قارت سەنورا
(نوۆەللا)
1941 جىلدىڭ ون ءتورتىنشى قاڭتارىندا ماريا حۋستينا رۋبيد دە حاۋرەگي جۇزگە تولدى. ول تاۋەلسىزدىك جولىندا كۇرەسكەندەردىڭ بىردەن-بىر كوزى ءتىرى ۇرپاعى ەدى.
ونىڭ اكەسى پولكوۆنيك ماريانو رۋبيو ارتىق-كەمى جوق "كىشى ازات ەتۋشى" دەپ اتاۋعا لايىقتى ادام-تۇعىن. بۋەنوس-ايرەس پروۆينسياسىنداعى مالشىنىڭ وتباسىندا مەرسەد وكرۋگىندە تۋعان ول اندى اسكەرىندە الفەرەس شەنىنە دەيىن كوتەرىلدى. چانابۋكودا شايقاسىپ، كانچا-رايادا تۇبىندەگى قايعىلى ۇرىستارعا، مايپا ماڭىنداعى، ەكى جىلدان سوڭ ارەنيپاداعى قانتوگىسكە قاتىستى. سول قىرعىننىڭ قارساڭىندا حوسە دە ولاۆۆاريامەن سەمسەرىن ايىرباستاپتى دەگەن قاۋەسەت تە بار. 1823 جىلدىڭ ءساۋىر ايىنىڭ باسىندا سەررو-التو تۇبىندەگى اتىشۋلى سوعىس بولعان. شايقاس جازىق دالادا وتكەندىكتەن، ونى - سەررو-بەرمەحو تۇبىندەگى سوعىس دەپ تە اتايدى. ءبىزدىڭ ەرلىكتەرىمىزگە قىزعانىشپەن قارايتىن داعدىسى بار ۆەنەسۋەلالىقتار ول جەڭىستى گەنەرال سيمون بوليۆارعا تەلۋگە بەيىم تۇردى. الايدا ارگەنتينالىق تاريحشىلاردان شىققان تياناقتى جىلناماشى ءوزىن اداستىرۋ ارەكەتتەرىنە جول بەرمەك ەمەس! ءارى جەڭىس مارتەبەسىنىڭ پولكوۆنيك ماريانو رۋبيوعا تيەسىلى ەكەنىن دە جاقسى بىلەدى. كولۋمبيالىق گۋسارلار پولكىن باستاپ، ۇزاققا سوزىلعان قىلىشتاسقان، نايزالاسقان شايقاستىڭ تاعدىرىن شەشكەن دە وسى ادام. سول ارقىلى ول ءوزى تىكەلەي قاتىسقان، ماڭىزى جاعىنان بۇل قىرعىننان ەش كەم تۇسپەيتىن تاعى دا ءبىر شايقاستىڭ - اياكۋچو تۇبىندەگى جەڭىستى سوعىستىڭ دا نەگىزىن قالاعان-دى. سول سوعىستا وڭباي جارالاندى دا. 1827 جىلى يتۋساينگودا دا كوزگە ءتۇسۋدىڭ ءساتى كەلگەن. وندا اسكەردى الۆەار باسقاردى. روساسپەن الىس تۋىسقاندىعى بولا تۇرا ول لاۆالەنىڭ ادامى تۇعىن. ءسويتىپ، ءوزى "قىلىشپەن كەسكىلەۋ" دەپ اتايتىن تەكە-تىرەستە فەدەرالداردىڭ توز-توزىن شىعاردى. ۋنيتارييلەر جەڭىلىس تاپقان سوڭ شىعىس پروۆينسياعا كەتىپ ۇيلەنەدى. اقىرى، ۇلى سوعىس كەزىندە مونتيەۆيدەودا، وريبە "بلانكوسىنا" ىرگە تەپكەن شاعىن قالادا كوز جۇمدى. جاسى ارتىق-كەمى جوق قىرىق تورتتە بولاتىن. ول زاماندا قىرىق ءتورت دەگەنىڭ كارىلەردىڭ جاسى. ونى فلورەنسيا ۆارەلانىڭ دوسى دەسەتىن. اسكەري كوللەدج مۇعالىمدەرىنىڭ وعان قولدى ءبىر سىلتەگەنى دە اقيقات شىندىق: جاۋعا بىردە-بىر قالانى بەرمەگەنى قانداي راس بولسا، بىردە ءبىر ەمتيحان تاپسىرا الماعانى دا سونشالىقتى اقيقات تۇعىن. ارتىندا ەكى قىزى قالدى. ءبىز اڭگىمە ەتكەلى وتىرعان ماريا حۋستينا - سولاردىڭ ەڭ كىشىسى.
