InfoHub Logo

وتان — وتباسىنان باستالادى. وتباسى — قوعامنىڭ ەڭ كىشى بولشەگى. ياعني مەملەكەت نەمەسە ۇلت وتباسىلاردان قۇرالادى. ەگەر وتباسى دەگەن كىشى بولشەكتەر قۇندى بولسا، وندا قوعام دا مىقتى بولماق. ال ەگەر وتباسىدا شاڭىراق شايقالا باستاسا، قوعام دا ءىرىپ-شىري باستادى دەگەنگە سايادى. سوندىقتان قوعامدى تۇزەتۋ ءۇشىن وتباسى ينستيتۋتىنا ەرەكشە كوڭىل ءبولۋىمىز كەرەك.

ەلىمىز اجىراسۋ ستاتيستيكاسى بويىنشا الەمدە العاشقى وندىققا كىرەدى. جىل سايىن ءجۇز مىڭنان استام جۇپ وتباسىن قۇرسا، ونىڭ جارتىسىنا جاقىنى اجىراسىپ كەتەدى ەكەن. سونىمەن قاتار، جىل سايىن 40 مىڭنان استام بالا جارتىلاي وتباسىدا تاربيەلەنۋشىلەر قاتارىنا قوسىلادى نەمەسە حالىق اراسىندا قولدانىلاتىن اتاۋمەن اتاساق، «ءتىرى جەتىم» اتانادى.وسى كورسەتكىشتەردىڭ ءوزى-اق وتباسى ينستيتۋتىنا ەرەكشە كوڭىل ءبولىنۋى كەرەك ەكەنىن بايقاتادى. ءاربىر ادام باقىتتى وتباسىن قۇرۋعا نەمەسە باقىتتى وتباسى بولۋعا تىرىسۋ كەرەك. ويتكەنى باقىتتى وتباسى شاڭىراعىنان باقىتتى ۇرپاق دۇنيەگە كەلەدى. باقىتتى ۇرپاقتان قۇرالعان ۇلت تا، قوعام دا باقىتتى بولماق.

باقىتتى وتباسى قالاي بولامىز؟ باقىتتى وتباسى بولۋعا وتباسى مۇشەلەرى بىردەي ۇمتىلۋى كەرەك. بىرگە ۇمتىلىپ، باقىتتى وتباسى بولۋدىڭ قىرى مەن سىرىن بىرگە زەرتتەپ، ۇيرەنگەندەرىن وتباسىلاردىڭ باستى قاعيداسىنا اينالدىرا السا، ولاردان باقىتتى جاندار بولمايدى. ەڭ باستىسى «مەندە ءبارى جاقسى»، «مەن ءبارىن بىلەمىن» دەگەن سەكىلدى الدامشى تۇسىنىكتەردەن ارىلىپ، ءوزىمىزدى جان-جاقتى دامىتۋعا، جارىمىزدىڭ جاندۇنيەسىن ءتۇسىنىپ اركىم ءوز ءرولىمىزدى جەتىك ورىنداۋعا تىرسايىق.

ە.ەرتاي ۇلى، «جۇبايىڭنىڭ جۇرەگىن جارالاما، جاۋلا» كىتابىنان

---