InfoHub Logo

ءبىز — وقىعاننان گورى، كورىپ تاماشالاعاندى ۇناتاتىن ۇرپاقتاردىڭ قاتارىنانبىز. بۇگىندە اتاقتى بلوگەر بولۋدى ارمانداۋشىلار سانى بۇرىنعى عارىشكەر نەمەسە ءورت ءسوندىرۋشى بولۋدى ارمانداعاندار سانىنان كوپ. سوندىقتان بلوگەر بولۋدى قالاۋ نەمەسە جاي عانا كامەرامەن بىرگە ساياحاتتاۋ — تاڭعالارلىق ءىس ەمەس. ءبىراق جاڭا باستاپ جۇرگەندەرگە قانداي كامەرا العان ءجون؟ بۇل ماقالادا بلوگەرلەرگە ارنالعان نەمەسە جاي عانا بەينەجازبا ءتۇسىرۋدى ۇيرەنگىسى كەلەتىندەرگە ارناپ بەس ءارتۇرلى كامەرالار جايىندا ءسوز قوزعايمىز. ولار وتە ۇلكەن ەمەس، باعاسى دا قول جەتىمدى، شاعىن كامەرالار.

Sony FDR-X3000 — $650

ءيا، بۇل ەكشن-كامەرا، ءبىراق ونى كادىمگى كامەرا رەتىندە دە قولدانۋعا بولادى. مۇنداي كىشكەنتاي كامەراعا ورىن كوپ كەرەك ەمەس جانە ەشكىمگە كەدەرگى كەلتىرمەيدى. سونىمەن قاتار، Sony FDR-X3000 وزىنە ۇقساس GoPro-دان الدەقايدا جاقسى. بىرىنشىدەن، مۇنىڭ Balanced Optical SteadyShot وپتيكالىق تۇراقتاندىرعىشى كەرەمەت. ساندىق تۇراقتاندىرعىشپەن بىرگە تاماشا سۋرەت بەرەدى. ونى قالاعان ءتۇسىرۋ رەجيمىنە قويا الاسىز: وپتيكالىق، ساندىق جانە وپتيكالىق نەمەسە تۇراقتاندىرعىشسىز.

بۇل كامەرا ءوز-وزىڭىزدى تۇسىرە بەرۋگە ىڭعايلى. كامەرانى قوساسىز، قولىڭىزدى سوزاسىز دا ۆلوگتى (بەينەبلوگ) جازا بەرەسىز. ايتپاقشى، ۇيقى كۇيىنەن شىعۋ ءۇشىن نەمەسە ءتۇسىرىلىمدى باستاۋ ءۇشىن ءبىر عانا تۇيمەنى باسۋ جەتكىلىكتى، ءارى بۇل وتە ىڭعايلى. كامەرادا جازبانى ءبىلدىرىپ تۇراتىن بىردەن ءۇش كورسەتكىش بار. سوندىقتان جازبانىڭ ءجۇرىپ، يا جۇرمەي جاتقانىنان ۇنەمى حاباردار بولاسىز.

مۇنىڭ بەينەجازبا ءتۇسىرۋ مۇمكىندىگى كەرەمەت. اجىراتىمدىلىعى 4ك 100 مب/س بيترەيتىمەن تەك قانا جازىپ قويماي، سونىمەن قاتار وڭدەپ بەرە الادى. وعان قوسا باياۋلاتىلعان ءتۇسىرىلىمى Full HD كەزىندە120 ك/س جانە 720 پيكسەلدە 240 ك/س بار. FDR-X3000 سۋرەت ساپاسى كەرەمەت، ءبىراق بارىنەن دە كامەرانىڭ الدىڭعى جاعىندا ورنالاسقان، ءتۇسىرىلىم كەزىندە جابىلىپ قالمايتىن جاقسى ميكروفوننىڭ بار بولعانى قۋانتادى. ءبىراق ول سىزگە ازدىق ەتسە، سىرتقى ميكروفوندى قولدانۋعا بولادى. ول ءۇشىن ميكروفوندى قوساتىن ارنايى تەتىگى بار. X3000 سۋ تامشىلارىنان ساقتايتىن قورعانىس قاباتىنا يە. سونىمەن قوسا تاعانعا ارنالعان بۇرانداسى دا بار، GorillaPod-تى قولدانۋعا، تاعاننان سۋرەتكە تۇسىرۋگە وتە ىڭعايلى ەكەن. ءتۇسىرىلىمدى باقىلاپ تۇراتىن ديسپلەيدىڭ جوقتىعىن كەمشىلىككە جاتقىزۋعا بولادى. سىرتىنداعى ءبىرتۇستى ديسپلەيدەن تەك مازىرگە كىرۋگە جانە نەگىزگى كورسەتكىشتەردى باقىلاۋعا عانا بولادى. ەكىنشى كەمشىلىگى — باعاسىندا. كامەرا قىمبات تۇرادى، ءبىراق ءوزىنىڭ امبەباپتىلىعى مەن مۇمكىنشىلىكتەرىمەن باعاسىن اقتايدى.

