لايىقسىز
(نوۆەللا)
قالا تۋرالى تۇسىنىكتە ۇدايى ۋاقىتتىق تۇرعىدا قاتەلەسەتىنىمىز بار: ءدامحانالار شاراپحانا سيپاتىنا ەنىپ، ەسىگىنەن ىشكى اۋلالار مەن ورىندىقتار كورىنىپ تۇراتىن پودەزد تۇپكىر تۇسىندا ءليفتىسى بار لاس دالىزگە اينالىپتى. سونىمەن، بىرنەشە جىل بويىنا ءوزىمدى تالكاۋانو كوشەسىندەگى بەلگىلىكتى جەردە "بۋەنوس-ايرەس" كىتاپ دۇكەنىنىڭ كۇتىپ تۇرعانىنا كۇمانىم جوق-تى. الايدا ءبىر كۇنى ونىڭ انتيكۆارلىق دۇكەنگە اينالعانىنا، بۇرىنعى قوجايىنى دون سانتياگو فيشبەيننىڭ قايتىس بولعانىنا دا كوزىم جەتتى. ول اسا جۋان ادام ەدى... تۇر-تۇسىنەن گورى ارادا وتكەن اڭگىمەمىز ەسىمدە كوبىرەك ساقتالىپتى. بايسالدى دا تياناقتى ونىڭ ەۆرەيلەردى ءبىر ءداستۇر مەن ءبىر عانا ەلگە تەلىنگەن، ءدال ءقازىر ءوزىن بايىتىپ وتىرعان قاراما-قايشىلىق پەن احۋالدان ايىرىلىپ، قاتارداعى كوپتىڭ بىرىنە اينالدىرىپ جىبەرەتىن ءسيونيزمدى سوگەتىن دە داعدىسى بولدى. ماعان بارۋحا سپينوزا ەڭبەكتەرىنىڭ، وقۋدى قيىنداتىپ، قاتاڭدىقتىڭ ادام سەنبەس تەورياسىنا نەگىزدەلگەن ەۆكليدتىك تىركەستەردەن ازات تولىق باسىلىمىنىڭ دايىندالىپ جاتقانىن ايتقان دا وسى ادام. ماعان روزەنروتتىڭ "اشىق كاباللاسىنىڭ" عاجايىپ ءبىر داناسىن كورسەتكەنى دە بار. ءبىراق ساتقىسى كەلمەدى. الايدا مەنىڭ كىتاپحانامداعى گينزبۋرگتىڭ، ۋەيتتىڭ كەيبىر كىتاپتارىندا وسى ادامنىڭ دۇكەنىنىڭ ءمورى تۇر.
ەكەۋمىز وڭاشا قالعان ءبىر كەشتە ول ءوز ءومىرىنىڭ ەندى عانا جاريالىلىق الەمىنە شىعارۋعا بولاتىن ءبىر وقيعالارىن ايتىپ بەرگەن. وزدەرىڭىز سەزىپ وتىرعانداي مەن بار-جوعى كەيبىر جايتتارىن عانا وزگەرتەمىن.
سونىمەن، سىزدەرگە ءتىرى ادام بىلمەيتىن ءبىر تاريحتى بايانداپ بەرمەكشىمىن. ونى ايەلىم انا دا، باسقا جاقىن دوستارىم دا بىلمەيدى. كەيدە ەرتەرەكتە وتكەن وسى وقيعاعا ءوزىمنىڭ تۇك تە قاتىسىم جوقتاي بولىپ تا كورىنەدى. بۇل وقيعانىڭ ءوزىڭىز جازاتىن ءبىر اڭگىمەنىڭ كادەسىنە دە جاراپ قالۋى مۇمكىن عوي. ءارى ول اڭگىمەڭىزدىڭ شىم-شىتىرىق قانجارلاسۋ سيپاتىندا جازىلۋى دا كادىك. ەسىمدە جوق، ەنترە-ريوس پروۆينسياسىنان ەكەنىمدى سىزگە ايتتىم با ەكەن، وسى؟
ەۆرەي-گاۋچو بولدىق، دەپ تە وتىرىك ايتپاي-اق قويايىن. گاۋچو-ەۆرەي دەگەن بولعان دا ەمەس. ءبىز — ساۋداگەر ءارى فەرمەر ەدىك. ۋردي-نارريندە تۋىپپىن. ءبىراق ول كەز ەسىمدە ساقتالماپتى. اتا-انام دۇكەن اشپاقشى بولىپ، بۋەنوس-ايرەسكە كوشىپ كەلگەندە كىشكەنتاي بالا ەكەم. مالدونادو كۆارتالىنا جاقىن ماڭعا ورىن تەۋىپپىز. ونان ءارى جازيرا دالا ەدى.