1853 جىلدىڭ سوڭىندا قوس قىزىن ەرتكەن پولكوۆنيكتىڭ جەسىرى بۋەنوس-ايرەسكە قونىستانادى. ولارعا تيران روساس تاركىلەگەن جەرلەرى قايتارىلمايدى. الايدا كوزدەرى كورمەگەن، ايىرىلعان جەر تۋرالى ەستەلىك بۇل وتباسىندا كوپكە دەيىن ايتىلىپ ءجۇردى. ون جەتى جاسىندا ماريا حۋستينا مەملەكەتتىك قىزمەتتىڭ ادامى بولسا دا پاۆون مەن سەپەدتىڭ قاراماعىندا سوعىسىپ، اقىرى سارى بەزگەكتىڭ كەزىندە ءوز قىزمەت ورنىندا كوز جۇمعان دوكتور بەرناردو حاۋرەگيگە تۇرمىسقا شىعادى. ونىڭ دا ارتىندا ءبىر ۇل، ەكى قىز قالعان. تۇڭعىشتارى - سالىق ينسپەكتورى بولىپ ىستەگەن ماريانا باتىر اتاسىنىڭ باقىتتى ءومىربايانىن جازباق نيەتپەن ۇلتتىق كىتاپحانا مەن ارحيۆكە ءجيى باس سۇعادى. اقىرى، سول ەڭبەگىن ءبارىبىر اياقتاي المايدى. ايتپەسە مۇلدەم باستاماۋى دا مۇمكىن. ۇلكەن اپكەسى ماريا ەلۆيرا قارجى مينيسترلىگىنىڭ شەنەۋنىگى بولەسى سااۆەدرا دەگەنگە تۇرمىسقا شىعادى. ال حۋليا سەنور موليناري دەگەن يتالياندىق اتا-تەگى بولا تۇرا لاتىن تىلىنەن ءدارىس بەرگەن بىلىكتى ازاماتپەن باس بىرىكتىرەدى. شوبەرەلەرى مەن نەمەرەلەرى تۋرالى توقتالماساق تا بولادى. ويتكەنى باتىر بابالارىنىڭ ەپيكالىق رۋحى مەن ونىڭ ەميگراسيادا تۋعان قىزى باستاعان داڭقتى دا كەدەيلەنە باستاعان اۋلەت تۋرالى وقىرماننىڭ دەرەگى ءقازىردىڭ وزىندە جەتكىلىكتى.
ولار پالەرمودا گۆادالۋپا شىركەۋىنە تاقاۋ ماڭدا تىنىش تا قاراپايىم تۇرمىس كەشىپ جاتتى. ترامۆاي تەرەزەسىنەن كۇنى كەشەگى كورگەندەرى - باتپاق، اينالا قورشاعان رانچولار ماريانانىڭ ەسىندە ەدى. ولار دا شىرىش قيىندىلارىنان ەمەس، ساز بالشىقتان سالىنعاندى. كۇنى كەشەگى كەدەيلىك تە بۇگىنگى يندۋستريا پروگرەسى سىيلاعان كەدەيشىلىكتىڭ قاسىندا تۇككە تاتىمايتىن. سونداي-اق، بايلىقتارىنىڭ ءوزى دە تۇككە تاتىمايتىن.
