InfoHub Logo

اتوپيالىق دەرماتيت — دياتەز، بالالار ەسەكجەمى، سوزىلمالى اللەرگيالىق، ياعني اۋىق-اۋىق قايتالانىپ تۇراتىن اۋرۋ. اسقىنعان كەزىندە جازىلماي، تۇراقتاپ قالۋى دا مۇمكىن. تۇقىم قۋالايدى. اكە-شەشەسىندە وسى كەسەل بولسا، بالالارىنىڭ بۇل اۋرۋعا شالدىعۋ ءقاۋپى 80 پايىز شاماسىندا.

بەلگىسى

تەرى قۇرعاپ قابىنۋعا ۇشىرايدى، قىشيدى. قول مەن اياقتىڭ بۋىن تۇستارىنىڭ، بەتتىڭ، باستىڭ، مويىننىڭ تەرىسى كەۋىپ، دۋىلداپ قىشيدى. سابيلەردە اتوپيالىق دەرماتيت ادەتتە بەتتەن، شىنتاقتان، ايتپەسە تىزەدەن بايقالادى. دەنەنىڭ باسقا تۇستارىنان دا سەزىلۋى مۇمكىن. جاسوسپىرىمدەر مەن ەرەسەكتەردە بورتكەن كوبىنە تىزە مەن شىنتاققا، مويىننىڭ ەكى قاپتالىنا، مويىنعا، قولتىققا، الاقانعا، بەتكە شىعادى.

ءورشۋى

اتوپيالىق دەرماتيت ءسابي شاقتان باستالىپ، ەسەيگەن كەزدە دە جالعاسا بەرەدى. كەيىن ءورشي كەلە اللەرگيالىق رينيتكە، كەيدە قولقا دەمىكپەسىنە دە ۇلاسۋى مۇمكىن.

قوزدىرعىشى

بوبەكتەر بۇل اۋرۋعا ءارتۇرلى اللەرگەندەردىڭ، نەمەسە اللەرگەندەر تۋعىزاتىن زاتتاردىڭ سالدارىنان شالدىعادى. ءۇش جاسقا دەيىنگى سابيلەردە ازىق-تۇلىك اللەرگەندەرى نەگىزگى ءرولدى اتقارادى. جالپى اتوپيالىق دەرماتيتتىڭ تۋىنداۋىنا كەز كەلگەن تاعام سەبەپشى بولۋى مۇمكىن. اۋرۋدىڭ جيىلىگى اس-سۋدىڭ سيپاتىنا، بالانىڭ دەنساۋلىق ەرەكشەلىگىنە بايلانىستى. ءبىر جاسقا دەيىنگى نارەستە ءۇشىن اتوپيالىق دەرماتيتتىڭ باستاپقى اللەرگەنى سيىر ءسۇتى بولىپ تابىلادى. بالانى بىرەسە ەمشەك سۇتىمەن، بىرەسە قولدان ارالاس قورەكتەندىرۋ دە سەبەپشى بولادى.

اللەرگيا نەگىزىنەن جۇمىرتقا، بالىق، تەڭىز، سيترۋس ونىمدەرى، ءجۇزىم، قىزاناق شىرىندارى، ءسابىز، قىزىلشا، ساڭىراۋقۇلاق سياقتى ازىق-تۇلىكتەردەن تۋىندايدى. سوڭعى كەزدەرى بالالاردىڭ بانان، كيۆي، اۆوكادو، قۇرما، انار سياقتى جەمىستەردەن دە اللەرگياعا ۇشىراۋى جيىلەپ بارادى. اتوپيالىق دەرماتيت شيكىلەي پايدالانعان بالدىركوك، جەلكوك، پياز، اشىعان قىرىققابات، مال جانە تاۋىق ەتىنىڭ سورپاسىنان دا ەسەلەنە تۇسۋدە.

ەرەسەكتەر ازىق-تۇلىك اللەرگياسىنا سيرەك شالدىعادى.

بالا وسكەن سايىن وعان تاعامداعى اللەرگەندەردىڭ اسەرى ازايىپ، اۋاداعى اللەرگەندەردىڭ ىقپالى كۇشەيە تۇسەدى. مۇنداي اللەرگەندەرگە ءۇي ىشىندەگى شاڭ-توزاڭدا، ءۇي جانۋارلارىندا كەزدەسەتىن ميكروسكوپيالىق كەنەلەر جاتادى.

تۋىنداۋ سەبەپتەرى:

— اۋا رايىنا جانە تەگىنە قاتىستى فاكتورلار؛

— وتباسىنىڭ تاماقتانۋ ءداستۇرى؛

— تەرى كۇتىمى ءتارتىبىن ساقتاماۋ؛       

— تۇرمىستىق قاۋىپتەر (بولمە جىلۋىنىڭ 23 گرادۋستان اسىپ كەتۋى، اۋا ىلعالدىگىنىڭ 60 پايىزدان تومەندىگى، ۇيدە حايۋاناتتار ۇستاۋ،

— بالالار وتىرعان جەردە تەمەكى تارتۋ؛

— تورىعۋ؛

— ۆيرۋستى ءجىتى جۇقپالار.      

ساقتانۋ شارالارى

ەرتە انىقتاپ، ەمدەۋ، اۋرۋدىڭ اۋىر تۇرگە اۋىسۋىنىڭ، اسقىنۋىنىڭ الدىن الادى. اۋرۋدى قوزدىراتىن كومپيۋتەر، كىلەم، تەلەديدار سياقتى شاڭ جينالاتىن زاتتاردى، بولمەنىڭ ەدەنىن، جاساۋ-جابدىقتارىن ىلعال شۇبەرەكپەن جۇيەلى تۇردە ءسۇرتىپ تۇرۋ، مال نە قۇس جۇنىنەن جاسالعان توسەك ورىن پايدالانباۋ كەرەك. سونداي-اق كۇش-قۋاتتى سارقيتىن اۋىر جۇمىسقا جەگىلمەگەن ءجون.

ەمى

ارينە وسى كۇنى دارى-دارمەكتىڭ اتوپيالىق دەرماتيتتى تەز ارادا جوياتىنىن نە باقىلاۋدا ۇستاۋعا مۇمكىندىك بەرەتىنىن ۇمىتپاۋ كەرەك. ءبىراق ول ءۇشىن تەك دەرماتولوگ-دارىگەردىڭ اقىل-كەڭەسىنە جۇگىنگەن ابزال.

ا.ە.يارۋلين جوعارى ساناتتى دەرماتولوگ-دارىگەر

---