كارلەيلدىڭ كەزىندە "ادامدار سۇيىكتى كەيىپكەرسىز ءومىر سۇرە المايدى" دەپ جازعانى بار. گروسسونىڭ تاريح ساباقتارى ماعان سان-مارتين بەينەسىن سىيعا تارتتى. الايدا مەن ونى چيليدە سوعىسقان، ءدال ءقازىر ءوز اتى بەرىلگەن الاڭدا تۇرعان قولا ەسكەرتكىش ەسەبىندە عانا قابىلدادىم. ءسىز ەكەۋىمىزدىڭ سورىمىزعا وراي، تاعدىردىڭ ماعان باسقا ءبىر باتىر — فرانسيسكو فەرراريدى جولىقتىرعانى عوي. بۇل ەسىمدى بۇرىن ەستىمەگەنىڭىز دە كادىك.
ءبىزدىڭ كۆارتالدىڭ كورراللەس پەن باحو سياقتى كۇماندىلەۋ داقپىرتى شىقپاسا دا مۇنداعى ءار الماسەننىڭ ءوز تەنتەكتەرى جەتىل ارتىلاتىن. تريۋمۆيرات پەن تەمزانىڭ قيىلىسىنداعى شاراپحانا فەرراريدىڭ سۇيىكتى ورنى ەدى. اقىرىندا مەنى ونىڭ ءىزباسارلارىنىڭ بىرىنە اينالدىرعان وقيعا دا ءدال وسى جەردە ءوتتى. ءبىر قۇتى شاي ىشپەكشى بولىپ بارعام. بۇيرا شاشتى، مۇرتتى بەيتانىس ادام كەلىپ، ارشا اراعىنا تاپسىرىس بەرگەن. فەرراري ودان اقىرىن عانا:
— ايتشى، وسى سەنىمەن الدىڭعى كۇنى حۋليانانىڭ ۇيىندە وتكەن بيدە كەزدەسكەن جوقپىز با؟ قايدان كەلدىڭ ءوزى؟ — دەپ سۇراعان.
— سان-كريستوبالدان، — دەگەن ول
— ساعان بەرەر كەڭەسىم — مۇندا ەكىنشى قايتارا باسىڭدى سۇقپا! — دەگەن فەرراري. — مۇندا تارتىپسىزدەۋ ادامدار بار. ءبىر جەرىڭدى مايىپ قىپ جۇرەر...
سان-كريستوبەلدىك جىگىت الگى جەردەن قاراسىن جىلدام باتىرعان. فەرراريدەن جۇرەكسىز بولماۋى دا مۇمكىن ەدى. ءبىراق بۇل جەردىڭ ءوز توبى بارىن ۇققان.
سول كەشتەن باستاپ، ون بەسكە تولماعان مەن ءۇشىن فەرراري پىرگە اينالدى. ول قارا شاشتى، ۇزىن بويلى، كەلىستى دەنەلى، سول زاماننىڭ تۇسىنىگىندە سۇلۋ جىگىت بولاتىن. ۇدايى قارا ءتۇستى كيىم كيەتىن. تاعى دا ءبىر مارتە كەزدەسىپ قالدىق. انام، اپكەم ۇشەۋىمىز كوشەدە كەلە جاتقانبىز. القاقوتان تۇرعان جاسوسپىرىمدەردىڭ قاسىنان وتە بەرگەنىمىزدە الگىلەردىڭ ءبىرى قاتتى داۋىستاپ:
— مىنا كەمپىرلەرگە جول بەرىڭدەر! — دەگەنى.
مەن شاراسىز ەدىم. اڭگىمەگە ءدال سول كەزدە ۇيدەن شىعا كەلگەن فەرراري ارالاستى. الگى سابازعا:
— ەگەر بىرەۋمەن جانجالداسقىڭ كەلسە — بەرى جاقىنداي عوي، — دەگەن ول.
باتىرلار تىلدەرىن تىستەپ، جىلىستاي بەردى. ەشقايسىسى قارسى ءسوز ايتا المادى. ولار فەرراريدى جاقسى بىلەتىن.