رۋبيو اۋلەتىنىڭ مەكەن-جايى ءوز كۆارتالدارىنداعى گالانتەرەيا دۇكەندەرىنىڭ جوعارى قاباتىندا تۇعىن. بۇيىردەگى باسپالداقتاردىڭ ەنى تار. ون قاپتالداعى تەمىر قورشاۋ كيىم ىلگىش پەن بىرنەشە ورىندىق تۇرعان ءۇيدىڭ كۇڭگىرتتەۋ دالىزىنە دەيىن جەتىپ جاتتى. دالىزدەن كەيىن - جۇمساق كرەسلولار تۇرعان قوناق بولمە، ودان دا ءارى - سورەلەرى اينەكتەلىپ قىزىل اعاشتان جاسالعان مەبەلدەرى بار اس ءۇي. كۇننەن قورعانۋ ماقساتىمەن ۇدايى كوتەرىلمەيتىن پەردەلەردىڭ ساڭىلاۋىنان ءالسىز ساۋلە سەبەزگىلەپ تۇراتىن. بولماشى كوك ءيىسىنىڭ شىعىپ تۇراتىنى دا ەستە. تۇپكىرگە قاراي جاتىن بولمەلەر، ۆاننا، كىر جۋۋعا ارنالعان لەگەنى بار شاعىن پاتيو، كۇتۋشىنىڭ تۇراعى ورنالاسقان-دى. بۇل ۇيدە اندرادەنىڭ تومدارىنان، قولجازبا ارقىلى تولىقتىرىلعان باتىر تۋرالى مونوگرافيا مەن ارزان باعامەن اقشاسىن كەيىنىرەك تولەيتىندىكتەن عانا ساتىپ الىنعان مونتانەر مەن سيموننىڭ يسپان-امەريكان سوزدىگىنەن باسقا كىتاپ تا بولمايتىن. ونىڭ ەسەسىنە ۇدايى كەشىگىپ كەلەتىن زەينەتاقى مەن ءوز زامانىنداعى ۇلان-عايىر لوماس-دە-سامورە پومەستەسىنىڭ جۇرناعى - بولماشى جەردى جالعا بەرۋدەن تۇسەتىن تۇراقتى كىرىستەرى بار ەدى.
جوعارىدا ءوزىمىز ايتقان قاريا جاسىندا جەسىر قالعان سەنورا حۋليامەن جانە ونىڭ ۇلىمەن بىرگە تۇرىپ جاتتى. ءارى ول بۇرىنعىسىنشا ارتيتاستى، رواستى، ۋركيستى ءيتتىڭ ەتىنەن جەك كەرەتىن. ءوزى اۋىزەكى سوزدەن عانا بىلەتىن نەمىستەرگە دەگەن وشپەندىلىگىن قوزدىرعان ءبىرىنشى ەۋروپالىق سوعىس تا كەمپىردى ءدال توقسانىنشى جىلدارداعى توڭكەرىس پەن سەررو-التوداعى شايقاستاي تولعاندىرا الماي قويدى. ول 1932 جىلدان باستاپ كۇرت قارتايا باستاعان. بىردەن-بىر دۇرىس ايتا الاتىن ءسوزى دە جالپىعا ءمالىم تەڭەۋلەر عانا ەدى. البەتتە، كاتوليك ءدىنىن ۇستاناتىن. وعان قاراپ بىردەن-بىر جاراتۋشىعا، نەمەسە جاننىڭ ماڭگىلىك ولمەيتىنىنە سەنە قويادى دەۋگە دە بولمايتىن. ءوزى بايىبىن ۇعا قويمايتىن دۇعالاردى كۇبىرلەپ ايتىپ، ساۋساقتارى تاسپيق تارتادى، ايتەۋىر. پاسحا مەن ۆولحۆ مەرەكەسىنەن گورى روجدەستۆونى ءىش تارتادى. ماتەنىڭ ورنىنا شاي ىشكەندى ۇناتادى. ول ءۇشىن "پروتەستانت"، "ەۆرەي"، "ماسون"، "ەرەتيك"، "قۇدايسىز" سوزدەرى دە تۇك ماڭىزى جوق، جاي عانا سوزدەر تۇعىن. كەمپىر اتا-اناسىنىڭ تىلىمەن يسپانداردى بارلىق جاعدايدا "گودو" دەپ اتايتىن. 