ءبارى بولعانسىڭ - ەشكىم دە ەمەسسىڭ!
(نوۆەللا)
ونىڭ ءوز قاراباسى ەشكىم دە ەمەس. ءتىپتى ءداۋىرىمىزدىڭ ەڭ جامان دەگەن پورترەتتەرىندە دە كەزدەسپەيتىن بەت-جۇزى مەن تولاسسىز، بەي-بەرەكەت، بىر-بىرىنە بايلانىسپايتىن سوزدەرىنىڭ ارتىندا سالقىندىق پەن باسقا ادامدارعا كىرمەيتىن تۇستەر جاتتى. العاشىندا ول جۇرتتىڭ ءبارى دە ءوزى سياقتى دەپ ويلاعان. الايدا وسى ءبىر بوس نارسەلەر تۋرالى سىرلاسۋ ارەكەتىنەن سوڭ-اق تانىسى سوزىنەن جاڭىلىسا باستاعان. سول سول-اق ەكەن ول باسقالاردان ەرەكشەلەنۋگە بولمايتىنىن ماڭگىلىككە ساناسىنا قۇيىپ الدى. ول رۋحاني ساۋىعۋدى ىزدەمەكشى بولعان. زامانداسىنىڭ ايتۋىنشا بولماشى لاتىنشا، ودان دا از مولشەردە گرەكشە ۇيرەنىپتى. ءسال كەيىنىرەك ول "ماقساتىما ادامي عۇرىپتىڭ قاراپايىم قاعيداسىن ورىنداسام عانا جەتەم" دەپ تۇيەدى. ماۋسىمنىڭ ۇزاق كۇنىندە اننا حەتۋەيدىڭ قۇشاعىنان سايا تابادى.
جيىرمادان اسقان شاعىندا لوندونعا كەلەدى. ءوزىنىڭ ەشكىم ەمەسىن جاسىرۋ ماقساتىندا ول ءوزىن الدەكىم ەتىپ كورسەتۋگە دە ماشىقتانىپ العان-دى. لوندوندا وعان ءوزى و باستا سول ءۇشىن جاراتىلعان كاسىپ - اكتەر كاسىبى تاپ كەلدى؛ ساحناعا شىعىپ، ونسىز دا كورگەنىن قابىلداۋعا ءازىر وتىرعان توبىردىڭ الدىندا باسقا بىرەۋدى كەيىپتەۋى كەرەك تۇعىن. شىنىندا دا، جۇرت ونى وزىنەن باسقا ادام رەتىندە قابىلداماقتى. مۇمكىن تىرشىلىكتەگى العاشقى راقاتى بولار، گيستريوندىق ەڭبەك وعان تەڭدەسى جوق قۋانىش سىيلايدى. الايدا ونىڭ دا شەگى بار تۇعىن. ساحنادان ەڭ سوڭعى مۇردە - كەيىپكەرلەر الىنا باستادى.تاعى دا بايانسىزدىقتىڭ كەرمەك ءدامىن سەزىنگەن. بۇرىنعىداي فەررەكس، ياكي تەمىرلان بولا المايتىن. بۇل - تاعى دا "ەشكىم ەمەس". ءىشى پىسقاننان باسقا كەيىپكەرلەر مەن باسقا قورقىنىشتى تاريحتار ويلاستىردى. ونىڭ دەنەسى لوندون شاراپحانالارىندا دەنە اتقارۋعا ءتيىستى شارۋالارمەن اينالىسىپ جاتقاندا - جان دۇنيەسى جەڭىلىستى بىلمەس سەزاردىڭ، بوزتورعايلاردى قورعاعان دجۋلەتتانىڭ، ادام اياعى باسپاس جەرلەردە الباستىلارمەن سىرلاسقان ماكبەتتىڭ كەيپىندە ەدى. ولار كەرەمەت تاعدىردىڭ يەسى تۇعىن. بارلىق اقيقات وبرازداردى تۇگەندەپ شىققان مىسىر پروتەيىنشە سانسىز ادامنىڭ كەيپىندە بولىپ ۇلگەرگەن مۇنداي پەندە الەمدە ساناۋلى عانا! كەيدە الدەبىر سيۋجەتتەردىڭ تاساسىنان ءوزىنىڭ ناقتى بەينەسىن ەندى ەشكىم اشكەرەلەي المايدى، دەگەن نىق سەنىمى دە قىلاڭ بەرەتىن. ماسەلەن، ريچارد كەيپىندە -سانسىز ءرول سومدايتىن اكتەر ەسەبىندە كورىنسە، ياگو كەيپىنە ەنىپ، "بۇل - مەنىڭ ءوزىم ەمەس" دەگەندى وپ-وڭاي ايتا الاتىن. ءومىردىڭ، ءتۇستىڭ جانە قويىلىمنىڭ ۇقساستىعى سوڭىنان ايتۋلى ادامعا اينالعان ونىڭ شابىتىنا تۇرتكى بولدى.