ول يىعىن ءبىر قومداپ قويىپ، بىزگە ىزەت جاسادى دا ۇزاي بەردى. كەتپەستەن بۇرىن ماعان:
— ەگەر قولىڭ بوس بولسا، كەشكىسىن شاراپحاناعا كەل، — دەگەن.
مەلشيىپ ءۇنسىز تۇرمىن. سارا اپكەم:
— ايەلدەردى قۇرمەتتەي الاتىن ساباز ەكەن! — دەيدى.
مەنى قولايسىزدىقتان قورعاعىسى كەلگەن شەشەم:
— اقيقاتىندا، ونى باسقالارعا ۇقساعىسى كەلمەيتىن جىگىت دەۋ كەرەك، — دەدى.
وسى ءبىر وقيعانى قالاي ءتۇسىندىرىپ بەرەرىمدى بىلمەي دالمىن. بۇگىندە، اجەپتاۋىر داۋلەتىم، دۇكەنىم، وزىمە ۇنايتىن كىتاپتارىم بار. مۇنداي دوستىققا ءىشىمنىڭ جىليتىنى دا وتىرىك ەمەس. ايەلىم مەن بالالارىمنىڭ بارلىعى ءوز الدىنا، سوسياليستىك پارتياعا دا وتكەم، مەن ءتارتىپتى ارگەنتينالىقپىن، ءتارتىپتى ەۆرەيمىن. ءبىر ادام عۇرلى قۇرمەتىم دە بار. كورىپ وتىرسىز، ءقازىر شاشىم دا ءتۇسىپ، قاسقا باسقا اينالعام. ءبىراق ءدال سول شامادا شەتكەرى ايماقتىڭ قالتاسى جۇقا، سارى بەز وكپەسى ەدىم. ادامدار ماعان تۋ-تۋ بيىكتەن قارايتىن. بارلىق بوزبالالار سياقتى مەن دە باسقالارعا ەلىكتەيتىنمىن. ياكوب اتانىپ كەتپەس ءۇشىن ءوزىمدى-وزىم سانتياگو اتاي باستاعام. الايدا فيشبەين اتانىپ تىنعام. ءبىز ءوزىمىزدى وزگەلەردىڭ كوزقاراسىمەن باعالاۋعا بەيىم تۇرامىز. باسقالاردىڭ وزىمە دەگەن جەككورىنىشىن سەزىنىپ، ءوزىمدى-وزىم دە جەك كورە باستاعام. ول زاماندا، اسىرەسە، سول ءبىر ورتادا جاۋجۇرەك بولۋدىڭ ماڭىزى زور ەدى. ال مەن ءوزىمدى سۋ جۇرەك سانادىم. ايەل كورسەم ابدىراپ قالاتىنمىن. وڭاشادا ءوزىمنىڭ وسىناۋ ءبىر امالسىز تازالىعىم ءۇشىن ۇيالاتىنمىن دا. تۇرعىلاس دوستارىم دا جوق بولاتىن.
سول كۇنى كەشكىسىن الماسەنگە بارمادىم. مۇلدەم بارماعانىم ودان دا دۇرىس بولار ەدى. بىرتىندەپ الگى شاقىرۋ بۇيرىق سياقتى كورىنىپ بارا جاتتى. اقىرى، سەنبى كۇنى تۇستەن كەيىن زالعا كىرىپ كەلدىم.
فەرراري ۇستەلدەردىڭ ءبىرىنىڭ تورىندە وتىردى. بۇرىن كورىپ-بىلىپ جۇرگەن تاعى دا جەتى ادام وتىر. سولاردىڭ ىشىندەگى ءاتى-جونى ەسىمدە ساقتالىپ قالعان بىردەن-بىر ادام — شارشاڭقى داۋسى بار، از سويلەيتىن قارت دون ەليسەو امرونى ەسەپكە الماساق، ارالارىنداعى ەڭ ەرەسەگى فەرراري عانا. الگىنىڭ بەت-جۇزىندە ولپى-سولپى قالتالانعان، قوماقتى جاراقات ءىزى كولدەنەڭىنەن سوزىلىپ جاتىر. ونىڭ تۇرمەدە وتىرىپ شىققانىن سوڭىنان ەستىدىم.
