اسحات ايماعامبەتوۆ: ءمۇعالىم كۇندەلىكتى ەكى قۇجاتتى تولتىرادى
ءبىلىم جانە عىلىم ءمينيسترى اسحات ايماعانبەتوۆ پەداگوگتەردىڭ شامادان تىس ەسەپ بەرۋ ماسەلەسىن تۇبەگەيلى شەشەتىن بۇيرىقتىڭ ماڭىزدىلىعى تۋرالى ايتتى.
«مەن 2020 جىلعى 6 ساۋىردە قول قويعان № 130 بۇيرىقتا ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ مۇعالىمدەرى تولتىرۋعا مىندەتتى قۇجاتتاردىڭ ناقتى ءتىزىمى كورسەتىلگەن. بۇل قۇجاتتىڭ ماڭىزدىلىعى نەدە؟
بۇدان بىلاي مۇعالىمدەردى شامادان تىس ەسەپ بەرۋدەن ارىلتاتىن زاڭ جۇزىندەگى نەگىز پايدا بولدى. ەندى مينيسترلىك بەكىتكەن ناقتى ءتىزىم بار. «پەداگوگ مارتەبەسى تۋرالى» زاڭعا جانە اكىمشىلىك كودەكسكە سايكەس، مۇعالىمدەردەن بەكىتىلگەن تىزىمنەن وزگە قۇجاتتار بويىنشا ارتىق ەسەپتى تالاپ ەتكەندەردى ارنايى ورگان ايىپپۇل تۇرىندەگى اكىمشىلىك جاۋاپقا تارتۋعا بولادى»، - دەپ جازدى مينيستر ءوزىنىڭ الەۋمەتتىك جەلىدەگى پاراقشاسىندا.
سونداي-اق، مينيستر اتالعان قۇجاتتى ەگجەي-تەگجەيلى ءتۇسىندىردى.
«ەندى ءپان ءمۇعالىمى كۇندەلىكتى ەكى قۇجاتتى تولتىرادى. ءبىرىنشىسى — سىنىپ جۋرنالى، ەكىنشىسى — ساباق جوسپارى. سونداي-اق وقۋ جىلىنىڭ باسىندا كۇنتىزبەلىك-تاقىرىپتىق جوسپاردى دايىندايدى جانە ءار توقسان سوڭىندا كريتەريالدىق باعالاۋ بويىنشا قۇجاتتاردى تولتىرادى. قالعان قۇجاتتىڭ ەش قاجەتى جوق.
ەگەر ءمۇعالىم جاس پەداگوگتىڭ تالىمگەرى بولىپ، سول ءۇشىن 17 مىڭ تەڭگەگە جۋىق ۇستەمەاقى الاتىن بولسا، وندا جاس ارىپتەسىمەن بىرلەسىپ اتقارعان جۇمىسى بويىنشا ادىستەمەلىك قۇجات تولتىرادى. ەگەر ءمۇعالىم سىنىپ جەتەكشىسى بولسا، وندا وقۋ جىلىنىڭ باسىندا تاربيە جۇمىسىنىڭ جوسپارىن جاسايدى، وتكىزىلگەن اتا-انالار جينالىسى بويىنشا ەلەكتروندىق فورماتتا حاتتاما تولتىرادى، وقۋشىلاردىڭ تابەلدەرىن تولتىرادى جانە قاجەتتىلىگىنە قاراي ولاردىڭ جەكە ىستەرىن جاڭارتىپ وتىرادى.
مەكتەپ باسشىسى مەن باسشىنىڭ ورىنباسارلارى تولتىراتىن ماڭىزدى قۇجاتتاردىڭ دا ناقتى ءتىزىمى بەلگىلەندى، ارتىق قۇجاتتىڭ ەش قاجەتى جوق.
