بورحەس جانە مەن
(نوۆەللا)
ونىڭ — بورحەستىڭ تاعدىرىنا وقيعا جازىلعان. بۋەنوس-ايرەس كوشەسىندە قاڭعىرىپ ءجۇرمىن. پودەزدەردىڭ اسپاسى مەن ەسىك تورلارىنا ءبىر قاراۋ ءۇشىن دە ەركىمنەن تىس توقتاي سالام. بورحەس تۋرالى پوشتالاردان دەرەك الىپ، ونىڭ ءاتى-جونىن وقىتۋشىلار تىزىمىنەن نەمەسە ءومىرباياندىق سوزدىكتەردەن كورەم. مەن قۇم ساعاتتاردى، جاعراپيالىق كارتالاردى، XVIII عاسىر باسىلىمدارىن، ەتيمولوگيالىق شتۋديالاردى، كوفەنىڭ ءدامىن جانە ستيۆەنسون پروزاسىن جاقسى كورەم. ستيۆەنسون مەنىڭ تالعامىمدى تاپ باسادى. ءتىپتى ەركىنسىگەنى سونشالىقتى - باسىمدىققا دا يە بولىپ بارا جاتقانداي. استە، بوياۋدى تىم قويۋلاتۋدىڭ قاجەتى جوق؛ ءبىز - بىر-بىرىمىزگە جاۋ ەمەسپىز. ازىرگە ءتىرىمىن، بورحەستىڭ ءوز ادەبيەتىن جاساۋى ءۇشىن ءتىرى بولامىن دا. ءارى سول ارقىلى ءوز تىرشىلىگىمدى دە دالەلدەيمىن. قۇلىقپەن مويىندايمىن، كەيبىر دۇنيەلەرىم، ساتىمەن جازىلدى. ءبىراق مەنى ولار دا قورعاپ قالا المايدى. ويتكەنى ساتىمەن جازىلعان سول تۋىندىلار ءۇشىن بورحەس باسقاعا دا، وزىنە دە قارىزدار ەمەس. ءتىل مەن داستۇرگە عانا قارىزدار. اقىر-سوڭىندا مەنىڭ دە جوعالۋىم كادىك. مەنەن دە بولماشى بىردەڭەلەر عانا قالۋى مۇمكىن. ونىڭ تەنتەكتىككە، اسىرا سويلەۋگە بەيىمدىلىگىن بىلسەم دە بويىمداعى بارىمدى بىرتىندەپ سوعان بەرۋگە تىرىسام. سپينوزا "بارىنەن بۇرىن اركىم ءوزى بولىپ قالۋعا تىرىسسىن" دەپ نىعارلايدى. تاس-تاس كۇيىندە، جولبارىس-جولبارىس قالپىندا قالسىن! مەنىڭ تالايىما ءوزىم ەمەس - بورحەس بولىپ قالۋ جازىلعان. (جالپى، مەن وسى بار ما ەكەم؟) مەن ءوزىمدى بورحەس كىتاپتارىنان گورى باسقا قۇبىلىستاردان، نەمەسە ءوزىن-وزى ۇمىتقان گيتارا اۋەندەرىنەن جيىرەك كەزدەستىرەم. بىردە ودان دا ازاتتىق الۋعا تىرىسىپ، وقشاۋلانۋ ميفولوگياسىن ۋاقىتپەن، كەڭىستىكپەن ويىنعا الماستىردىم. ال ءدال ءقازىر سول ويىن بورحەسكە تيەسىلى. ال مەنىڭ باسقا ءبىر جاڭا دۇنيە تاۋىپ الۋىم كەرەك. سوعان قاراعاندا مەنىڭ ءومىرىم قاشۋدان تۇرادى، مەن ءۇشىن ءبارى دە -شىعىن. ءسويتىپ، ءبارى ۇمىتىلادى، ءبارى دە سوعان، باسقا بىرەۋگە تيەسىلى.
بۇل بەتتەردى دە ەكەۋىمىزدىڭ قايسىمىز جازىپ وتىرعانىمىزدى بىلمەيمىن مەن...
You Might Also Like
