داستارحانعا، شاڭىراققا، ءۇي يەسىنە باتا، تىلەكتەر
باتا بەرەردە اركىم «ءيا، قۇدايىم»، «ءيا، اللا»، «ءيا، جاراتقان» سەكىلدى باعىشتاۋ سوزدەرىن ءار باتانىڭ الدىنان قوسىپ ايتۋعا ەرىكتى.
ۋا، جاراتقان يەم قۇدىرەت
تىلەگىمدى قابىل ەت!
يمانىمدى كامىل ەت!
................................
*** *** *** ***
اسقا باتا
داستارحانىڭا بەرەكە بەرسىن،
باستارىڭا مەرەكە بەرسىن،
استارىڭا ادالدىق بەرسىن،
باستارىڭا اماندىق بەرسىن،
دەندەرىڭە ساۋلىق بەرسىن!
ءاۋمين!
*** *** *** ***
اشىپ تاستاپ پەيىلدى
داستارحانىڭ جايىلدى.
قاسيەتتى نان ۇلىق
بەرەكەڭ تۇر ناق ۇيىپ.
اسىل سوزدەر شاشىلدى،
بار ابىروي ب ا ق ورناپ
ەل سىيلاسىن باسىڭدى.
اڭىز بولىپ وتاۋىڭ
ايتا ءجۇرسىن اسىڭدى.
سۇيگەن جارىڭ،
بالا-شاعاڭ امان بوپ،
بۇتىندەسىن اسىلدى.
نيەتىڭە ءبىز تويدىق.
راحمەت ءشايىڭا،
ريزا ەتكەن ءبىر قويلىق!
*** *** *** ***
ءۇي يەسىنە بەرىلەتىن باتا
جاس بالانىڭ كۇلكىسىن بەر،
جاس انانىڭ ۇيقىسىن بەر.
جومارتتىڭ قولىن بەر،
جورىتقاننىڭ جولىن بەر.
قىزدىڭ قىلىعىن بەر،
سۋدىڭ تۇنىعىن بەر،
اساۋدىڭ ارىنىن بەر،
تۇنگى وتتىڭ جارىعىن بەر.
اسقار تاۋدىڭ پاڭدىعىن بەر،
بۇلبۇل قۇستىڭ تاڭعى ءۇنىن بەر.
دالانىڭ جازىقتىعىن بەر،
گۇلدىڭ نازىكتىگىن بەر.
تەڭىزدىڭ تەرەڭدىگىن بەر،
قىراننىڭ كورەگەندىگىن بەر.
ەردىڭ كوڭىلىن بەر،
بۇركىتتىڭ جىگەرىن بەر.
لاشىننىڭ جۇرەگىن بەر،
ناعىز دوستىڭ تىلەگىن بەر.
ماڭگى-باقي اجىراماس،
شىن عاشىقتىڭ تىلەگىن بەر!
ءاۋمين!
*** *** *** ***
ارداقتى ءۇيدىڭ يەسى،
اۋەلى بەردىڭ شاي،
كوڭىلىڭ بولسىن جاي.
ەكىنشى بەردىڭ ەت،
تاپپاسىن كوڭىلىڭ
ەشبىر دەرت!
ءۇشىنشى بەردىڭ سورپا،
بولماسىن باعىڭ ورتا!
ەكى دۇنيەنىڭ يگىلىگىنە جەتكىزسىن،
ەسىركەپ سۇيگەن پەندەسىنەن ەتكىزسىن!
*** *** *** ***
اللا جارىلقاسىن،
كىمدى جارىلقاسا،
سونىڭ جاعىندا قالسىن!
جاماننىڭ الدىندا قالسىن!
جورتقاندا جولىڭ بولسىن،
اداسساڭ، اللا جولعا سالىپ ءجۇرسىن،
سۇرىندىرتپەي الىپ ءجۇرسىن،
مىڭ سان بالە، ءقاۋىپ قاتەردەن قاعىپ ءجۇرسىن!
