باقا مەن كىرپى
كولشىك ماڭىنداعى كوگالدا باقا مەن كىرپى ءبىر-بىرىنىڭ ءتۇرىن كورىپ، قايران قالىسىپتى. كوزى بادىرايىپ، جۇرەگى لۇپىلدەگەن باقا:
— تۇلا بويىڭ تۇگەل تىكەنەك، نە دەگەن تۇرپايىسىڭ! – دەپتى كىرپىگە، باقاعا باتپاي بۇيىعىپ تۇرعان كىرپى:
— وزگەلەردىڭ كوزىنشە تۇلا بويىن تىرتيتىپ سەنىڭ ءتۇرىڭ دە كەلىسىپ تۇر ەكەن! ءتۇرىڭدى كورگەندە، دەنەمنىڭ تۇرشىككەنىن-شى! – دەپ، تىكەنەكتەرىن تىكىرەيتىپ، تۇمسىعىن تىجىرايتىپ، كۇلىپ جىبەرىپتى.
ەكى اياعىمەن جەر تىرەپ، ەڭسەسىن كوتەرىپ، كولباقا ىشتەي سەسكەنسە دە ەسەسىن جىبەرگىسى كەلمەي:
— وسى كوكمايساعا ءبىر اۋناماي، ءومىر بويى تىكەنەك ارقالاعان تىرشىلىگىڭ قۇرىسىن! – دەپتى كومەيى بۇلكىلدەپ.
— بۇت-بوربايىڭدى شوپكە جىرعىزىپ، جالاڭاش جۇرگەن سەنىڭ تىرشىلىگىڭ قۇرىسىن! – دەپتى، كىرپى تىكەنەك ارقاسىن شەگىرگە ۇيكەپ-ۇيكەپ قويىپ.
باقا سول تىكەنەك وزىنە قادالعانداي قايمىعىپ، بىلاي دەپ باقىلداي جونەلىپتى:
جان سايا دەپ بىلگەنىم،
جالعىز عانا كول مەنىڭ.
جاپ-جالاڭاش جۇرگەنىم،
ءجاي-مانىسى سول مەنىڭ.
جالىنايىن مەن كىمگە،
جان قىسىلسا ءاردايىم.
سۋعا دەرەۋ سۇڭگۋگە
جالاڭاشپىن داپ-دايىن...
باقا جايىن تۇسىنگەن كىرپى دە قىرتىسى جازىلىپ، ءتىل قاتىپتى:
بار شىنىڭدى بۇكپەگەن،
بىرەۋ كورسە بۇكتەلەم،
ءولى-تىرىم سەزىلمەي.
دومالانعان تىكەنگە
كوزى بارلار جولاي ما!
كونە قويماس يكەمگە
مەن ءبىر جاتقان شوڭاينا!
جىلاندى دا جابىسىپ،
جىلجىتپاۋدىڭ ەبى - وسى.
قامشىلاسا الىسىپ،
قان بولادى دەنەسى!
كىرپى سونى ايتىپ، جىلان ۇستاعانداي جيىرىلا قويىپتى، باقا شوپ ەتىپ سۋعا سۇڭگىپ كەتىپتى.
You Might Also Like
-
كۇندەردىڭ ءبىر كۇنى جىلان جەر جۇزىندەگى جاندى مەن جانسىزدارعا مىناداي ارىز ايتادى:
