن قۇدالاسۋعا، قىزىن تەكتى جەرگە ۇزاتۋعا دەن قويعان. ويتكەنى، شاڭىراقتىڭ كيەسىن، بوساعانىڭ ءقادىرىن تەكتى جەردەن العان كەلىن عانا باعالايتىنى وسى كۇنى دە دالەلدەنىپ وتىر.
بولاشاق كەلىن كەلگەن بوساعاسىن ماڭگىلىك قونعان ۇيام دەپ قادىرلەگەندە عانا، قانداي قيىنشىلىق بولسا دا ءتوزىپ، وسى بوساعادان تەك جەر قوينىنا عانا كەتەم دەپ، ەر ازاماتىن وزىنەن جوعارى قويعاندا عانا باقىتتى ءومىر سۇرەدى.
ال ەر-ازاماتتارعا ايتارىم ءوزىنىڭ بولاشاق ءۇرپاعىنىڭ اناسىن ايالاي ءبىلۋى كەرەك. دورەكىلىك كورسەتپەۋى كەرەك. سوندا عانا شاڭىراقتان ۇلگىلى ۇرپاق وسىپ-ونەدى. زامانىمىز تىنىش بولىپ، جاستارىمىز ۋايىم-قايعىسىز باقىتتى ءومىر ءسۇرسىن!
اڭگىمەڭىزگە كوپ راحمەت! جۇمەكەندەي ۇلى تۇلعاعا جار بالۋ باقىتىن ماڭدايىڭىزعا جازعان جاراتقان يەم ءسىزدى ءاردايىم قولداپ ءجۇرسىن. سىزگە مىقتى دەنساۋلىق تىلەيمىن!
You Might Also Like
-
«...پو پروگراممە كافەدرى گيزاتۋللا مەندىحانوۆ سوۆمەستنو س اسسيستەنتوم، ۆ تو ۆرەميا مينيستروم مياسنوي ي مولوچنوي پرومىشلەننوستي كازسسر ياكوۆوم يۆانوۆيچەم كوستينىم ي سوترۋدنيكامي ۆسەسويۋزنوگو ناۋچن...