*** *** *** ***
ۋا، جاراتقان – قۇدىرەت!
مال-جاندارىن امان ەت،
باسىنا بەر زور باقىت.
اسىڭا بەر بەرەكەت،
عۇمىر-جاسىن ۇزاق ەت.
ۇرپاقتارىن اسىل ەت،
كاسىبىن ادال كاسىپ ەت،
بالە-جالادان اۋلاق قىپ،
تاتتىرما ەش قاسىرەت،
دۇنيەنىڭ بار جاقسىلىعىن
ءدال وسى وتاۋعا ءناسىپ ەت!
*** *** *** ***
بىزگە تارتقان باسىڭىز،
ءدامدى ەكەن اسىڭىز.
ۇرپاقتار بوپ وزگەشە،
سىيلى بولسىن باسىڭىز!
دومالاسىن ورگە تاسىڭىز،
يماندى بولىپ تاسىڭىز.
كورە الماۋشى، كەرتارتپا
قۇم قاپسىن دۇشپان –قاسىڭىز،
جۇزگە جەتسىن جاسىڭىز،
ەلگە سىيلى قارت بولىپ،
ءجانناتقا قادام باسىڭىز!
قۇيعان قىزىل ءشايىڭىز،
بالداي ءتاتتى مايىڭىز،
ەسەلى بوپ ەڭبەگىڭ،
يماندى بوپ بايىڭىز!
*** *** *** ***
داۋلەتىڭدى تاستىرسىن،
ساۋلەتىڭدى استىرسىن،
اقساقالىڭ كەلگەندە
اق داستارحان جايىلىپ،
ادال اس پەن باس تۇرسىن!
ءتىل مەن كوزدەن امان بوپ،
تۇلەپ ۇشسىن جاس قىرشىن –
بايسالدى تۋعان بالاڭدى
بايتاعىنا باس قىلسىن!
ادالدان جيعان مالىڭدى
التى اتاڭا اس قىلسىن!
جاقسىمەنەن دوس قىلسىن،
جامانمەنەن قاس قىلسىن،
يمانىڭدى راس قىلسىن!
قاراۋدى قارا تاس قىلسىن،
ساراڭنىڭ كوڭىلىن ءپاس قىلسىن!
بۇل ۇيگە قاستىق قىلعاندى
ءتاڭىرىم قارا باستىرسىن!
*** *** *** ***
استىرسىن، تاستىرسىن،
جاقسىلارمەن جاناستىرسىن،
جامانداردان اداستىرسىن،
وتتىڭ باسى امان بولسىن،
بەيبىتشىلىك زامان بولسىن،
بالالارىڭ ازامات ادام بولسىن،
جاۋىڭ جەڭىلىپ قابان بولسىن!
*** *** *** ***
داستارحانىڭ توق بولسىن،
ۋايىم-قايعى جوق بولسىن!
جاردى بولساڭ جاسىما،
باي بولساڭ، تاسىما!
باق-داۋلەت بەرسىن باسىڭا،
عۇمىر بەرسىن جاسىڭا.
بالە-جالا، جىن-شايتان،
جولاماسىن قاسىڭا!
يماننىڭ بايلىعىن بەرسىن،
قۇت-بەرەكەنىڭ ءبارى كەلسىن!
*** *** *** ***
باسىڭا اللا ب ا ق بەرسىن،
نە بەرسە دە ناق بەرسىن،
ءبىلىم ناقىل ايتۋعا
جالىقپايتىن جاق بەرسىن!
ايتىپ جۇرەر ءبىلىمنىڭ
ىس-امالمەن شاق كەلسىن!
بەرەكە-قۇت پەن ىرىستى
ۇيلەرىڭە اپ كەلسىن!
قارا نيەتتى جاۋىڭا
بالەكەتى تاپ كەلسىن!
ارمان نيەتكە جەتكىزىپ،
تىلەۋىڭدى اپ بەرسىن!
مال-جان امان توق بولسىن،
قايعى-قاسىرەت جوق بولسىن!
