InfoHub Logo

اق پەن قاراسى تارازىعا تارتىلعان، سىناپتاي سىرعىپ قولدا تۇرمايتىن ۋاقىت قارىمىن كىدىرتۋ پەندە ەنشىسىنە بۇيىرماعىن ءىس. ءار ساعات التىنعا پاراپار دەسەك ءبىر تاۋلىك ياكي قولىڭداعى جيىرما ءتورت التىن ىسپەتتى. بىرىنەن – ءبىرى الماسىپ زاڭدىلىققا باعىنعان ۋاقىت قانجارى ءبىر دەمدە وتىز كۇننىڭ باسىن الىپ، ون ەكى ايدى سەرگەلدەڭگە سالىپ سەلىن سۇلاتا تەگىندە سىرى سان قاتپار تاريح قويناۋىنا الالى – قۇلالى پاراقشاسىن الماستىرادى. ءبىر كەم دۇنيە دەسەڭىزشى...

**** **** ****
ءبىرى – قۋىپ - بىرىنەن قاشىپ، قانجىلىك كەيىپتەگى دۇنيەدە ەش تاۋسىلمايتىن ول - جاناردىڭ جاسى ەكەن. كەۋدەدەگى جالت ەتكەن ءۇمىت وتى، كوكتەگى جارق ەتكەن جاسىن سىندى. سامالالارداي سامساپ بارىپ جوق بولىپ كەتەتىن. قۇلاماي - تۇرۋدى، جىلاماي – كۇلۋدى، تۇرالاماي – ۇعۋدى بىلمەس ەدىك. ەگەر ەگەس – ەگىزى بولماسا. ءبىر كەم دۇنيە دەسەڭىزشى...

**** **** ****
تىرىسىندە تىرىلەر،
تۇتەپ ءبىرىن – ءبىرى جەر.
تىرلىكتەگى ءقادىرىڭ،
ولگەنىڭدە بىلىنەر
– دەپ جاتادى، ءسوزى ءمىر وعىنداي وتكىر ءدىلمار دانالارىمىز. نەمەسە تىرىسىندە وسەكتەن امانى جوق، ال ولگەندە جامانى جوقتىڭ كۇيتى سىندى. تەگىندە تۇساۋ سالماي، توقىراعان ساتتە ۇعىنىپ جاتاتىنىمىز جالعان ەمەس. تولعاۋى توقسان تىرلىكتىڭ تولعامى تاۋسىلماسى حاق. ءبىر كەم دۇنيە دەسەڭىزشى...

**** **** ****
كەگەن سۋىنداي كەرىگە اققان قۋ دۇنيە قويدىڭ قۇمالاعىنداي بىزدەن دە قالارى بەلگىلى. قامشىنىڭ سابىنداي قىسقا عۇمىردا: نەگە؟ – دەگەن سۇراققا جاۋاپ بەرە الامىز با؟!
باردە اش – بىردە توق،
بىردە بار – بىردە جوق
دۇربەلەڭگە تولى دۇنيە ءدۇبىرى كىمنىڭ بازىناسىنا قارايلاسىن. يت ۇرەدى، كەرۋەن كوشەتىنى انىق. ءبىر كەم دۇنيە دەسەڭىزشى...

**** **** ****
جۇباتامىن دەپ كەلىپ جىلاتىپ كەتەدى سەنگەنىڭ. جىلۋلىعىن سىيلاعانداي كورىنىپ ءتۇن ۇيقىڭدى كۇن ۇرلاعانىمەن ۇرى جىلدىڭ توقتاتۋ ەش مۇمكىن ەمەس. سىرىن بىلمەيتىن جاننىڭ سىرتىمەن دە جۇرمە دەپ تە جاتادى. سىزىلىپ ەنگەنىمەن كوڭىلدەن تۇشىنىپ كەتەدى ءبىر كۇنى. سىيلاستىقتىڭ سىرىن ۇققىم كەلەدى. ءبىراق، سىرتىم بەرە گۋ – گۋ وسەك ەرتىپ، سىقيىپ كەلىپ سىمپيتىپ كەتتەتىن جاندار قۇربانى بولۋ جان ازابىنا سىزات تۇسىرەدى. ءبىر كەم دۇنيە دەسەڭىزشى...

---