كوللەدج پەداگوگتەرى تولتىراتىن قۇجاتتار ءتىزىمى دە بەكىتىلدى. ولار جىلدىڭ باسىندا جۇمىس ىستەۋگە ارنالعان وقۋ باعدارلاماسىن قۇرىپ، كۇنتىزبەلىك-تاقىرىپتىق جوسپار جاسايدى، ال كۇن سايىن ساباق جوسپارىن ازىرلەيدى، تەوريالىق، وندىرىستىك وقىتۋ جانە جەكە ساباقتاردى ەسەپكە الۋ جۋرنالدارىن تولتىرادى. ەگەر پەداگوگ كۋراتوردىڭ قىزمەتىن اتقارسا، تاعى ءبىر قۇجات قوسىلادى. شامادان تىس ەسەپ بەرۋ كورسەتكىشىن تۇبەگەيلى ازايتۋعا قاتىستى ناقتى جۇمىستار مەكتەپكە دەيىنگى جانە جوعارى ءبىلىم بەرۋ دەڭگەيلەرى بويىنشا دا جۇرگىزىلىپ جاتىر. جوعارى وقۋ ورىندارىنىڭ وقىتۋشىلارى دا قاجەتسىز قاعاز جۇكتەمەسىنەن ارىلادى. قازىرگى ۋاقىتتا بعم تاراپىنان نورماتيۆتىك قۇجاتتاردا كورسەتىلگەن باقىلاۋدىڭ جۇرگىزىلۋىنە قاتىستى تولتىرىلاتىن قۇجاتتار ءتىزىمى قايتا قارالىپ جاتىر. باسىم بولىگىن الىپ تاستاۋ تۋرالى شەشىم قابىلداندى. ماسەلەن، كافەدرانىڭ جۇمىس جوسپارى، كوميسسيانىڭ حاتتاماسى، قىزمەتتىك وقۋ جوسپارى سىندى قۇجاتتار بىزگە قاجەت ەمەس. بۇل رەتتە مۇعالىمدەرگە ارتىلعان ارتىق جۇكتەمەنى ازايتۋ بويىنشا جاعداي جاساپ قانا قويماي، پەداگوگتەردەن جوعارى كاسىبي بىلىكتىلىكتى جانە ساپالى ءبىلىم بەرۋدى تالاپ ەتەتىن بولامىز. قوعامدا ءبىلىم بەرۋ ساپاسىنىڭ نەگە اقساپ تۇرعانىن ءتۇسىندىرۋ ءۇشىن، پەداگوگتەردىڭ شامادان تىس ەسەپ بەرەتىنى، ولاردىڭ وزىنە ءتان ەمەس جۇمىستارعا تارتىلۋى، وقۋ باعدارلامالارى مەن وقۋلىقتارداعى ولقىلىقتار تۋرالى جانە تاعى سول سياقتى ماسەلەلەر ايتىلادى.
ءبىراق بۇل پروبلەمانىڭ بارلىعى شەشىلىپ جاتىر جانە بۇدان بىلاي دا شەشىمىن تابا بەرەدى. دەگەنمەن، ءبىلىم ساپاسى، ەڭ الدىمەن، مۇعالىمدەردىڭ بىلىكتىلىگىنە تىكەلەي بايلانىستى. سول سەبەپتى، پەداگوگ ۇنەمى ءوزىن-وزى جەتىلدىرىپ، كاسىبي دەڭگەيىن ارتتىرىپ وتىرۋى كەرەك»، — دەدى مينيستر.
You Might Also Like
-
ءبىلىم بەرۋدى دامىتۋدىڭ يننوۆاسيالىق ورتالىق جوسپارىنا سايكەس تاربيە ءىسى جونىندەگى ورىنباسارلارى ءۇشىن «وقۋشىلاردىڭ جازعى دەمالىسىن ۇيىمداستىرۋدا زاماۋي تاسىلدەردى قولدانۋ» تاقىرىبى بويىن...
-
اسان قايعىنىڭ اكەسى — ءسابيت دەگەن كىسى. ول كىسىنىڭ ءبىر قارا تۇلپارى، ءبىر قارا بۇركىتى، ءبىر قارا تازىسى بولادى. كاسىبى اڭشىلىق بولادى. بالاسى بولمايدى. ءبىر كۇنى ءتۇس كورىپ، ايەلىن شاقىرىپ الىپ:
