InfoHub Logo

كۇيشى سوقىر ەسجان جاس كەزىندە كورشى اۋىلداعى ءبىر بايدىڭ اقبيكەش دەگەن قىزىنا عاشىق بولادى. اقبيكەش تە ەسجاندى ۇناتقانىمەن ەكى جاستىڭ قوسىلۋىنا الەۋمەتتىك جاعداي كەسەلىن تيگىزەدى. اقبيكەش — ونەر يەسى، ءوز اۋىلىنداعى بەلگىلى دومبىراشىلاردىڭ ءبىرى. ول ەسجانمەن ويىن-تويدا كەزدەسكەندە بىر-بىرىنە دومبىرامەن عانا سىر شەرتىسەدى ەكەن.

ارادا ەكى جىل ءوتىپ، تۇرمەنىڭ ۋاقىتىن ءبىتىرىپ، ەلىنە قايتقان ەسجان جولشىباي اقبيكەشتىڭ اۋىلىنا سوعادى. وندا ۇلكەن توي بولىپ جاتادى. بۇل اقبيكەشتىڭ ۇزاتىلار تويى ەكەنىن ەسجان بىلمەيدى.

ەسجان ءبىر ۇيدە جينالىپ وتىرعان اۋىل جاستارى مەن قارتتارىنىڭ ۇستىنە بارادى. بۇلار — «اقبيكەش اۋلىمىزداعى ون ساۋساعىنان ونەرى توگىلگەن دومبىراشىمىز ەدى، ەندى ول بىزدەن كەتىپ، سىزدەرگە بارعالى وتىر، ەڭ بولماسا، سوڭعى رەت اقبيكەشتىڭ تارتقان كۇيىن تىڭداپ قالالىق، قىزىمىزعا رۇقسات ەتىڭىز»، — دەپ، قۇدالاردان رۇقسات الىپ، وڭاشا ۇيدە اقبيكەشكە كۇي تارتتىرۋ ءۇشىن جينالىپ وتىرعاندار ەكەن.

اقبيكەش ءبىراز كۇي تارتىپ، دومبىراسىن تىزەسىنە سۇيەپ، قول ورامالىمەن ماڭداي تەرىن سۇرتەدى. وسى كەزدە ەسجان دا ۇيگە كىرىپ، بوساعادان وتىرا كەتەدى. اقبيكەش تاعى دا كۇي تارتۋعا ىڭعايلانىپ، ۇيدەگىلەردى كوزبەن ءبىر شولىپ وتكەندە ەسىك الدىندا وتىرعان ەسجانعا كوزى تۇسەدى. ەسجاننىڭ جۇدەۋ سيقىنا قاپالانىپ، مۇڭايعان اقبيكەش:

— كەلەسى كۇي «اينام قالدى» اتالادى، — دەپ دومبىراسىن تارتا بەرىپتى. كۇيدى بەرىلە تىڭداپ وتىرعانداردىڭ ءبىرى:

— مىنا دومبىرانىڭ ءۇنى شىنىندا دا «اينام قالدى، اينام قالدى» دەپ قاقساپ تۇرعان سياقتى. وسىنشاما كوپ جاساۋ دايىنداعاندا قول ۇشىنداي اينانى ساندىقتىڭ بۇرىشىنا تاستاي سالۋعا بولمادى ما ەكەن؟ — دەيدى جانىندا وتىرعان ەكىنشى ءبىر كىسىنىڭ قۇلاعىنا سىبىرلاپ.

سوندا اقبيكەشتىڭ الگىندەگى قيمىلىن سەزىپ قالعان ەكىنشى قارت:

— جوق، ولاي بولماس. مەنىمشە، وسى وتىرعانداردىڭ ىشىندە اقبيكەشتىڭ ۇناتقان جىگىتى، ايناسى قالىپ بارا جاتقان بولار. قىزدىڭ سوعان ارناپ، دومبىرامەن ايتىپ وتىرعان نازى شىعار، — دەيدى.

شىنىندا دا، بۇل كۇي اقبيكەشتىڭ ەسجاندى كورىپ مۇڭايىپ تارتقان، ەسكەرتكىش ەسەبىندەگى «اينام قالدى» اتتى كۇيى ەكەن دەيدى حالىق اراسىندا.

---