1910 جىلعى جاماندى-جاقسىلى حانشا اتاعى بار ينفانتانىڭ دا ەشقانداي دا ارگەنتينالىق سەنورا ەمەس، قايداعى ءبىر قاراپايىم گاليسسيالىق قىز بوپ شىققانىنا دا سەنە الماعان. وسى ءبىر ەستەن تاندىرارلىق جاڭالىقتى وعان كۇيەۋ بالاسىن جەرلەۋ راسىمىنە كەلگەن، بۇعان دەيىن بۇلاردىڭ ۇيىندە بولىپ كورمەگەن، الايدا وزدەرى ەسىمىن اقسۇيەكتەر حرونيكاسىنان تۇراقتى تۇردە ىزدەپ جۇرەتىن تۋىسقان باي ايەل ايتىپ بەرگەن-دى. سونداي-اق سەنورا حاۋرەگن ءۇشىن كوشەلەردىڭ اتاۋلارى دا ءباز باياعى قالپىندا؛ كەمپىر ەجەلگى ارتاس، تەمپلە، بۋەنوردەن، پيەداد، قوس كالەس لارتاس كوشەلەرىن، پاركە جانە پورتونەس الاڭدارىن بۇرىنعى اتاۋلارىمەن اتايدى. اۋلەت مۇشەلەرى الدەقالاي اۋىزعا كەلىپ قالعان كونەرگەن سوزدەردى اسپەت تە تۇتاتىن. ماسەلەن، "ۋرۋگۆايلىقتاردى" "شىعىستىقتار" دەپ اتايتىن. ۇيدەن شىقپايتىن كەمپىر بۋەنوس-ايرەستىڭ ءوسىپ، وركەندەگەنىن دە بىلمەيتىن سياقتى ەدى. العاشقى اسەرلەر قاشاندا جارقىن عوي؛ ونىڭ تۇسىنىگىندەگى ەسىك سىرتىنداعى قالا دا وزدەرى ورتالىققا كوشىپ كەلگەن كەزدەگىدەن اناعۇرلىم كونە تۇعىن. ونسە الاڭىندا ءالى كۇنگە دەيىن وگىز اربالار مەن كۇيمەلەر ءيىن تىرەسىپ، بارراكاس جايىلىمدارى گۇل اتىپ تۇرعانداي ەدى، شىركىن! ول ايتقان سوڭعى تىركەستەردىڭ ءبىرى "مەن تۇسىمدە ولگەندەردى كورەتىن بولىپ ءجۇرمىن" بولدى. ول اقىلسىز ادام ەمەس ەدى. الايدا، مەنىڭ بىلۋىمشە، ينتەللەكتۋالدى قۋانىشتارعا دا بەرىلمەيتىن. وعان تيەسىلى نارسە ەستەلىكتەر مەن وكىنىشتەر عانا تۇعىن. ءوزى قاشاندا دارقان بولاتىن. بايسالدى كوزدەرى مەن كۇلكىسى دە ەسىمدە قالىپتى. شاۋ تارتقان ءوز زامانىنىڭ كەرىم ايەلىنىڭ بۇگىن كۇلگە اينالعانىمەن كەزىندە قانشالىقتى سەزىمدى باستان وتكەرگەنىن دە ەشكىم بىلمەك ەمەس. ءوزى سياقتى تىنىش تا مۇڭدىلاۋ تىرشىلىك كەشەتىن وسىمدىكتەردى جاقسى كورەتىن ول بولمەسىندەگى وسكىندەرگە كۇتىم جاساپ، كوزى كورمەسە دە جاپىراقتارىن ايالاي سيپايتىن. 1929 جىلعا دەيىن ول قالعىپ-مۇلگىپ وتىراتىن-دى. ءتۇرلى تاريحي وقيعالاردى ايتۋدى ۇناتاتىن. ءارى سونىڭ ءبارىن دۇعا وقىعانداي تۇراقتى دا اينىماس ءبىر عانا سوزدەرمەن، ءبىر عانا تارتىپپەن ءتىزىپ شىعاتىن. ءبىراق، مەنىڭ ويىمشا، ولارى دا شىندىققا جاناسا قويمايتىن. ال ءوزى ەستىگەن سوزدەرىنىڭ بارىنە قۇلىقپەن يلانا بەرەتىن. جالپى العاندا، باقىتتى ەدى.