داستارحانىڭ اق بولسىن،
شاڭىراققا ب ا ق قونسىن!
بالالارىڭ كوپ بولسىن،
تاماعى توق، كيىمى كوك بولسىن،
يمانى مىعىم بەك بولسىن،
ءسوزى تۋرا ءدوپ بولسىن!
*** *** *** ***
حاق قاراسىن،
ب ا ق دارىسىن.
داستارحانعا بەرەكە بەرسىن،
ەلگە داۋلەت-مەرەكە بەرسىن.
شىققاننىڭ ەسەسىن بەرسىن،
قالعاننىڭ بەرەكەسىن بەرسىن،
كەڭ پەيىل بەرسىن،
ۇزاق ءومىر بەرسىن،
وت اينالا باس بەرسىن،
ءورىس تولى مال بەرسىن.
مال بەرسە، قايىرىن بەرەكەتىمەن بەرسىن،
باس بەرسە، ازىق-نەسىبەسىمەن بەرسىن!
*** *** *** ***
اقىلىڭدى استىرسىن،
ىقىلاسىڭدى تاستىرسىن،
بالاڭ ءۇبىرلى بولسىن،
قىزىڭ ءشۇبىرلى بولسىن!
جاقىن كوپ بولسىن،
جاۋىڭ جوق بولسىن!
جاقسى كەلسىن قاسىڭا،
نۇر جاۋسىن ءازىز باسىڭا!
كوشىڭ كولىكتى بولسىن،
قونىسىڭ تۇلىكتى بولسىن،
قاتۋلىقتان اۋلاق بول،
تاتۋلىققا جاقىن بول!
داۋرەنىڭ يمانمەن ءساندى بولسىن،
عۇمىرىڭ بىلىممەن ءماندى بولسىن!
*** *** *** ***
داستارحانعا باتا
ءاۋمين دەسەڭ بەردىم باتا
قابىل ەتىپ ءبىر اللاھ
باق-داۋلەت، بەرەكەت
ۇيىڭىزگە ۇيالاسىن.
جاراتقان يەم امان قىلسىن
بىزگە بەرگەن ءشايىڭىز -
جاقسى بولسىن ءجايىڭىز.
بىزگە بەرگەن ەتىڭىز -
قابىل بولسىن نيەتىڭىز.
ماقساتىڭا جەتىڭىز،
بىزگە بەرگەن ءتۇز-دامىڭىز
تاۋسىلمايتىن نەسىبە بولىپ،
امان-ساۋ بولايىق ءبارىمىز.
ءاۋمين، اللاھۋ اكبار!
*** *** *** ***
ءيا، جاراتقان قۇدىرەت،
مال-باستارىن امان ەت،
باسىنا بەر باقىت،
اسىنا بەر بەرەكەت،
ءومىر-جاسىن ۇزاق ەت،
ميحناتتان امان ەت،
دۇشپانىنىڭ كۇنىن جامان ەت،
ۇرپاقتارىن اسىل ەت،
دۇنيەدەگى جاقسىلىقتى،
ءدال وسى ۇيگە ءناسىپ ەت
ءاۋمين.
*** *** *** ***
قۇدايىم وسىناۋ ۇيگە دۋا بەرسىن،
ءتىل-اۋزىن دۇشپاننىڭ بۋا بەرسىن.
كەلىننىڭ بالاعىنان بالا ساۋلاپ،
سالپى ەرىن سارى ۇلدار تۋا بەرسىن.
*** *** *** ***
اسىڭ، اسىڭ، اسىڭا،
بەرەكە بەرسىن باسىڭا!
بودەنەدەي جورعالاپ،
قىرعاۋىلداي قورعالاپ،
قىدىر كەلسىن قاسىڭا!
سەنەن بايلىق وتپەسىن،
ءتاڭىرى بەرگەن بەرەكەڭ
تەپكىلەسە كەتپەسىن.
