InfoHub Logo

زەرتتەۋلەردىڭ ناتيجەسىنە سۇيەنەر بولساق، بالا تاربيەسىندە ءۇش بۋىن (generation — ۇرپاق) بىرگە بولعان كەزدەبالا ءۇشىن وتە پايدالى بولادى ەكەن. ال بۇل ءۇش بۋىنعا كەلسەك، ولار: بالا، اكە-شەشە، اتا-اجە. دەمەك، بالا، اكە-شەشە، اتا-اجەسىمەن بىرگە بولعان كەزدە ونىڭ دامۋىنا ەرەكشە اسەر ەتەدى ەكەن.

اتا-اجە — ءبىزدىڭ بايلىعىمىز، بەرەكەمىز. قولدا بار التىننىڭ ءقادىرىن ءبىلۋىمىز كەرەك. كەز كەلگەن بالا اتا مەن اجەنىڭ مەيىرىم-ماحابباتىن اڭسايتىنى بارىمىزگە ءمالىم. سەبەبى اتا-اجەنىڭ نەمەرەسىنە دەگەن ماحابباتى ەرەكشە. مۇمكىن، جاسى كەلىپ، دانالىققا قول جەتكىزگەندىكتەن، بالالاردىڭ پەرىشتەگە ءتان پاكتىگىن انىعىراق بايقاپ، ولاردىڭ بالالىقپەن ىستەگەن كەز كەلگەن قىلىعىنا شىدامدىلىق تانىتا الاتىن شىعار.

ال كەيبىر اتا-اجەلەرىمىز ءوزىنىڭ اتا-اجە ەكەنىن ۇمىتىپ، اكە-شەشەنىڭ ورنىن باسۋعا تىرىسادى. وزدەرىنە «اكە»، «شەشە» دەگىزىپ، ال بالانىڭ ءوز اكە-شەشەسىن «اعا»، «جەڭگە» دەگىزىپ جاتادى. ءتىپتى كەيدە ءوز اتىمەن اتاتاتىندار دا كەزدەسەدى. مىنە، بۇل اتا-اجە ماحابباتىنىڭ شەكتەن شىعۋى.

نەگىزىنەن، بالانىڭ اكە-شەشەسى جانە اتا-اجەسى بولۋى كەرەك. ەگەر اتا-اجە اكە-شەشەنىڭ ورنىن باسسا، وندا جوعارىدا ايتىلعان زەرتتەۋدەگى ءۇش بۋىن تاعى دا تولىق بولماي قالادى. سوندىقتان اركىم ءوز ءرولىن دۇرىس سومداپ، جاۋاپكەرشىلىكپەن تولىق سەزىنسە، بالانىڭ تاربيەسىنە دە، تۇلعالىق دامۋىنا دا جاقسى اسەر ەتەدى.

اكە-شەشەسىنەن ەرتە اجىراپ قالعان بالا اكە-شەشەسىنە باۋىر باسا المايدى. بالا مەن اكە-شەشە اراسىندا سەزىمتال بايلانىس ورنامايدى. جالپاق تىلمەن ايتار بولساق، بالا ءوزىنىڭ اتا-اناسىنا جانە تۇعان باۋىرلارىنا بوتەن بولىپ قالادى. ۋاقىت وتە كەلە ءوزىنىڭ ۇياسىنا ورالعان كەزدە ءسىڭىسىپ كەتۋى وتە قيىن بولماق. بالا ءوز اناسىنا قۇشاعىن اشىپ «اناشىم» دەپ بارىپ قۇشاقتاي المايدى. اناسى دا ءدال سونداي كۇي كەشىپ، ءوزىنىڭ باسقا بالالارىنا كورسەتكەن مەيرىم-ماحابباتىن بۇل بالاسىنا كورسەتە الماي قىنجىلادى.

---