InfoHub Logo

قازىرگى تاڭدا 9 مىڭنان اسا ەلوردالىق تۇرعىن سيفرلىق ساۋاتتىلىق كۋرسىنان ءوتتى. اتالعانكۋرسقا كەلىپ جاتقان ادامداردىڭ سانى كوپ. ونىڭ ىشىندە ەگدە تارتقان ادامدار، ستۋدەنتتەر مەن وقۋشىلار دا بار.

استاناداعى №76 مەكتەپ-ليسەيدىڭ ينفورماتيكا ءپانىنىڭ ءمۇعالىمى عاليا قۇلشىمانوۆانىڭ ايتۋىنشا، دارىسكە كەلۋشىلەردىڭ باسىم بولىگى ۇلكەن جاستاعى تۇرعىندار.

«قىرىق جاستان باستاپ الپىس، جەتپىس بەس جاس ارالىعىنداعى كىسىلەر كوپ كەلدى. ولار ساباققا شامامەن ءبىر اي كولەمىندە كەلىپ ءجۇردى. ويتكەنى ولاردىڭ كۇندەلىكتى اقپارتتى قابىلداۋى باياۋ بولعاسىن، ول كىسىلەر كۇندە  ءبىر-بىر باعدارلامادان ۇيرەنىپ وتىردى. كۇندەلىكتى قايتالايدى، ۇيگە بارعاننان كەيىن وزدەرى قايتا ەسىنە ءتۇسىرىپ، كومپيۋتەردە جاساپ كورىپ، جاتتىعىپ ءجۇردى. تۇسىنبەگەن جەرلەرىن كۇندە كەلىپ، جازىپ-سىزىپ، سۇراپ الادى»، — دەدى كۋرس جۇرگىزۋشىسى ع. قۇلشىمانوۆا.

سونداي-اق، ول كۋرسقا قاتىسۋشىلاردىڭ سەرتيفيكات الاتىنىن ايتىپ، وعان ءبىر نەمەسە بىرنەشە كۇن كەتەتىنىن اتاپ ءوتتى. ءبارى دە ۇيرەنۋشىنىڭ قارىم-قابىلەتىنە بايلانىستى ەكەن.

«40-50 جاس ارالىعىنداعى كىسىلەر باعدارلامانى 1 كۇندە تولىعىمەن ۇيرەنىپ ءبىلىپ، سەرتيفيكات الىپ كەتتى. ال ۇلكەن كىسىلەر قابىلداۋى مەن ماتەريالدى الىمىنا بايلانىستى ءبىر اپتا شاماسىندا وقىپ، ۇيرەنگەنى تۋرالى سەرتيفيكات الدى. كۋرسقا كەلۋشىلەر قاتارىندا قولى بوس زەينەتكەرلەر ىشىندە ءتىپتى، ۇزدىكسىز 1 اي بويى كەلىپ جۇرگەندەرى دە بولدى»، — دەيدى ينفورماتيكا ءپانىنىڭ ءمۇعالىمى.

سيفرلىق ساۋاتتىلىق كۋرسىندا مەملەكەتتىك قىزمەتتى ەلەكتروندىق فورماتتا پايدالانۋ، ونلاين-ساۋدانى مەڭگەرۋ، سيفرلىق ماشىق، اشىق ۇكىمەت سىندى باعىتتاردى قامتيدى.

«ءبىرىنشى — ەلەكتروندىق قىزمەتتەر. ول بويىنشا كومپيۋتەردى قالاي قوسۋ كەرەك، قالاي قولدانۋ كەرەك. ونىڭ ىشىندەگى ءارتۇرلى باعدارلامالار بار. سول بويىنشا قالاي جۇمىس جاساۋ جولدارىن تانىستىرىپ، ۇيرەتتىك. مىسالى، Microsoft پەن Excel باعدارلامالارىنىڭ بىر-بىرىنەن ايىرماشىلىعى قانداي ەكەنىن تۇسىندىردىك. ەكىنشى باعىت–«اشىق ۇكىمەت». ول بويىنشا سيفرلىق قولتاڭبانىڭ كومەگىمەن جەرگىلىكتى جانە دە ورتالىق مەملەكەتتىك ورگاندارمەن، اكىمشىلىكپەن بايلانىس جاساۋ جولدارىن ۇيرەتتىك. پورتالدا ءوتىنىش پەن ارىز جازۋدى وقىپ ءبىلدى. ۇيدەن شىقپاي-اق، وسى قىزمەتتەردى پايدالانۋ ۇلكەن كىسىلەر ءۇشىن تاپتىرماس كومەك دەپ ويلايمىن. ويتكەنى ەگدە ادامدارعا كەيدە ءجۇرىپ-تۇرۋدىڭ ءوزى قيىندىق تۋعىزىپ جاتادى عوي. زەينەتكەرلەر وسى ەلەكتروندىق قىزمەتتەردىڭ مۇمكىنشىلىگى مەن ارتىقشىلىعىن كورىپ، قانشاما ۋاقىتتى ۇنەمۋدەۋگە بولاتىنىنا تاڭ قالىپ جاتتى. ءبىر زەينەتكەر اپايىمىز ءتىپتى ءوزىنىڭ اكىمشىلىككە دەگەن ءوتىنىشىن دە جازىپ ۇلگەردى»، – دەيدى عاليا قۇلشىمانوۆا.

ەسكە سالا كەتەيىك، سيفرلىق ساۋاتتىلىق كۋرستارى ەلىمىزدىڭ تۇكپىر-تۇكپىرىندە وقىتىلىپ جاتىر. ول سيفرلىق حقو-لار مەن ءارتۇرلى مەملەكەتتىك مەكەلەردە، سونداي-اق ءبىلىم وشاقتارىندا ۇيرەتىلۋدە. «سيفرلىق قازاقستان» مەملەكەتتىك باعدارلاماسىنىڭ ارقاسىندا حالىقتىڭ سيفرلىق ساۋاتتىلىعى 85%-عا ارتاتىندىعىن مەملەكەت باسشىسى ن. نازاربايەۆ ايتقان بولاتىن.

---