InfoHub Logo

ىقىلاستىڭ تۋعان جەرى — تاما اكىمشىلىك تۇرعىسىنان ول كەزدە اقمولا ۋەزىنە باعىناتىن. وياز باستىعى، باسقاشا ايتقاندا «دۋانباسى» ەردەن دەگەن بىرەۋ بولادى. ول ەشكىمنەن، ەشنارسەمەن ساناسپاعان نيەتى قارا، قاتال جان اتانادى. ول اسىرەسە نەگىزگى تۇرعىندارى ارعىن رۋى بولىپ سانالاتىن بۇل جەرگە اۋىپ كەلگەن تاما رۋىنا تىم قىسپاقتىق جاسايدى. ەكى رۋدى تالاستىرىپ، ەردەن ءوزىنىڭ باس قامىن ويلايدى. ءبىر كۇنى
تاما رۋىنىڭ وكىلى جيناعان الىم-سالىققا مۇسە تۇتپاعان ەردەن، ارعىندارمەن شەكتەس وتىرعان تامالاردىڭ جىلقىسىن قۋىپ اكەلۋگە ءوز شابارماندارىن جۇمسايدى. تامانىڭ ادامدارى «ابىرويلى، بەدەلدى» ەردەنگە كەلىپ ەشبىر جازىقتارىنىڭ جوق ەكەنىن، ءتيىستى الىم-سالىقتارىن تيىسىنشە تولەگەندەرىن ايتىپ، مال-مۇلىكتەرىن قايتارىپ بەرۋىن وتىنەدى. ولاردىڭ سوزدەرىن قۇلاعىنا ىلمەگەن ەردەن، ءتىپتى «تۇرمەگە ايدايمىن»
دەپ قورقىتادى. ءتىپتى، ول ول ما، ەردەننەن كوڭىلى قالعان ونىڭ ءبىر اتشابارمانى ىقىلاستى قامشىمەن سابالاپ بالەعاتتاپ ونىڭ جالعىز اتىن تارتىپ الادى، قوبىزىن تاعى سىندىرماقشى بولادى. اشۋعا بۋلىققان ىقىلاس جاياۋ بولسا دا اقمولاعا بارىپ «دۋانباسىنا» ءوز كوزىمەن كورگەن اتشابارمان ادىلەتسىزدىگىن ايتۋعا بەل بۋادى. ءبىراق اۋىلداستارى ىقىلاستىڭ بۇل ويىن ماقۇلدامايدى. ەردەن ول ويلاعانداي اقكوڭىل ەمەس، ول قايتا ءبىزدىڭ جىلقىمىزدى قايىرىپ بەرۋدى وتىنگەن اقىلدى ازاماتتارىمىزدى دىمسىز قۋىپ جىبەرگەن، «ول، سەنى، ىقىلاس ءتىپتى كىسى قۇرلى كورمەيدى» دەيدى ولار.

ءبىراق ىقىلاس اۋىلداستارىنىڭ بۇل اقىلىن تىڭدامايدى. جولدا ول «جالعىز اياق» كۇيىن شىعارادى. «ەگەر بي ءبىر اۋىلدى عانا بيلەسە، — دەيدى ىقىلاس، — مەندە جۇرەگى تازا، ار-ۇياتى بار ادامداردى بيلەيتىن كۇش بار، مەندە، مەنىڭ ءوتىنىشىمدى «جارىم پاتشانىڭ» ءوزىن تىڭداۋعا ءماجبۇر ەتەتىن قوبىز بار».

جولدا — اقمولاعا جاقىنداعاندا، ىقىلاس ەردەننىڭ سۇيىكتى ۇلى ايمەندەنىڭ ءولىپ، ونىڭ اۋىر قازاعا ۇشىراعانىن، ەردەننىڭ كەڭسەسىندە سيرەك بولاتىنىن ەستيدى. قولتىعىنا قوبىزىن قىسىپ، ىقىلاس ەردەن ۇيىنە كەلەدى. الدىنان قارسى شىققان ەردەننىڭ مالايى «دۋانباسىنىڭ» ۇيدە ەكەنىن، باقسىنى قابىلداۋعا قۇشتار ەكەنىن ايتادى. ول كەزدە قوبىز ۇستاعاننىڭ ءبارى باقسى اتاناتىن. باسىن تومەن ءتۇسىرىپ، ىقىلاس ءتور ۇيگە كىرەدى. قايعىسىنا ورتاقتاسقانداي بولىپ، ول قىسقاشا دۇعا وقيدى دا، ءوزىنىڭ قوبىزىن الا سالىپ قايعىلى-قازالى كۇيىن ويناي باستايدى. كۇيدىڭ مۋزىكاسىنا شىداي الماعان ەردەن مەن ونىڭ ءۇي-ىشى ۇزاق جىلاسادى. قايتالاپ تاعى جانە تاعى وينا دەگەندەي ەردەن ىقىلاسقا باسىن يزەپ بەلگى بەرەدى. كوڭىلى تولعان ەردەن ىقىلاسقا جاقسىلاپ قوناعاسىن بەرىپ، كەتەرىندە: «قانداي ءوتىنىشىڭ بار ەدى؟» — دەپ سۇرايدى. «مەنىڭ ءبىر عانا ءوتىنىشىم بار، ەگەر مۇمكىندىگى بولسا، تاما رۋىنىڭ جىلقىسىن قايتارىپ بەرگىزۋىڭىزدى سۇرايمىن»، — دەدى ىقىلاس. ەردەن بۇل ءوتىنىشىن
ورىندايتىنىنا ۋادە بەرەدى، ىقىلاستىڭ تاعى بىرنەشە ۇيىندە جاتىپ، ءوزىنىڭ قوبىز ويناپ، ءۇي ءىشىنىڭ كوڭىلىن اۋلاۋىن وتىنەدى. ەردەننىڭ ۇلى ايمەندە ولىمىنە ارناپ شىعارعان ىقىلاس كۇيى حالىق اراسىنا «ەردەن كۇيى» اتانىپ تاراپ كەتكەن.

---