InfoHub Logo

مىنەكەي، كارانتين جاعدايىنداعى وقۋ جىلىنىڭ IV توقسانى اياقتالدى. توتەنشە جاعدايعا بايلانىستى قازاقستان مەكتەپتەرى مەن جوعارى وقۋ ورىندارى دا جاپپاي قاشىقتان وقىتۋ فورماتىنا كوشكەن ەدى. وسى ورايدا، مەكتەپ وقۋشىلارى ءۇشىن Online Mektep جوباسى قاشىقتان وقۋدىڭ نەگىزگى الاڭىنا اينالدى.

جوبا اياسىندا 42 ءپان بويىنشا 3 مىڭنان اسا بەينەساباق، 20 مىڭعا جۋىق جاتتىعۋ مەن ءتۇرلى تاپسىرمالار ازىرلەنىپ، كارانتين كەزىندە مەكتەپتەن قول ءۇزىپ قالعان وقۋشىلاردىڭ بىلىمنەن قول ۇزبەي، قاشىقتان ساپالى ءبىلىم الۋىنا مۇمكىندىك جاسالدى. بۇگىن وسى جۇمىستاردى قورىتىندىلاعان ق ر ءبىلىم جانە عىلىم ءمينيسترى اسحات ايماعامبەتوۆ كارانتين جاعدايىندا 2 اي بويى دەمالىسسىز جۇمىس ىستەپ، بەينەساباقتار ازىرلەگەن ماماندارمەن كەزدەسىپ، ولارعا العىس ايتتى.

ق ر ءبىلىم جانە عىلىم مينيسترلىگى تۇسىرىلىمگە قاتىساتىن مۇعالىمدەردى ىرىكتەپ، ساباق ساپاسىن قاداعالاسا، Bilim Media Group كومانداسى ساباقتاردىڭ ءتۇسىرىلىم، اۋديو جانە مونتاج جۇمىستارى مەن جالپى تەحنيكالىق ساپاسىنا جاۋاپتى بولدى. جوباعا جالپى 160 ءمۇعالىم، 40 ادىسكەر جانە كومپانيانىڭ 100-دەن اسا قىزمەتكەرى قاتىسقان. بەينەساباقتاردى دايىنداۋعا اتسالىسقان مۇعالىمدەرگە قالاماقى، سونىمەن بىرگە توتەنشە جاعداي كەزىندەگى جۇمىسى ءۇشىن سىياقى بەرىلدى. وسى تۇستا مينيستر اسحات ايماعامبەتوۆ بۇل جوبا ءۇشىن مينيسترلىك Bilim Media Group كومپانياسىنا قانشا قارجى تولەگەنى تۋرالى ساۋال كوپشىلىك كوكەيىندە جۇرگەنىن، الايدا مەملەكەت بيۋدجەتىنەن ەشقانداي قارجى جۇمسالماعانىن اتاپ ءوتتى. جوبا Bilim Media Group باستاماسىمەن، كومپانيا قارجىسى ەسەبىنەن جۇزەگە اسىرىلدى. مينيسترلىك ۇيىمداستىرۋ جۇمىستارى مەن ادىستەمەلىك باعىت بويىنشا قولداۋ كورسەتتى.

بەينەساباقتار 6 ءساۋىر – 22 مامىر ارالىعىندا رەسپۋبليكالىق «بالاپان»، «ەلارنا» تەلەارنالارىنان كورسەتىلدى. ساباقتاردىڭ اۋديوترانسلياسياسى «قازاق راديوسى» مەن «كلاسسيكا» راديولارى ارقىلى تارالدى. سونىمەن قاتار بەينەساباقتاردى جوبانىڭ YouTube ارناسىنان دا كورۋگە مۇمكىندىك بەرىلدى. ال BilimLand.kz پلاتفورماسىندا ساباقتاردى قاراۋ، ينتەراكتيۆتى جاتتىعۋلار مەن تەستتەردى، ءۇي تاپسىرمالارىن ورىنداۋ، مۇعالىممەن كەرى بايلانىس جاساۋ، جالپى تولىق ەلەكتروندىق وقىتۋ قامتاماسىز ەتىلدى. 

Bilim Media Group كومپانياسىنىڭ ديرەكتورى راۋان كەنجەحان ۇلىنىڭ ايتۋىنشا، 6 ساۋىردەن بۇگىنگە دەيىن BilimLand.kz پلاتفورماسىن 3،2 ميلليون ادام قولدانسا، پورتالداعى بەينەساباقتاردىڭ قارالىمى 73،9 ميلليوننان اسقان. ال جوبانىڭ YouTube ارناسى 2 جارىم ايعا تولمايتىن ۋاقىتتا 289 مىڭ قولدانۋشى جيىپ، قارالىم سانى 15،3 ميلليونعا جەتكەن. «بۇل – توتەنشە جاعدايداعى مەملەكەت پەن بيزنەس سەرىكتەستىگىنىڭ ۇلگىسى، ىنتىماقتاستىقتىڭ ناتيجەسى. بىزگە سەنىم بىلدىرگەندەرىڭىز ءۇشىن العىس ايتامىز جانە ەلىمىزدەگى ءبىلىم ساپاسىن، قولجەتىمدىلىگىن ارتتىرۋ ءۇشىن جۇمىسىمىزدى ءارى قاراي جالعاستىرا بەرەمىز»، – دەدى راۋان كەنجەحان ۇلى.

---