ارتىقشىلىقتار:

- امبەباپتىلىق.
- جاقسى دىبىس.
- دەربەستىك.

كەمشىلىكتەر:

- باقىلايتىن ديسپلەيى جوق.
- باعاسى.

Canon Power Shot G7 X Mark II — $530

ەگەر دە ەكشن-كامەرا ءسىزدىڭ كوڭىلىڭىزدەن شىقپاسا، وندا كلاسسيكالىق، ىقشامداۋ ءتۇرىن قاراستىرعان ءجون. ءبىراز مۇمكىنشىلىكتەر جيىنتىعىمەن قامتىلعان، اسا ۇلكەن ەمەس كامەرالار. وسىنداي كامەرالاردىڭ ىشىندەگى ەڭ جاقسى كامەرالاردىڭ ءبىرى Sony RX100 V، ءبىراق باعاسى وتە قىمبات 1000 دوللار، ال Canon G7x MKIIء-نى ونىڭ جارتى باعاسىنا ساتىپ الۋعا بولادى. الەم بويىنشا ۆلوگەرلەردىڭ، ياعني YouTube جەلىسىنە سالۋ ءۇشىن وزدەرىن بەينەجازباعا تۇسىرەتىندەردىڭ سۇيىكتى كامەراسى بولىپ تابىلادى.

بۇل كامەرانىڭ ەڭ باستى كەمشىلىگى — 4ك اجىراتىمدىلىعىندا تۇسىرمەيدى، ال قالعان قاسيەتتەرى جاعىنان تاماشا ۇلگى بولا الادى. 24-100 مم  كەرەمەت وبەكتيۆ ورناتىلعان، وپتيكالىق تۇراقتاندىرعىشى دا تۇرارلىق. كامەرا وبەكتيۆىنىڭ فوكۋستىق ارا قاشىقتىعى ىڭعايلى، كەڭ بۇرىشتىق اۋقىمى 24 مم كەزىندە ۆلوگتار مەن تابيعات كورىنىستەرىن تۇسىرۋگە ىڭعايلى بولسا، تەلەوبەكتيۆكە دەيىنگى قاشىقتىعى 100 مم كەزىندە پورترەت تۇسىرۋگە نەمەسە وبەكتىنى جاقىنداتۋعا ىڭعايلى. ديافراگما ءمانى مينيمالدى f/1.8، ياعني جارىق كۇشى كوپ وبەكتيۆ دەگەن ءسوز، ال ءديۋيمدى ماتريسامەن بىرگە قاراڭعى تۇندە دە تاماشا تۇسىرە الادى. كامەرا وبەكتيۆىندە زۋمدى دا ديافراگمانى دا رەتتەي الاتىن باسقارۋ ساقيناسى بار، ونىڭ ءجۇرىسىن ءبىرسارىندى ۇزدىكسىز قوزعالىستان قادامدىق قوزعالىسقا اۋىستىرىپ وتىرسا بولادى.