ۇيقىنىڭ تىلسىم دۇنيە ەكەنىن ءبارىمىز دە بىلەمىز. وعان ءومىرىمىزدىڭ ۇشتەن ءبىرىن ارنايمىز. ءبىراق ونىڭ ءمانىن ۇعىنىپ كورگەمىز جوق. بىرەۋلەر ءۇشىن ول - سانانىڭ كومەسكىلەنۋى عانا. ەندى بىرەۋلەر ءۇشىن - كەشە، بۇگىن، ەرتەڭ دەگەن ءۇش مەزەتتى بىردەن قامتيتىن كۇردەلى احۋال ال ءۇشىنشى بىرەۋلەر ءۇشىن - تولاسسىز كورەتىن تۇستەر تاسقىنى عانا. سەنورا حاۋرەگيدىڭ ون جىل بويى قوزعالىسسىز عۇمىر كەشكەن كەزى دە بولىپتى دەسەدى. ونداي جاعدايدا ادامنىڭ قاتەلەسپەۋى، شاتاسپاۋى مۇمكىن دە ەمەس. ونداي ون جىل ۋاقىتتىڭ ءار ءساتى وتكەنى دە، بولاشاعى دا جوق بۇگىنگى شاقپەن عانا باعامدالسا كەرەك-تى.
سوسىن، بىزگە ءوزىمىز تاۋلىكتەرمەن، اياۋسىز جىرتىلعان كۇنتىزبەلەردىڭ جۇزدەگەن پاراقتارىمەن، ماقساتتارىمىزبەن، ىستەرىمىزبەن ولشەيتىن اعىمداعى ۋاقىتقا دا تىم تاڭدانا بەرۋگە بولمايدى. ءبىزدىڭ بۇگىنىمىز - ءار تاڭ سايىن وياناتىن، ءار ءتۇن سايىن كوز ىلەر شاعىمىز عانا. ءبىز كارى سەنورانىڭ وسىناۋ كۇيىن ەكى مارتە باستان كەشەدى ەكەنبىز.
ءوزىمىز كوز جەتكىزگەندەي، حاۋرەگي اۋلەتىنىڭ مۇشەلەرى بىرنەشە مارتە الدامشى احۋالعا ءتۇسىپتى. الدىمەن، ولار وزدەرىنىڭ اقسۇيەك ەكەنىنە سەنەتىن، الايدا ادامدار ولاردى مۇلدەم تانىمايتىن؛ ولار باتىردىڭ ۇرپاعى بولاتىن، ءبىراق ادەتتە تاريح وقۋلىقتارى ول تۋراسىندا جاق اشپايتىن. راس، باتىر بابالارىنىڭ اتىندا كوشە بار. الايدا كوپ ادام بىلمەيتىن سول كوشە باتىس مولانىڭ سىرتىنداعى الدەبىر ەلەۋسىز قيىردا جاتىر.
ايگىلى كۇن دە جاقىنداپ كەلە جاتتى. ونىنشى قاڭتار كۇنى پاراد فورماسىن كيگەن اسكەري ادام كەلىپ، ءمينيستردىڭ ءوزى قول قويعان حات تابىستادى. حاتتا ءمينيستردىڭ ون ءتورتى كۇنى ارنايى كەلەتىنى جازىلىپتى. حاۋرەگي ءمينيستردىڭ قولى مەن بلانكىسىنە ەكپىن تۇسىرە وتىرىپ، حاتتى كورشىلەرىنە تەگىس كورسەتىپ شىقتى. ىزىنشە باسپاسوزگە ماقالا دايىنداماق نيەتپەن تىلشىلەر دە توڭىرەكتەي باستاعان. ءتيىستى دەرەكتەر ولارعا دا بەرىلگەن-دى. تىلشىلەردىڭ پولكوۆنيك رۋبيو تۋرالى بىلەتىنى ءسات سايىن اڭعارىلىپ تا تۇردى. شاقىرىلعاندار تىزىمىنە قوسۋىن ءوتىنىپ، بەيتانىس ادامدار دا حابارلاسا باستاعان.