ول وسىناۋ ءتۇس-عۇمىردىڭ سوڭىندا جيىرما جىل سالپاقتادى. الايدا الدەبىر تاڭسارىسىندە وڭكەي سەمسەردەن ولەتىن كورولدار، سونداي-اق اياق استىنان كەزدەسىپ اجىراساتىن، كەرەمەت سوزدەر ايتىپ كوز جۇماتىن باقىتسىز عاشىقتار بولۋدىڭ ازابىنان جۇرەگى اينىعانىن سەزدى. سول كۇنى-اق تەاترىن ساتىپ جىبەرگەن. ءبىر اپتادان سوڭ بالا كۇنىنىڭ وزەندەرى اعىپ، اعاشى جايقالعان تۋعان قالاسىنان ءبىر-اق شىقتى. وسىدان باستاپ ول بۇل كەرەمەتتەردى ونەر پەرىشتەسىنىڭ ايالاۋىنداعى ميفتىك ەمەۋرىندەر اشەكەيلەرىنە دە، لاتىندىق ادام اتتارىنا دا ايىرباستاي المايتىن. الايدا بۇل جەردە دە الدەكىم بولۋ كەرەك ەدى. ءسويتىپ، ونەردەن قول ۇزگەن، بولماشى داۋلەتى بار، پەسيەلەرمەن، اينالىمنان تۇسكەن پايىزدىق ۇلەستەرمەن عانا اۋرە كاسىپكەر بولىپ شىعا كەلدى. وسىناۋ جاعدايىندا ول بىزگە ادەبي قۇندىلىق پەن پافوستىڭ بارشا ىزدەرى قاساقانا الىنىپ تاستالعان بەلگىلى دە جاداعاي وسيەتىن قالدىردى. لوندوندىق دوستارى ونىڭ وقشاۋلانعان تۇراعىنا كەلىپ تۇردى. ول دوستارىنىڭ الدىندا باياعى اقىن ءرولىن ويناپ بەرەتىن-دى.
تاريحتىڭ تاعى دا ءبىر ايتارى بار. اجالىنىڭ الدىندا، ياكي ولگەننەن سوڭ ول قۇدايدىڭ الدىندا بولىپ: "قاتەلىكتەن بىرنەشە ادامنىڭ كەيپىندە بولىپپىن. ەندى ءوزىم - ءوزىم بولسام دەيمىن" دەپتى. داۋىلدار اراسىنان جاراتۋشى بىلايشا پارمەن ءتۇسىرىپتى: "مەنىڭ ءوزىم دە ء-وزىم ەمەسپىن؛ شەكسپيرىم مەنىڭ، سەن جازعان شىعارمالارداي ەتىپ، مەن دە بۇل دۇنيەنى ويدان شىعارعام. مەنىڭ تۇستەرىمنىڭ ءبىر ەلەسى - وزىمنەن اۋماي قالعان ءوزىڭسىڭ! ونىڭ مازمۇنى "ءبارى بولعانسىڭ - ءبىراق ەشكىم دە ەمەسسىڭ" دەگەنگە سايادى".
You Might Also Like
