- 01 ءشىل. 2022 00:00
- 445
بالانىڭ بولاشاعىنا بالتا شاپپا!
ەگەر بالاڭىزدىڭ بولاشاعىنا بالتا شاۋىپ، ەرتەڭىن قاراڭعى تۇنەككە اينالدىرعىڭىز كەلسە، مىنا ءۇش نارسەنى سەزىندىرىڭىز:
1. ءوزىن ءقادىرسىز سەزىنۋ
2. كىنالى سەزىنۋ
3. جەتكىلىكسىز (كەم) سەزىنۋ
مىنە، وسى ءۇش نارسەنى سەزىنگەن بالا ءوزىن باقىتسىز سەزىنەدى جانە ومىردە ءوز كەتىگىن تاۋىپ، كىرپىش بولىپ قالانۋدا قينالادى. بۇل ءۇش سەزىم ونىڭ جاعاسىنا جابىسىپ، توردەگى باسىن تابالدىرىققا سۇيرەيدى.
اشىپ ايتار بولساق:
1. ءقادىرسىز سەزىنۋ دەگەنىمىز – بالانىڭ «ءوز اتا-اناسىنىڭ، ۇستازىنىڭ، دوستارىنىڭ الدىندا ەش ءقادىرىم جوق» دەپ ويلاۋى.ياعني، ءوزىن كەرەكسىز سەزىنۋ دەسەك تە بولادى. ال قادىرسىزدىك سەزىمى – وتە اۋىر جۇك.
2. كىنالى سەزىنۋ. ەگەر اتا-انا بالانىڭ ىستەگەندەرىنە، قىلىقتارىنا نەمەسە ايتقانىنا كوڭىلى تولماي، بالانى كىنالاي بەرسە، بالا ءوزىن كىنالى سەزىنەتىن بولادى. كىنالى سەزىنۋ دە بالانىڭ بولاشاعىنا بالتا شاباتىن وتە اۋىر سەزىم. ول سەزىم بالانىڭ بالالىق شاعىن قيىنداتقانى سەكىلدى ءومىر بويى ونىڭ جاعاسىنان تۇسپەيدى.
3. جەتكىلىكسىز (كەم) سەزىنۋ. بالا اتا-اناسىنىڭ، ۇستازىنىڭ نەمەسە باسقا دا جاقىنىنىڭ كوڭىلىنەن شىعا الماي، ولاردىڭ قويعان تالاپتارىن دۇرىس ورىنداي الماي قينالعان كەزدەوزىن جەتكىلىكسىز سەزىنەدى. «مەن ورىنداي المادىم، دەمەك، مەندە پروبلەما بار، (ءبىر نارسە جەتپەي تۇر)» دەگەن ويلار ونى جەي باستايدى.
«مەن سەنىڭ جاسىڭدا...» دەپ باستالاتىن اڭگىمەلەرى ارقىلى بالاسىنا قىسىم جاسايتىن «ماقتانشاق» اتا-انانىڭ بالاسى ءوزىن جەتكىلىكسىز سەزىنەدى.
وسى 3 سەزىمدى سەزىنۋگە جەتەلەيتىن ارەكەتتەر؛ ەسكەرتۋ؛ سالىستىرۋ؛ ايقايلاۋ؛ ۇرسۋ؛ ۇرۋ؛ جازالاۋ؛ كىنالاۋ.
بالا — جازۋ تۇسپەگەن تاقتا سەكىلدى. وعان نە جازاسىز، كەيىن سونى ءوزىڭىز وقيسىز. بالانى بارىنشا مادەنيەتتى، ءبىلىمدى، يماندى، اقىلدى قىلىپ جەتىلدىرۋ ءوز قولىڭىزدا.
ەلجاس ەرتاي ۇلى، «بالانى جازاسىز تاربيەلە» كىتابىنان