InfoHub Logo

مەن ءوز وبلىسىمىزداعى ءبىر مەكەمە باستىعىنىڭ كابينەتىندە وتىر ەدىم. ءبىر ۋاقىتتا اق ءوڭدى، دوعا مۇرىن، شاشى قۇلجانىڭ مۇيىزىندەي ءيىرىم-يىرىم بولىپ قۇلاعىن جاۋىپ كەتكەن بىرەۋ كىردى دە، مەنىڭ قارسى جاعىمدا تۇرعان كرەسلوعا سىزىلا كەلىپ وتىردى.

— ءبىزدىڭ حاتشىمىز اتارمانوۆ، — دەپ تانىستىردى مەكەمە باستىعى.

— قارا-ەكە، — دەپ اتارمانوۆ كوزىن تومەن سالدى. – قارا - ەكە، الگى قاراعاندىعا ءجۇرۋ ماسەلەسىمەن... سونى انىقتاپ السام با دەپ... شەشىپ بەرسەڭىز جاقسى بولار ەدى... — حاتشى كۇمىلجىپ بارىپ توقتادى.

مەكەمە باستىعى شىقشىتىن قوزعادى. سودان كەيىن ءاجىم ۇيمەلەگەن شەگىر كوزىن حاتشىسىنا اۋدارماي قاداپ، ءبىراز ىڭىلداپ وتىردى دا، ءجاي عانا:

سارسەنبى كۇنى ءجۇرىپ كەتكەنىڭ دۇرىس بولار، — دەپ تىزگىننىڭ ۇشىن ۇسىنا سويلەپ، ماعان ايتىپ وتىرعان شارۋا جايىن جالعاي بەردى. بايقايمىن، وسىنداي قاراۋىنداعى ادامدارىنا ىرىق بەرگەنسىپ، ەركىنە سالعانسىپ وتىرىپ، ءوز دەگەنىن ىستەتكىزەتىن ادام عوي دەيمىن. سول بوساڭ ايتقان، بىلق ەتكىزە سالعان ءسوزىنىڭ وزىندە دە كەسىم جاتقانداي سەزىلدى ماعان.

مەن كەلگەن شارۋامدى ءبىتىرىپ، كەتۋگە اينالدىم. مەكەمە باستىعى شەگىر كوزىن تاعى دا حاتشىسىنا قادادى.

— ال، اتارمانوۆ، سونىمەن قاشان جۇرەتىن بولدىڭ؟

حاتشى شىلىمىن ءسوندىرىپ كۇل سالعىشقا تاستادى دا، شالقايا وتىردى. سودان كەيىن:

— الداعى سارسەنبىدە جۇرەمىن. جۇمىس بار مۇندا. تەز ورالۋىم كەرەك، — دەپ ءوز بەتىمەن ءىس شەشەتىن رەۋشتە، شارۋا قامىن ويلاعانسىپ كەسىپ سويلەدى.

باستىق ءسال عانا ەزۋ تارتتى. مەن بىلاي شىعا بەرە «بيۋروكراتتار وسى حاتشى سياقتىلاردان شىعادى-اۋ» دەپ ويلادىم.

---