جەلىڭنىڭ ەكى شەتىنە،
تاي شاپتىرسا جەتپەسىن!
*** *** *** ***
كەشكە كەلىپ جامىراسقان،
شۋىلداسىپ ماڭىراسقان،
قوشاقاننىڭ اناسى،
سالىق باسسىن ءۇيىڭدى!
باقايلارى سىرتىلداپ،
مۇيىزدەرى جىلتىلداپ،
بۇزاۋلاردىڭ اناسى
سيىر باسسىن ءۇيىڭدى.
شۋدالارىن شاڭ باسقان،
ارتقى وركەشىن قوم باسقان،
بوتاقاننىڭ اناسى
ىنگەن باسسىن ءۇيىڭدى!
شىڭگىر-شىڭگىر كىسىنەسكەن،
سۇيىستىكپەن يىسكەسكەن،
قۇلىنشاقتىڭ اناسى
بيە باسسىن ءۇيىڭدى.
*** *** *** ***
بەرەيىن باتا اسىڭا،
اماندىق بەرسىن باسىڭا.
بودەنەدەي جورعالاپ،
قىدىر كەلسىن قاسىڭا،
بار ەكەم دەپ تاسىما،
جوق ەكەم دەپ جاسىما.
ەڭبەك ەتسەڭ ەرىنبەي،
داۋلەت كەلەر قاسىڭا.
كورە الماعان دۇشپاننىڭ،
جۋا ءبىتسىن جولىنا.
باقىتىڭ جەتسىن توتەلەپ،
دۇنيە مالدى جەتەلەپ،
اۋزىما تۇسكەن باتانىڭ
جاتىرمىن ءبارىن تۇگەندەپ!
كوتەردىك مىنە بىلەكتى،
اقتاردىم تۇگەل تىلەكتى،
مىناۋ تۇرعان بالاڭىز،
باتىر بولسىن جۇرەكتى.
*** *** *** ***
اۋمين دەسەڭ ماعان،
قۇداي بەرسىن ساعان.
التىننان – جاعاڭ،
كۇمىستەن – تاعاڭ.
وڭ جاعىڭنان كەتپەسىن
كۇرپىلدەك قارا ساباڭ.
جورتساڭ جولىڭ بولسىن،
جولداسىڭ قىدىر بولسىن.
تىلەۋىڭ قابىل،
مۇراتىڭ اسىل بولسىن.
ىشكەنىڭ قىمىز،
جەگەنىڭ سىرباز،
كيگەنىڭ تۇلكى بولسىن،
جۇرگەن جەرىڭ ويىن-كۇلكى بولسىن!
*** *** *** ***
قوزىعا تولسىن كوگەنىڭ،
تۇلپار بولسىن كوگەنىڭ.
قۇتتى بولسىن قۇرىعىڭ،
ءسۇتتى بولسىن قۇدىعىڭ.
قياقتى بولسىن سۇڭقارىڭ،
تۇياقتى بولسىن تۇلپارىڭ.
ءورىستى بولسىن جايلاۋىڭ،
ىرىستى بولسىن قىستاۋىڭ.
ارىستانداي بولسىن ايباتىڭ،
ايۋداي بولسىن قايراتىڭ.
گۇلگە تولسىن ءوڭىرىڭ،
كوڭىلدى ءوتسىن ءومىرىڭ.
اسقا تولسىن تاباعىڭ،
اشىق بولسىن قاباعىڭ.
*** *** *** ***
شايىڭ قىزىل بولسىن،
عۇمىرىڭ ۇزىن بولسىن.
نەسىبەڭ تاسا بەرسىن،
دۇشپانىڭ قاشا بەرسىن،
قۇدايىم ۇزاق عۇمىر جازا بەرسىن!
*** *** *** ***
پەيىلىڭە قوناقجاي
باتا بەرەم قولىڭ جاي:
اق جارىلعان جۇرەگىڭ،
قابىل بولسىن تىلەگىڭ.
بىزگە سويدىڭ سەمىز تاي،
ءتورت تۇلىگىڭ بولسىن ساي.
