ءبىر وگىز
ءبىر شال مەن كەمپىردىڭ جالعىز سيىرى بولىپتى. سول سيىردىڭ ءسۇتى ولاردىڭ قورەگى ەكەن. سوندىقتان سيىردىڭ بۇزاۋى سۇتكە جارىماي، ءولىپ كالا بەرىپتى.
جىلدار وتەدى، شال-كەمپىر قارتايا تