اتامىز جامبىل اقىنعا
(ن. قۇراماسى جاۋىنگەرلەرىنىڭ حاتى)
قازاق پوەزياسىنىڭ الىبى، حالىق عاسىرى قارت جامبىل، سىزگە، ن. قازاق قۇراماسىنىڭ جاۋىنگەرلەرى مايداننان جالىندى سالەم جولداپ، قولىڭىزدى قاتتى قىسادى. ءبىز جاۋىنگەرلەر بۇل حاتتى ءارقايسىمىز ءوز ۇيىمىزگە جازىپ وتىرعانداي سەزىممەن، ادال جۇرەگىمىزبەن التىن كۇننىڭ الەمگە نۇر شاشقان جازىنا كوز تىگە، سۇيىكتى قازاق دالاسىن كوزگە ەلەستەتە وتىرىپ، سىزگە جولدايمىز. ءسىزدى ءوزىمىزدىڭ تۋعان اكەمىزدەي ىستىق. ماحابباتپەن ساعىنىپ ەسكە الامىز.
قاجىرلى اكەمىز، جامبىل! ءسىزدىڭ «بالاما حات» دەگەن ولەڭىڭىز تاڭ الدىنداعى شىعىستىڭ مايدا جەلىندەي جەلپىپ بىزگە جەتتى. ءبىزدىڭ جىگەرىمىزدى تاسىتتى. ءبىز ءبارىمىز دە، وسى حاتتى جازىپ وتىرعاندار، باتىر دوستارىمىز تۋرالى ءسىزدىڭ ءتاتتى جىرلارىڭىزدى تاعى دا وقىيمىز دەگەن ۇمىتتەمىز.
تىڭداڭىز قارت، ۇلدارىڭىزدىڭ ءۇنىن:
اكەمىز جامبىل الىستان،
عاسىردى كورگەن دانىشپان،
تىڭداپ قۇلاق سالىڭىز،
ۇلدارىڭنىڭ مايداننان
جاۋىنگەرلىك سالەمىن،
قابىل كورىپ الىڭىز.
ۇلىڭدى باتىر سانسىز مىڭ
جەلىندەي جەلپىپ جەڭىستىڭ
جەتتى ءسىزدىڭ حاتىڭىز.
جولداعان سالەم جۇرەكتەن،
جالىندى ۇشقىر تىلەكپەن،
كۇش بەردى، قارت اتىڭىز.
ۋا، ءقادىرلى اتا جان،
ۇلى جولعا اتتانعان
ۇلدارىڭا سەنىڭىز:
جاۋدى اياۋسىز قىرامىز،
تۇرعىزباستاي ۇرامىز،
تازارعانشا ەلىمىز!
كوكوراي شالعىن كولىمىز،
اسۋ اسقار بەلىمىز،
بوسانعانشا جەرىمىز
توقتامايمىز ءبىر مينۋت
تاۋسىلماسا دەمىمىز!
فاشيست دەگەن زۇلىم جاۋ
وينامايدى، كۇلمەيدى،
ادامنىڭ ءتىلىن بىلمەيدى،
كىسى ءولتىرۋ، قان ءىشۋ،—
وزگەنى كوزگە ىلمەيدى.
سويلەسۋ كەرەك ولارمەن:
قىزىل وتتىڭ تىلىمەن،
كوك زەڭبىرەك ۇنىمەن،
ۇشقىر وقتىڭ سوزىمەن،
ەگەۋلى نايزا وزىمەن،
بولات قانجار جۇزىمەن،
ۇعادى سونى نەمىستەر،
تۇسىنەدى شىنىمەن.
وسىنداي سۇمنىڭ تالايىن
كەلتىرىپ تىلگە ۇيرەتتىك،
ات ارتىنا سۇيرەتتىك،
از كەلگەنىن ازدىرىپ،
بىر-بىرلەپ توبىن سيرەتتىك.
قىزىل وتتى قاق جارىپ!
جاۋعان وققا قاسارىپ،
دۇشپاننىڭ جاتقان جەرىنە
ىركىلمەي كىردى ول بارىپ
جۇرەكتى باتىر بۇرىشيەۆ
گراناتىن قولعا الىپ.
قاس باتىرشا تولعانىپ،
ءبىرىن وڭعا قۇلاتىپ،
ءبىرىن سولعا سۇلاتىپ،
قىرعىيداي ءتيدى نەمىسكە
جاڭبىرشا وعىن بوراتىپ،
باتىر ۇلىڭ بايمۇرزين
(ءابدىراحمان ءوز اتى)
ويىپ تۇسەر دۇشپانىن
جىگىتتىڭ وتكىر بولاتى.
ەجەلگى جاۋىن كورگەندە،
اسىعىپ سابىر تاعاتى،
قىرىپ سالار قىناداي
جەتكەندە مەزگىل ساعاتى.
جاۋ قۇتىلىپ كەتەر دەپ
ۇزبەي ءسىرا كۇدەردى،
جىلدامدىعى ناجاعاي،
قىيمىلى جاي وعىنداي،
جاسىمايتىن جىگەرلى،
ءبىر ۇرىستىڭ ۇستىندە
نەمىستىڭ بەس تانكىسىن
بىر-بىرلەپ ورتەپ جىبەردى. »
كوك زەڭبىرەك سۇيرەتكەن
ەگەسكەن جاۋىن كۇيرەتكەن
ەرنازاروۆ مىرزاباي،
ۇلىڭىز ول دا اسقان ەر.