جالپى ءوزى كىشكەنتاي كامەرا بولسا دا باسقارۋ ەلەمەنتتەرىنىڭ كوپتىگى تاڭقالدىراتىنى ءسوزسىز. Canon-عا قاجەتتى باتىرمالاردى جانە ەكرانداعى مازىرگە جىلدامدىقتى ارتۋ ماقساتىندا كەرەكتى تۇيمەلەردى ەنگىزىپ قويعان. نەگىزىندە G7x كامەراسىنىڭ شاعىن ولشەمى — ونىڭ ۇتىمدى جەرى. وسىنداي كىشكەنتاي كامەرا كۇرتكەنىڭ، جولدوربانىڭ ءتىپتى ايەلدەر سومكەسىنىڭ قالتاسىنا سىيىپ كەتەدى. سونىمەن بىرگە شاعىن اككۋمۋلياتوردى سىرتقى اككۋمۋلياتوردىڭ كومەگىمەن قۋاتتاۋعا بولادى، جانە G7x كولەمى ساپاسىنا ەش كەدەرگى بولماعانى تاڭقالدىرادى. ءسىز اۆتوماتتى رەجيمدە اۆتوفوكۋسپەن دە، نەمەسە تولىقتاي قولمەن رەتتەپ وتىرىپ تۇسىرە الاسىز. پرەميۋم-شاعىن اپپاراتتار ەڭ الدىمەن ساياحاتتاعاندا جانە ۆلوگ تۇسىرگەن كەزدە قاجەت، جاڭادان باستاپ كەلە جاتقان بەينە تۇسىرۋشىلەرگە جانە بەينەگە ءتۇسىرۋدىڭ قىر-سىرىن ۇيرەنگىسى كەلگەن تالاپكەرلەرگە  كومەگىن تيگىزەدى.

ارتىقشىلىقتارى:

- ولشەمدەرى.
- اۆتوفوكۋس.
- تۇراقتاندىرعىش.
- ىڭعايلى فوكۋستى قاشىقتىقتار.

كەمشىلىكتەرى:

- بەينەنىڭ 4ك-دا تۇسىرىلمەۋى.
- ءالسىز باتارەيكا.

Panasonic Lumix G7 — $690 (14-42 mm Kit)

Panasonic Lumix G7–ءنى ىقشامدى، اسىرەسە قىمبات ەمەس كامەرا دەپ ايتۋ قيىن، ءبىراق Lumix GH5–پەن سالىستىراتىن بولساق، وندا G7 راسىمەن دە كىشىلەۋ ءارى ارزانداۋ كورىنەدى. G7-دە ءبىرشاما كوپ مۇمكىنشىلىكتەر بار: سەكۋندىنا 30 كادر تۇسىرەتىندەي 4ك اجىراتىلىمدا بەينە جازۋ، فوكۋس-پيكينگ، جولاق جانە كوپتەگەن باسقا دا باپتاۋلارى بار. G70، بۇل مودۋلدىك مۇمكىنشىلىكتەرگە يە جۇيەلى كامەرا: اۋىسپالى وبەكتيۆ، ميكروفوندار، مونيتور، باتارەيالى تۇتقا جانە تاعى دا باسقالارى. بۇل كامەرانى شەكسىز جاقسارتا بەرۋگە بولادى، ءسىز ەگەر ءبىر دەڭگەيگە جاقسىراعىن قالاپ Lumix GH4 نەمەسە ءتىپتى GH5s الساڭىز، وندا Micro 4/3 فورماتىنداعى بارلىق وبەكتيۆتەردى جاڭا كامەرادا دا قولدانۋعا بولادى.