ءوسىپ-ونىپ ۇرپاعىڭ،
ءتورت قيىرعا قانات جاي!
بىزگە سويدىڭ قۇلىن،
جاقسىدان بولسىن جۇعىم.
ءومىرىڭدى ۇزارتىپ،
وزىڭنەن وتە تۋسىن ۇلىڭ.
بىزگە سويدىڭ مارقانى،
الدىڭنان تارقات ارقانى.
سىيلى بولىپ ەلىڭە،
سىباعاڭدى ال تاعى.
بىزگە سويدىڭ قوي،
ۇيىڭنەن كەتپەسىن توي.
قىزىعىنا قانىپ،
ىشپەي-جەمەي توي.
بىزگە سويدىڭ توقتىنى،
ەلىڭنىڭ بۇل توقتىعى.
ابىروي الىپ ۇل-قىزىڭ،
بيىك بولسىن شوقتىعى.
*** *** *** ***
بىزگە استىڭ باس،
بەرسىن ساعان ۇزاق جاس.
اۋىزدىقتاپ اساۋدى،
اسۋدان اسۋعا اس!
بىزگە استىڭ جامباس،
جاقسىمەن بول جانداس.
ىقىلاسىڭ قابىل بوپ،
ىرىسىڭ تولماي قالماس.
بىزگە استىڭ سىباعا،
جاماندىق كورمە ءسىرا دا.
قيانات قىلما پەندەگە،
جاعامىن دەسەڭ قۇداعا.
بىزگە استىڭ قازى،
بولدىق سىزگە رازى.
اق ماي اقسىن اۋزىڭنان،
ۇزىلمەي قورىڭ قىسى-جازى.
بىزگە استىڭ جايانى،
ءومىردىڭ بولسىن بايانى.
بولساڭ دا ءتولدىڭ جىلقىسى،
جۇرتىڭنىڭ بولما ساياعى.
بىزگە استىڭ جال،
باسىڭا ءبىتسىن دۇنيە-مال.
اتا-اناڭدى ارداقتاپ،
اياق-قولىن جىلى سۋعا مال.
بىزگە استىڭ ومىرتقا،
پالە-جالاعا جولىقپا.
ءورىسىڭ باردا ورگە شاپ،
وز-وزىڭنەن تورىقپا.
بىزگە استىڭ شۇجىق،
كورگەنىڭ بولسىن قىزىق.
اققۋ-قازداي مامىرلا،
ايدىنىڭدا ءجۇزىپ.
بىزگە استىڭ جاۋىرىن،
بالانىڭ بەرسىن ءتاۋىرىن.
ىزەت كورىپ ىنىدەن،
ۇزىلمەسىن ساۋىعىڭ.
بىزگە استىڭ سۇبە،
قىرسىعىڭ جەرگە ەنسىن تۇگە!
كۇندەگەندى كۇڭىرەنتىپ،
كۇننەن-كۇنگە ۇدە.
بىزگە استىڭ ءتوس،
ۇرىم-بۇتاعىڭمەن ءوس!
جايلانىپ قون،
جازىلىپ كوش!
*** *** *** ***
بىزگە استىڭ جىلىكتى،
ۇل-قىزىڭ بولسىن بىلىكتى،
بىزگە استىڭ بەلدەمە،
سىيلى بول باسقا ەلگە دە.
بىزگە استىڭ كەسەك ەت،
داۋلەتىڭ تاسسىن ەسەلەپ.
سىيلاپ بەردىڭ ەتىڭدى،
جارىلقاسىن بەتىڭدى.
ەندى اكەلدىڭ سورپاڭدى،
ورىنداتسىن قولقاڭدى.
كەلدى تاعى قىمىزىڭ،
ارىلماسىن قىزىعىڭ.
قويدىڭ قايماق، ايرانىڭ،
امان بولسىن اۋىل-ايماعىڭ.
جازدىڭ جايما، باۋىرساق،
بولا بەرسىن قاۋىم شات.