ۇشقان قۇستى ىلەتىن
جەلدەي جۇيرىك جۇگىرەر،
اۋىزدىقپەن الىسىپ،
تۇپكە جەككەن قاراگەر،
زەڭبىرەكتى تارتاتىن،
كەدەرگى بولماي ىلدىي، ءور.
جاياۋ اسكەر سوڭىنان
كومەك بەردى ءارقاشان
قاناتسىز ۇشقىش جىگىتتەر.
اتقانى اۋماي تيەتىن،
ولىك ەتىپ نەمىستى
توپ-توبىمەن ۇيەتىن:
تالايىن جويىپ دۇشپاننىڭ
ءۇش تانكىسىن قىيراتتى.
جاۋدى تىنباي ءولتىرۋ
ءىسى ەدى ونىڭ سۇيەتىن.
قىراعى قىردىڭ قىرانى،
دالانىڭ ور قويانى،
تاۋدىڭ جۇيرىك بۇلانى،
نەمىستەردى ەكى ءجۇز
وتىز توعىز ولتىرگەن
سۇلەيمەنوۆ ىبىرايىم
قازاقتىڭ باتىر ۇلانى.
اشكەي ۇلى رايىمجان،
تالاي باتىر باۋلىعان،
اقىلدى باسشى كاپيتان،
ۇرىستا سالقىن سابىرلى،
قىراندارىن ءوربىتىپ
جەڭىسكە باستاپ ءجۇردى caن.
تولىپ جاتىر وسىنداي
قاھارمان باتىر جىگىتتەر،
ءوزىڭنىڭ شەشەن تىلىڭمەن،
بۇلبۇلداي ءتاتتى ۇنىڭمەن
ۇلدارىڭدى كەمەڭگەر
الەمگە ايقىن جىرلاپ بەر!
سۇم ءفاشيستى، اتاجان،
قارىس سۇيەم ىلگەرى
باستىرمايمىز، جەڭەمىز!
ءسىز ارقىلى حالىققا
وسىلاي سەرت بەرەمىز!
حوش بولىڭىز، قارت اتا،
ۇسىندىق، مىنە، قولىمىز.
تالاي جىلداپ تاعى دا
ساۋ-سالامات بولىڭىز.
ۇلدارىڭنىڭ جەڭىسىن
كوزىڭىزبەن كورىڭىز.
اسىل سوزبەن ەرلەردى
ەلگە جىرلاپ بەرىڭىز!
ن. قۇراماسىنىڭ جاۋىنگەرلەرى، كومانديرلەرى مەن ساياسي قىزمەتكەرلەرىنىڭ تاپسىرۋى بويىنشا: وردەندى جاس اقىن، سەرجانت نۇرشايحوۆ ءازىلحان، قوس وردەندى مەرگەن سۇلەيمەنوۆ ىبىرايىم، وردەندى لەيتەنانت حۇساينوۆ ءماتى، كاپيتان بارمانقۇلوۆ ولجاباي، مەدالدى مەرگەن ماتايەۆ زامانبەك، كاپيتان شاريپوۆ قاسىم، مەدالدى سەرجانت مامىربايەۆ ءالىمجان، لەيتەنانت نازاروۆ يسلام، وردەندى ۇلكەن لەيتەنانت يسين ماۋلەن، قوس وردەندى ۇلكەن لەيتەنانت ءبىلالوۆ ءادىل، اسكەري دارىگەر سىرلىبايەۆا ءماريام، مايور دوسانوۆ ءابدىراحمان، وردەندى قىزىلاسكەر ابدىكاريموۆ بىرگەباي، وردەندى قىزىلاسكەر وماربايەۆ مۇقان، ۇلكەن لەيتەنانت ماقامبايەۆ ءنۇردىلدا، كاپيتان قاسىموۆ قاني، ۇلكەن لەيتەنانت اتەيەۆ شازادا، كاپيتان دۇيسەمبەكوۆ عايسا، كاپيتان يساتايەۆ ىدىرىس، مەدالدى لەيتەنانت وماروۆ بەكسۇلتان، لەيتەنانت قابدۋللينوۆ قاليجار، ۇلكەن لەيتەنانت راحىمجانوۆ بالابەك، ۇلكەن لەيتەنانت قاسقارۋوۆ جىلقىباي، مەدالدى ۇلكەن سەرجانت باتالوۆ ءجۇسىپ، پودپولكوۆنيك بايىشيەۆ ساقتاعان.
مايدانداعى ارميا
You Might Also Like
-
ءبىلىم جانە عىلىم ءمينيسترى ەرلان ساعادييەۆ مەملەكەتتىك گرانتتاردىڭ تاعايىندالۋىنا قاتىستى پىكىر ءبىلدىردى.
-
سىلتي باسقان ولار جىراعا قاراي قۇلديلاپ تۇسە باستادى دا، الدا كەلە جاتقانى بەيبەرەكەت شاشىلعان تاستار اراسىندا ءسۇرىنىپ، تەڭسەلىپ كەتتى. وزدەرى قالجىراپ بىتكەن، جۇزدەرىنەن ۇزاق مۇقتاجدىق ءىزى مەن كۇي...