Panasonic Lumix G7 بۇگىنگى تاڭدا 4ك بەينەتۇسىرىلىمى بار قولجەتىمدى جالعىز جۇيەلىك كامەرا دەسەك بولادى. ونىڭ ۆلوگ تۇسىرۋگە بولاتىنداي اينالاتىن ديسپلەيى بار، اسا قاتتى اۋىر دا ەمەس جانە كەرەمەت دەربەستىككە يە. بۇل كامەرانىڭ كەمشىلىگىنە قۇلاققاپتى جالعايتىن ەلەكتروندى شىعىسىنىڭ جوقتىعىندا. ەكىنشى جاعىنان، مۇندا سىرتقى ميكروفونعا شىعىس بار، بۇل ارينە ساپالى دىبىس جازۋدا الدەقايدا ماڭىزدىراق.
بۇل كامەراعا قوسىمشا وبەكتيۆ ساتىپ الۋعا تۋرا كەلەدى، نەمەسە بىردەن Kit ساتىپ الا سالۋ كەرەك، ياعني كامەرا مەن وبەكتيۆ جيىنتىعىن. جيىنتىق قاراپايىم كەلسە14-42 مم f/3.5-5.6، باعاسى شامامەن 690 دوللار. بۇل ءتۇسىرۋدى جاڭادان باستاپ كەلە جاتقاندارعا جارايدى. ۋاقىت وتە كەلە ءسىز جاقسى زۋم، پورترەتكە ءتۇسىرۋشى نەمەسە كەڭبۇرىشتى اۋقىمدايتىن اپپاراتتاردىڭ قاجەتتىلىگىن تۇسىنە باستايسىز.

Lumix G7ء-نىڭ تەك ءبىر ەلەۋلى كەمشىلىگى — اۆتوفوكۋس. ول قاتتى جىلدام دا ەمەس، دالدىلىگى دە ناشار. ەڭ جاقسىسى اۆتوفوكۋسسىز جۇمىس ىستەۋدى ۇيرەنۋ، ءبىراق اۆتوماتيكانىڭ دا ەبىن تاۋىپ الۋعا بولادى. نەگىزىنەن Lumix G7ء-نىڭ ورنىن باسۋشىسى بار، ەگەر اقشاڭىز جەتىپ تۇرسا بىردەن Lumix G80 ساتىپ الساڭىز دا بولادى. بۇل كامەرا دا شاعىن، ءبىراق ءبىرشاما جاقسارتىلعان قوسىمشالارىمەن. ايقىن بەينەدەن، ەش قيىندىقسىز بەينەجازبانى قولدىڭ دىرىلدەگەنىنەن قورىقپاي قولمەن-اق تۇسىرۋگە بولاتىن ماتريسالىق تۇراقتاندىرعىشقا دەيىن جيناقتالعان. مۇنداي كامەرا 12-60 مم وبەكتيۆپەن بىرگە شامامەن 1100 دوللارعا شىعادى.

ارتىقشىلىعى:

- بەينەجازبا باپتاۋلارىنىڭ كوپتىگى.
- 4ك جانە بەينە ساپاسى.
-  بۇرىلمالى ديسپلەي.
- اۋىسپالى وبەكتيۆتەر.

كەمشىلىكتەرى:

- اۆتوفوكۋسى جاقسى ەمەس.
- ISO 800 دەن كەيىن شۋىلدىڭ بولۋى.

Canon EOS M50 — $670 (15-45 mmKit)

Canon — اينالى كامەرا شىعارۋدان ەڭ تانىمال كومپانيا. جاپوندىقتار ايناسىز كامەرالاردى جاساۋدان ءبىراز ۋاقىت ارتتا قالعان ەدى. ءبىراق، جاقىن ارادا كومپانيا EOS M50 كامەراسىن جارىققا شىعاردى. بۇل جاڭادان باستاپ جۇرگەن بلوگەرلەرگە جانە ۆلوگ تۇسىرۋشىلەرگە ىڭعايلى،وتە قىزىق، قىمبات ەمەس كامەرا. ءوزى شاعىن عانا. ونىڭ اۋىسپالى وبەكتيۆتەرى، جاقسى اۆتوفوكۋس پەن بۇرىلمالى ديسپلەيى بار. EOS M50 4ك اجىراتىلىمىندا بەينەجازبا تۇسىرە الادى، ەگەر بەينەجازبالارىڭىزدى UHD اجىراتىلىمىندا ءتۇسىرۋدى كوزدەگەن بولساڭىز،ءسىز ءۇشىن بۇل وتە ماڭىزدى بولماق. ەگەر ءسىزدىڭ جوباڭىز Full HD –دە بولسا، جوعارعى اجىراتىمدىلىق بەينەجازبانى باعدارلامادا وڭدەگەن كەزدە كەرەك بولادى.

EOS M50ء-دىڭ ءمازىرى ىڭعايلى، بۇل Canon قولدانۋشىلارى ءۇشىن ۇيرەنشىكتى بولسا، جاڭادان ساتىپ العاندارعا دا قولدانۋ وڭايعا تۇسپەك. بۇل كامەرانىڭ ماتريساسى ايتارلىقتاي ۇلكەن. Panasonic G7-گە قاراعاندا APS-C سەنسورى ۇلكەندەۋ، سالدارىنان م50 جارىقتى كوبىرەك الا الادى، فوكۋستارى تەڭ قاشىقتىقتا بولعان كەزدە كادرعا دا اقپارات كوبىرەك بەرىلەدى. سونىمەن قاتار م50 فوتوسۋرەتكە تۇسىرۋدەن ناشار ەمەس. شەبەر قولدار كەرەمەت كادرلار الاتىنى ءسوزسىز. ءبىراق ءبىز بەينەجازبا جايىندا ايتىپ وتىرعاندىقتان، EOS M50-دە فيرمالىق Dual Pixel CMOS AF تەحنولوگياسى بار ەكەنىن ايتا كەتكەن ءجون. ءسىرا، بۇل بەينەجازبا تۇسىرۋدەگى ەڭ ۇزدىك اۆتوفوكۋس. ءسىز ۆلوگ ءتۇسىرىپ جاتقان كەزدە، اسىرەسە ءجۇرىپ بارا جاتقاندا نەمەسە جارىق از تۇسكەندە اۆتوفوكۋس جايىندا ۋايىمداماي-اق قويساڭىز بولادى. الايدا، Dual PixelFull HD بەينەجازباسىندا عانا جۇمىس ىستەيدى، 4ك كامەرا ادەتتەگى قارام-قارسى اۆتوفوكۋسىمەن شەكتەلەدى، ودان عاجاپ تۋىندى كۇتۋدىڭ قاجەتى جوق.

دەگەنمەن، EOS 50M باعاسىنا قاراي، ادەمى فيلمدەر مەن مىقتى ۆلوگتار ءتۇسىرۋدى ۇيرەنگىسى كەلگەن جاندارعا ەڭ جاقسى كامەرالاردىڭ ءبىرى. سونىمەن قاتار، ونىڭ فيرمالىق جالعاستىرۋشى تەتىگى ارقىلى Canon-نىڭ ۇلكەن تولىق كادرلى وبەكتيۆتەرىن جالعاپ قولدانسا بولادى. ول Full HD بەينەجازبانى سەكۋندىنا 50 كادر تۇسىرە العاندىقتان باياۋلاتىپ ءتۇسىرۋ مۇمكىندىگىنە يە بولاسىز، جانە 720 پيكسەل كەزىندە سەكۋندىنا 120 كادر تۇسىرسە الاسىز. ايتا كەتەتىن ەڭ ماڭىزدى جايت – م50ء-دىڭ اق ءتۇستىسى بار. ءبىرتۇستى كامەرالار الەمىندە بۇل ارپا ىشىندەگى ءبىر بيداي دەسە بولادى.

ارتىقشىلىقتارى:

- تەز ءارى ناقتى اۆتوفوكۋس.
- 4ك جانە بەينەجازبا ساپاسى.
- بۇرىلمالى ديسپلەي.
- اۋىسپالى وبەكتيۆتەر.

كەمشىلىكتەرى:

- سيىمدىلىعى تومەن اككۋمۋلياتور.