جانە كەلدى قۇرت-مايىڭ،
تۋا بەرسىن قۇتتى ايىڭ.
راقمەت دامىڭە،
ريزالىق بەرسىن بارىڭە.
امان بولىپ باسىڭىز،
جۇزگە جەتسىن جاسىڭىز.
*** *** *** ***
ماعان جاپتىڭ شاپان،
كوڭىلدە بولماسىن قاپاڭ.
ماعان مىنگىزدىڭ ات،
قىز ۇزاتىپ، قىزىعىنا بات!
ماعان اتادىڭ جول،
ۇل ءوسىرىپ مارە-سارە بول!
ماعان بەردىڭ ەت،
كەلىن ءتۇسىرىپ، تىلەگەنىڭە جەت!
ماعان بەردىڭ ساۋعا،
باسىڭ تۇسپەسىن داۋعا!
الدىما سالدىڭ مال،
اللادان راقمەت ال!
*** *** *** ***
ەت – سىزدەن،
ىقىلاس، نيەت بىزدەن.
تىلەۋى اقتى ءتاڭىرىم
مۇراتىنا جەتكىزگەن.
جاقسى-جاماندى كورىپ ب ا ق.
بار مەن جوققا كونىپ ب ا ق.
ءاششى-تۇششىنى تاتىپ كور،
تايىز-تەرەڭدى باتىپ كور!
ەل باسىنا تۇسكەن سىندى،
ءتۇز كەشىپ، ءتۇن قاتىپ كور.
جيىندى توپقا تۇسكەندە،
جۇيرىگىڭ باپتاۋلى بولسىن،
جىگىتىڭ ماقتاۋلى بولسىن.
جورتۋىل، جورىق جولىقسا،
نايزاڭ ساپتاۋلى بولسىن.
نوكەرىڭ ساقتاۋلى بولسىن.
داستارحانىڭ توق بولسىن،
ۋايىم-قايعى جوق بولسىن.
امان ساقتاپ،
ابىروي بەرسىن!
جورىتقاندا جولىڭ بولسىن!
*** *** *** ***
شاڭىراق شالقي بەرسىن.
كەرەگەڭ كەڭي بەرسىن.
وسى ۇيگە ان-كۇي كەلسىن،
دۇشپانىڭ كەمي بەرسىن.
داستارحانعا بەرەكە بەرسىن.
كۇندە مەرەكە بولسىن.
قاستىق ويلاعاندار،
قاباعى اشىلماي كەلەكە بولسىن.
ءاۋمين
*** *** *** ***
اۋەلى قۇداي وڭداسىن،
ارۋاقتارىڭ قولداسىن.
باقىت پەن داۋلەت، باس پەن مال،
باسىڭا ماڭگى ورناسىن.
ءتورت قۇبىلاڭ ساي بولسىن،
ساعان قاستىق ويلاعان
عۇمىرىندا وڭباسىن.
اقىلدى بول، ارلى بول،
باقىتتى بول، مالدى بول،
قاتارىڭنىڭ الدى بول!
ءاۋمين
*** *** *** ***
بەرەكەمىز قاشپاسىن،
بەلىمىزدى ەشكىم باسپاسىن،
ادال جان بولىپ استاسىڭ،
ارىڭدى كۇلدەي شاشپاسىن.
باقىت بولسا باستاسىڭ،
مەيمانىڭ، ءسىرا، تاسپاسىن،
تىرلىكتە ءتۇزۋ جول تاپساڭ،
ءتاڭىرىم بەرەر باسقاسىن.
ءاۋمين
*** *** *** ***
اۋەلى قۇداي ەسەن ەت،
جيرەنشەدەي شەشەن ەت،
اتىمتايداي كوسەم ەت،
لۇقپانداي بەرەگەن ەت.
ءيبراھيمنىڭ باسىن بەرسىن،
سۇلەيمەننىڭ تاقىتىن بەرسىن.