فەرراري مەنى ءوزىنىڭ سول قاپتالىنا وتىرعىزدى. دون ەليسەونىڭ ىعىسۋىنا تۋرا كەلگەن. جاعدايىم مۇشكىلدەۋ تۇعىن. فەرراري الگى ءبىر قولايسىز وقيعانى ەسكە الا ما دەپ قاۋىپتەنگەم. بەكەر ەكەن. ولار ايەلدەر، قارتا ويىنى، سايلاۋ، ونەر كورسەتۋگە ءتيىستى بولسا دا كەلە الماي قالعان ءانشى، كۆارتالداعى وقيعالار تۋرالى داۋرىعىسىپ جاتتى. مەنى بىردەن قابىلداي قويۋلارى دا قيىن بولدى. الايدا، كوپ ۇزاماي-اق ۇيرەنىسە باستادىق. ويتكەنى فەرراريدىڭ قالاۋى سول بولعان. كوبىنىڭ ءاتى-جونى يتاليانشا بولسا دا ولاردىڭ ءارقايسىسى ءوزىن (فەرراريدى دە) كرەول، ءتىپتى گاۋچو سانايدى. كەيبىرەۋى — جامشىك، نەمەسە مال سوياتىن جەردە ىستەيتىن. ۇدايى جانۋارلارمەن جۇمىس ىستەيتىن ولار شارۋا ادامىنا دا ۇقسايتىن. ءارقايسىسى وزىنشە حۋان مورەيرا بولۋدان دامەلى مە، دەگەن دە كۇدىگىم بار. اقىر-سوڭى الگىلەر مەنى جيرەن اتاپ تىنعان. ءارى سولارىندا ءبىر جەككورىنىش جاتتى. تەمەكى شەگۋدى، سوعان ۇقساس تاعى دا ءبىراز نارسەنى دە سولاردان ۇيرەندىم.
حۋنين كوشەسىندەگى ءبىر ۇيدە ماعان الدەبىرەۋدىڭ فرانسيسكو فەرراريدىڭ دوسى ەمەسپىسىڭ وسى، دەگەن سياقتى ساۋال تاستاعىنى بار. "جوق" دەگەن جالعىز اۋىز ءسوزىم ءۇشىن كول-كوسىر ماداقتىڭ استىندا قالعام...
بىردە پوليسەيلەر كەلىپ ءبىزدى ءتىنتىپ شىقتى. كەيبىرەۋلەردىڭ كوميسسارياتقا بارۋىنا دا تۋرا كەلدى. ءبىراق ولار فەرراريدى مازالاعان جوق. بۇل وقيعا ءبىر اپتادان سوڭ تاعى قايتالاندى. سول جولى پوليسەيلەر فەرراريدى الا كەتكەن. ويتكەنى بەلدىگىندە پىشاعى بار ەدى. جەرگىلىكتى باسشىلاردىڭ ىقىلاس-سەنىمىنەن ايىرىلىپ قالۋى دا مۇمكىن عوي.
وڭباي الدانعان جاس فەرراريدىڭ مۇشكىل جاعدايىن ءقازىر ءتۇسىنىپ ءجۇرمىن. ال سول كەزدە ول مەن ءۇشىن ءتىرى قۇداي ەدى.
دوستىقتىڭ تىلسىمى ماحابباتتان نەمەسە ءومىر اتالاتىن دۇنيەنىڭ باسقا دا كەرەمەتتەرىنەن استە كەم ەمەس. ءبىر ءسات باسىما "اقيقات نارسە باقىت قانا" دەگەن وي كەلگەنى دە بار. ويتكەنى ول ءتۇپتىڭ تۇبىندە ءوزىن-وزى اقتاپ تۇرماق. گاپ مىنادا — كۇشتى دە قۇدىرەتتى فرانسيسكو فەرراري تۇككە تاتىمايتىن ماعان دوس-جار پيعىلدا تۇعىن. ءوزىمدى وسىناۋ دوستىققا لايىقسىز ساناپ، مۇنىسىن قاتەلىگى دەپ ەسەپتەگەنىم دە راس. دوستىقتان باس تارتپاقشى دا بولعام. ءبىراق فەرراري وعان ىرىق بەرمەدى. الگى ارەكەتتەرىمدى شەشەمنىڭ ءوزى ادامگەرشىلىك سانايتىنداردىڭ قاتارىنا جاتقىزا الماۋى دا مەنىڭ وسى ءبىر ءابىرجىۋىمدى اسقىندىرىپ جىبەردى. ءارى ول مەنىڭ كۇلكىمدى دە كەلتىرگەن. وسىناۋ وقيعاداعى ەڭ باستى نارسە — سوڭىنان مۇلدەم وكىندىرمەگەن، ءوزىم جاساعان بۇزىقتىق ەمەس، فەرراريدىڭ مەنىمەن قارىم-قاتىناس تۇعىن. ال ءدال سول كەزدە وكىنىش تە، كۇنا دا بار ەدى.