ۇلى كۇنگە جۇرت جاپپاي دايىندالىپ جاتقان. ەل ەدەنىن بالاۋىزبەن ىسقىلاپ، تەرەزەلەرىن جۋدى، شىراعدانداردىڭ قابى سىپىرىلدى، قىزىل اعاش مەبەلدەر سىرلاندى، بۋفەتتەگى كۇمىس جالتىراتىلدى، مەبەلدەر ورناتىلىپ، تىلىندەگى بارقىت جولاقتارى كورىنىپ تۇرۋ ءۇشىن قوناق بولمەلەردەگى فورتوپيانولاردىڭ قاقپاقتارى اشىلدى. جۇرت ەرسىلى-قارسىلى سابىلىپ جاتتى. بۇل ابىگەردەن امان بىردەن-بىر ادام - ەشتەڭە ەستىمەيتىن سەنورا حاۋرەگي عانا سياقتى ەدى. ءوزى ماز-مەيرام. حۋليا كۇتۋشىنىڭ كومەگىمەن ونى مۇردەنى كيىندىرگەندەي ەتىپ كيىندىرىپ قويعان. كىرىپ كەلگەن قوناقتار الدىمەن باتىر پولكوۆنيكتىڭ سۋرەتىن كورگەن. وڭ قاپتالىندا، ءسال تومەنىرەك سان شايقاستا سەرىگى بولعان سەمسەرى تۇرعان-دى. ۇرپاعى ونى تۇرمىستان تارىلعان كەزدە دە ساتپاعان. ونى تاريحي مۇراجايعا تابىستاۋدى ارماندايتىن. وسى ءبىر سالتانانتتى وقيعاعا وراي مەيىربان كورشىلەرىنىڭ ءبىرى ءبىر قۇمىرا گۇل دە اكەلىپ قويعان-دى.
مەرەكە ساعات جەتىدە باستالۋعا ءتيىستى ەدى. قوناقتاردىڭ جينالۋى جەتى جارىمعا بەلگىلەندى. ويتكەنى مارقۇمعا باعىشتاپ، شىراق جاعۋ - ەكىنىڭ بىرىنە ۇناي قويمايتىن ءراسىم. جەتىدەن ون مينۋت وتكەندە ەشكىم كەلە قويعان جوق. قوجايىندار مۇنداي جاۋاپسىزدىقتىڭ جاقسىلىعى مەن جاماندىعىن رەنىش-وكپەسىز ءسوز قىلىسىپ جاتتى.
بەلگىلەنگەن ۋاقىتتا كەلگەن ەلۆيرا ادامداردى تەككە كۇتكىزۋدىڭ ولاردى سىيلاماۋ ەكەنىن بۇكپەسىز-اق ايتىپ سالعان. حۋليا ءوز جۇبايىنىڭ ءسوزىن قايتالاپ "ءسال-پال كەشىگۋ -كىشىپەيىلدىلىكتىڭ بەلگىسى. جۇرتتىڭ ءبارى كەشىكسە - سولاي بولعانى ىڭعايلى. ەشكىم ەشكىمدى اسىقتىرىپ جاتقان جوق" دەگەن. جەتىدەن شيرەك ساعات وتكەندە ءۇي ادامعا لىق تولعان. سەنور فيگەروانىڭ ءاۆتوموبيلى مەن جۇرگىزۋشىسىن كورگەندە بۇكىل كۆارتال تۇرعىندارىنىڭ قىزعانىشى وياندى. ول ءوز تۋىسقاندارىن ەشقانداي راسىمگە شاقىرمايتىن. ءبىراق سولاردىڭ ءارقايسىسى-اق ونى كورگەندە قۇشاقتارىن جايا ۇمتىلاتىن-دى. ولاردىڭ ءوز تۋىسقاندارىمەن سوڭعى رەت ەپيسكوپتىڭ جانازاسىندا كورىسكەنىنە ەشكىمنىڭ دە كۇمانى