قىدىر قۇسى قونسىن باسىڭا.
جورتقاندا جولىڭ بولسىن،
جولداسىڭ قىدىر بولسىن.
جوعارى بولسىن جۇلدىزىڭ،
باقىتتى بولسىن ۇل-قىزىڭ.
اس يەسى بايىسىن،
بار ويلاعان ارمانىڭ،
جاقسىلىققا سايىسىن.
ءاۋمين
*** *** *** ***
قازان-وشاعىڭ ماي بولسىن.
ءتورت تۇلىگىڭ ساي بولسىن.
كوڭىلىڭ تولىپ جاي بولسىن.
ۇلىڭ قونىپ قياعا،
قىزىڭ قونىپ قياعا،
كەلىنىڭ ءبيبى اتانىپ،
ۇلىڭ بولسىن بي اعا.
بەرگەننەن اللا تانباسىن،
كوبەيە بەرسىن مال باسىڭ،
وسە بەرسىن جان باسىڭ،
ارمانىڭ كوككە سامعاسىن.
دوسىڭنان كوڭىلىڭ قالماسىن،
جاعاڭنان دۇشپان الماسىن،
جولىڭ بولىپ جورتقاندا،
جولىڭدى قىزىر جالعاسىن.
ءاۋمين
*** *** *** ***
بەرەكە بەرسىن باسىڭا،
ب ا ق قونسىن باسىڭا.
بالىن تاتىپ ءومىردىڭ
جامبىلدىڭ جەت جاسىنا.
قۋانىشپەن دوستارىڭ
جينالا بەرسىن قاسىڭا.
قويىڭ قوزداپ ەگىزدەن،
ەشكىڭ تۋىپ سەگىزدەن.
مايدان قولىڭ كەتپەسىن،
سوعىمىڭ بولىپ سەمىزدەن.
ايتىپ ءجۇرسىن قوناعىڭ
تاڭدايدان كەتپەي جەگىزگەن.
شالقىپ جاتسىن داۋلەتىڭ،
تاسىعان سەلدەي تەڭىزدەن.
باياندى اللا ب ا ق بەرسىن،
ادالىن بەرسىن، اق بەرسىن.
اتاعىڭ كەتىپ الاشقا،
استىڭا التىن تاق بەرسىن.
ءاۋمين
*** *** *** ***
بەرەكە بەرسىن اسىڭا.
ءاۋمين
*** *** *** ***
قۇداي جارىلقاسىن،
ب ا ق قاراسىن،
قىدىر دارىسىن!
ايدان امان،
جىلدان ەسەن قىلىپ،
ۇيدەگى، تۇزدەگى
مال-باستى امان قىلسىن!
ءاۋمين
*** *** *** ***
داستارحانىڭ مايلى،
كوڭىلىڭ جايلى بولسىن.
ومىرىڭە نە تىلەسەڭ،
تىلەگىڭ قابىل بولسىن.
ءاۋمين
*** *** *** ***
داستارحانىڭنان ءدام كەتپەسىن،
كوڭىلىڭنەن ءسان كەتپەسىن.
ءاۋمين
*** *** *** ***
You Might Also Like
-
كۇيشى سوقىر ەسجان جاس كەزىندە كورشى اۋىلداعى ءبىر بايدىڭ اقبيكەش دەگەن قىزىنا عاشىق بولادى. اقبيكەش تە ەسجاندى ۇناتقانىمەن ەكى جاستىڭ قوسىلۋىنا الەۋمەتتىك جاعداي كەسەلىن تيگىزەدى. اقبيكەش — ءون...
-
جولىڭدى اللا قولداسىن، جامانشىلىق بولماسىن. سەنىمدى بولسىن جولداسىڭ، جولىڭدى كەسكەن وڭباسىن. ءساتتى بولسىن ىستەرىڭ، جاقسى بولسىن تۇستەرىڭ، جۇمساق بولسىن ىشكەنىڭ. كورمەگەن جەردى كورىپ قايت، ى...