Sony FDR-AX33 — $770

بۇل توپتاماداعى جالعىز بەينەكامەرا — Sony FDR-AX33. مۇنداي كامەرالاردى «حەنديكام» نەمەسە «كامكوردەر» دەپ اتايدى، ولاردىڭ ارتىقشىلىقتارى دا كەمشىلىكتەرى دە بار. Sony FDR-AX33 ۆلوگ تۇسىرۋگە كەرەمەت اپپارات ەمەس، دەگەنمەن، وبەكتيۆتەر مەن باپتاۋلاردى اۋىستىرىپ وتىرۋعا ۋاقىتىن كەتىرگىسى كەلمەي، جاي عانا ادەمى بەينەجازبا تۇسىرگىسى كەلەتىندەرگە ارنالادى. كامكوردەر بەينەجازبانى ءجيى ءارى كوپ جازاتىندارعا تاپتىرماس قۇرال، وعان قوسا سۋرەت ساپاسى دا جوعارعى دەڭگەيدە، ال 4ك اجىراتىمدىلىعىندا جازۋعا بولاتىندىعى مونتاجداۋ كەزىندە ءبىراز ەركىندىك بەرەدى. Sony FDR-AX33 جاڭادان ءتۇسىرىپ جۇرگەندەرگە دە ساي كەلەتىن اپپارات.  بەينەنىڭ تۇراقتىلىعى ءشتاتيۆتى وزىڭمەن بىرگە الىپ جۇرمەي، ءبارىن قولمەن ۇستاپ تۇسىرۋگە مۇمكىندىك بەرەدى. اسپازدىق شوۋ، تۋعان كۇن نەمەسە قالانىڭ اسەم كورىنىسى سياقتى كەز-كەلگەن بەينەجازبانى قولعا ۇستاپ ءتۇسىرۋ مۇمكىندىگى كامكوردەرلەردىڭ ايرىقشا ەرەكشەلىگى.

Sony FDR-AX33 10 ەسەلى وپتيكالىق زۋم بولۋىمەن ىڭعايلى، ياعني سۋرەتتى ساپاسىن جوعالتپاي جاقىنداتۋىڭىزعا بولادى. ەگەر كادر سول مەزەتتە قولمەن تۇزەۋدى تالاپ ەتسە، ونداي باپتاۋلارى دا قاتار ىستەپ تۇرادى. مۇنداي كامەرالاردىڭ كەمشىلىگىنە ءبىرجاقتىلىقتى جاتقىزۋعا بولادى. ەگەر ادەمى، كولەمدى ورىنعا قوسا ادامدى جانە بۇلىڭعىر ارتقى كادردى تۇسىرگىڭىز كەلسە، وندا كامكوردەرلەر سىزگە كومەكتەسە المايدى.  

مۇنداي كامەرالار وپەراتورلىق ءىستى ۇيرەنگىسى كەلەتىندەرگە ەمەس، جاي عانا وزىنە كونتەنت جيناۋ ءۇشىن نەمەسە وتباسىلىق بەينەجازبالار تۇسىرۋگە ارنالعان. ەگەر ءسىز بەينە جۇمىس قۇرالىڭىزدان ءلاززات الا وتىرىپ، كاسىبي وسكىڭىز كەلسە، وندا Canon EOS M50 نەمەسە Panasonic Lumix G7-گە كوز سالىڭىز. تىزىمدەگى ءدال وسى ەكى كامەرا سىزگە تولىق باقىلاۋ مۇمكىندىگى مەن شىعارماشىلىق ەركىندىك بەرە الادى. ءبىراق ول ءۇشىن ءبىراز ماتەريالدىق ءبولىمىن وقىپ مەڭگەرۋ كەرەك

.ارتىقشىلىقتارى:

- كەرەمەت تۇراقتاندىرعىش.
- سۋرەت ساپاسى.
- 4ك.
- شاعىن جانە ىڭعايلى.

كەمشىلىكتەرى:

- شىعارماشىلىق تۇسىرىلىمگە جارامايدى.
- جارىقتاندىرۋ تومەن كەزىندە شۋدىڭ بولۋى.

العاشقى كامەرانى تاڭداعان كەزدە بارلىق بلوگەرلەر اينالى Canon-عا نەمەسە ايناسىز Panasonic جانە Sony سياقتى ۇلكەن كامەرالارعا ۇمتىلادى. ءبىراق ءبىز ۆلوگ پەن اۋقىمدى بەينەجازبانى تۇسىرۋگە بولاتىنداي، اسا ۇلكەن ەمەس، ءارى شاعىن تۇرلەرىن سانالى تۇردە ىرىكتەپ الدىق. كامەرانى بىرنەشە مىڭ دوللارعا ساتىپ الۋعا اسىقپاڭىز، قولجەتىمدى تۇرلەرىنەن، مىسالى ءبىز كەڭەس بەرگەن تۇرلەرىنەن باستاساڭىز بولادى.

---