جوق-تى. پرەزيدەنت ءوزىنىڭ جەكە اتيۋدانتىن جىبەرىپتى. وتە كىشىپەيىل مىرزا ەكەن. سەررو-التو شايقاسى باتىرى قىزىنىڭ قولىن الۋدىڭ ءوزى ءۇشىن ۇلكەن قۇرمەت ەكەنىن ايتقان ول دا. پولكوۆنيك رۋبيودان گورى سان-مارتين تۋرالى كوبىرەك تاپتىشتەسە دە مينيستر جالىندى ءسوز سويلەپ، كوپ ۇزاماي اتتانىپ كەتتى. جاستىققا شالقالاپ، كرەسلوعا جايعاسقان قارت ايەل ارا-تۇرا باسىن شۇلعىپ قويىپ، ءارى جەلپىگىشىن ءتۇسىرىپ الىپ وتىردى. جوعارى كوعامنىڭ بيكەشتەرى، "وتان پەرىشتەلەرى" مۇلدەم ەستىمەسە دە وعان ارناپ ءانۇران ورىندادى. اپپاراتتارىن جارقىلداتقان فوتوگرافتار جينالعانداردى توپتاپ سۋرەتكە ءتۇسىرىپ جاتتى. پورتۆەين مەن حەرەس جەتپەي قالىپ، بىرنەشە قۇتى شامپان اشۋعا تۋرا كەلگەن. سەنورا حاۋرەگيدەن ءبىر اۋىز ءسوز شىققان جوق. ءوزىنىڭ كىم ەكەنىن، نە ءۇشىن وتىرعانىن دا بىلمەيتىن سياقتى ەدى. سول كەشتەن باستاپ توسەك تارتىپ جاتىپ قالعان.
قوناقتار تارقاسىمەن اۋلەت كەشكى سالقىن استىڭ يشاراسىن جاساعان. كوپ ۇزاماي-اق كوفە مەن تەمەكى ءيىسىن ءيىس سۋدىڭ جەڭىل جۇپارى الماستىردى.
باتىردىڭ قىزىنىڭ ەرتەگىگە تاتىرلىق ۇزاق عۇمىرىن ارقاۋ ەتىپ، ونى "ارگەنتينا تاريحىنىڭ ءتىرى جىلناماسى" اتاعان تاڭەرتەڭگىلىك گازەتتەر وتىرىكتى شىنداي ەتىپ، نانىمدى تۇردە جازىپتى. ول كەزدە كارى سەنورانىڭ ءوزى قارا كولەڭكە بولمەدە كوزىن تارس جۇمىپ جاتقان-دى. ونى ناۋقاس، الدە قىزۋ قيناعان. دارىگەر قاراپ شىعىپ، "ءبارى دە ويداعىداي" دەدى. بىرنەشە كۇننەن سوڭ ول كوز جۇمدى. ونىڭ اجالىن جاقىنداتقان تولاسسىز ادام ءنوپىرى، ايعاي-شۋ، جارقىلداعان وتتار، كوتەرىڭكى سوزدەر، مۋنديرلەر، تىم جيىلەپ كەتكەن قول قىسىسى مەن اتىلعان شامپاندار داۋىسى تۇعىن. جوباسى، كەمپىر ۇيگە ماسوركا كىرىپ كەتتى دەپ ويلاعان سياقتى.
مەن سەررو-التو تۇبىندە قازا تاپقاندار تۋرالى ويلايمىن، ات تۇياعىنا تاپتالىپ ولگەن امەريكا مەن يسپانيا ادامدارىنىڭ وكىنىشىن ويعا الام؛ مەنىڭشە، پەرۋ جەرىندەگى قىلىشتاسقان قىرعىننىڭ و باستاعى ناقتى قۇرباندىعى - اقيقات، ال ءجۇز جىلدان سوڭ -وسىناۋ ءبىر كارى ايەل بولعان سياقتى...