تاعى دا ءبىر كورگەنىمدە شال فەرراريمەن الدەنە تۋرالى سويلەسىپ وتىردى. ويلارىنا العان بىردەڭەلەرى بارى انىق. ءوز ورنىمدا وتىرىپ، ءبىزدىڭ كۆارتالدان تاياق تاستام جەردە تىگىن فابريكاسى بار ۆايدەماننىڭ اتىن قۇلاعىم شالعان سياقتى. كوپ ۇزاماي ماعان فابريكانى اينالا ءجۇرىپ، كىرەتىن ەسىكتەرىن انىقتاۋ جۇكتەلدى. ەش تۇسىنىك بەرىلگەن جوق. بۇلاق پەن تەمىرجولدى كەسىپ وتكەن كەزىمدە كەش تە ءتۇستى. جەكە ۇيلەر، ۇيەڭكى شوعىرى مەن قاڭىراعان الاڭقايلار كوز الدىمدا ءالى سايراپ تۇر. فابريكا سۋ جاڭا تۇعىن. الايدا شەتكەرى تۇر، ءارى ەسكى عيماراتقا ۇقسايدى. قابىرعانىڭ قىزىل سىرى مەنىڭ ەسىمە كەشكى شاپاقتى ءتۇسىردى. فابريكانى اينالدىرا قورشاپ تاستاپتى. نەگىزگى قاقپادان باسقا وڭتۇستىك جاعىندا عيماراتتىڭ ىشىنە ەنەتىن تاعى دا ەكى ەسىگى بار.
مويىنداۋىم كەرەك، ءسىز ءقازىردىڭ وزىندە سەزىپ وتىرعان جايدى مەن كەش ۇقتىم. مەنىڭ فابريكاعا قاتىستى مالىمەتتەرىمدى، اپكەسى سوندا جۇمىس ىستەيتىن جىگىتتەردىڭ ءبارى دە راستايدى. ءبىزدىڭ توپتىڭ سەنبى كۇنى كەشكىسىن الماسانعا كەلمەۋى نازاردان تىس قالۋعا ءتيىستى ەمەس. سوعان ساي فەرراري شابۋىل كەلەسى جۇمادا بولادى دەپ شەشتى. مەنىڭ مىندەتىم — باقىلاۋ عانا. ازىرگە بىرگە جۇرگەنىمىزدى بايقاتۋعا بولمايدى. كوشەدەگى وڭاشالىقتى پايدالانىپ، فەرراريدەن:
— سەن ماعان سەنەسىڭ بە؟ — دەپ سۇرادىم.
— ءيا، — دەگەن ول. — سەن ءوزىڭدى ەركەكشە ۇستايتىنىڭدى بىلەم.
سول كۇننەن باستاپ، جانە كەيىن دە تىنىش ۇيىقتايتىن بولدىم.
سارسەنبى كۇنى شەشەمە ورتالىققا بارىپ، جاڭا كوۆبوي ءفيلمىن كورەتىنىمدى ايتتىم. ۇستىمە بار ءتاۋىرىمدى كيىپ، مورەكو كوشەسىنە تارتتىم. ترامۆاي ۇزاق جۇرگەن. قىزمەتشىلەرىنىڭ ءبىرى — الدەبىر ەالدتىڭ، ياكي ءالتتىڭ قابىلداۋىن كۇتىپ، پوليسيا باسقارماسىندا ۇزاق وتىرۋىما تۋرا كەلدى. مەن وعان قۇپيا اقپارات اكەلگەنىمدى ايتام، باياعى. ول بولسا، "قورىقپاي سويلەي بەر" دەيدى. وعان فەرراريدىڭ بۇكىل ماقساتىن جايىپ سالدىم. مەنى تاڭعالدىرعانى — الگىنىڭ فەرراريدى مۇلدەم تانىمايتىنى بولدى. ەليسەوعا كەلگەندە ماسەلە مۇلدەم باسقاشا.
— ءا! — دەگەن ول — وريەنتال كۆارتالىنداعى بۇزاقىلار توبىن ايتاسىڭ عوي!
ءبىزدىڭ اۋدانعا جاۋاپتى ەكىنشى ءبىر وفيسەردى شاقىرىپ الىپ، اقىلداسۋعا كىرىسكەن. الگىلەردىڭ ءبىرى مەنەن ەشقانداي مىسقىلسىز:
— وسىنىڭ ءبارىن ءوزىڭدى دۇرىس ازامات ساناعاندىقتان ايتىپ تۇرسىڭ با؟ — دەپ سۇراعانى.
جاعدايىمدى تۇسىنەر دەگەن تۇيسىكپەن:
— ءيا، سەنور. مەن ءتارتىپتى ارگەنتينالىقپىن، — دەدىم.
ماعان و باستا وزىمە جۇكتەلگەن مىندەتتى اتقارۋ تاپسىرىلدى.
ءبىراق پوليسەيلەردى كورگەندە ىسقىرماۋىم كەرەك! قوشتاسىپ تۇرىپ، وفيسەرلەردىڭ ءبىرى:
— ابايلا. ساتقىندارعا نە بولاتىنىن بىلەسىڭ، — دەپ ساقتاندىردى.
وفيسەرلەر مەنى مەكتەپ وقۋشىسىنان بەتەر كورەدى ەكەن.
— ولتىرسە — ءولتىرسىن. سولارى دۇرىس تا بولار ەدى، — دەپ جاۋاپ بەردىم مەن دە.
جۇما كۇنى تاڭ اتا شەشۋشى كۇننىڭ كەلگەنىن، ارىمدى اقتاپ الاتىنىمدى سەزىنىپ، قۋانىپ وياندىم. ءبىراق ەشقانداي دا ار-ۇياتىمنىڭ اقتالعانىن سەزىنە المادىم. ۋاقىت تا وتپەي قويدى. ءنار سىزعام جوق. تۇنگى ساعات وندا قىرسىقتى فابريكا ورنالاسقان كۆارتالعا اتتاندىق. ارامىزدا ءبىر ادام جوق تۇعىن. دون ەليسەو قاشاندا الدەبىرەۋدىڭ جەرگە قاراتاتىنىن ايتقان. سوڭىنان ءبارى ءۇشىن كەلمەي قالعان الگى ادامدى جازعىراتىنى تۋرالى ويلادىم. جاڭبىر الگىندە عانا باسىلعان. قاسىمدا تاعى دا بىرەۋ بولا ما، دەپ قاۋىپتەنگەم. ءبىراق مەنى وڭتۇستىك قاپتالداعى ەسىكتە جالعىز قالدىردى. وفيسەر باستاعان پوليسەيلەر دە كوپ كۇتتىرگەن جوق. ولار كوزگە تۇسپەس ءۇشىن اتسىز جاياۋ كەلگەن. ەسىك سىندىرىلعان. پوليسەيلەر ىشكە شۋسىز، دابىرسىز ەنە الاتىن. ءتورت مارتە اتىلعان وقتان قۇلاعىم تۇنعان. الگىلەر قاراڭعىدا ءبىر-بىرىن اتىپ العان بولار دەگەم. كوپ ۇزاماي-اق پوليسەيلەر مەن قولى كىسەندەۋلى جىگىتتەردى كوردىم. ىزىنشە فرانسيسكو فەرراري مەن دون ەليسەو امارونىڭ وق تەسكەن دەنەلەرىن دە الىپ شىقتى. الدىن الا تەكسەرۋدە ولاردىڭ تۇتقىنداۋ كەزىندە قارسىلىق كورسەتىپ، ءبىرىنشى بولىپ وق اتقانى ايتىلدى. ونىڭ جالعان ەكەنىن مەن بىلەتىنمىن. ويتكەنى ولاردا ريەۆولۆەر بولعان ەمەس-تى. پوليسيا احۋالدى ەسكى كەكتەرىن قايتارۋعا پايدالانىپ كەتتى. فەرراريدىڭ قاشۋعا تىرىسقانىن سوڭىنان ەستىدىم. الايدا قىرشىنىنان قيۋعا جالعىز وق جەتكىلىكتى بولىپتى. گازەتتەر، البەتتە، ونى تىرشىلىگىندە شىقپاعان بيىككە كوتەرىپ، ناعىز باتىر ەتىپ كورسەتتى.
ال مەنى باسقالارمەن بىرگە تۇتقىنداپ، ءبىراز ۋاقىتتان سوڭ بوساتىپ تا جىبەرگەن...
You Might Also Like
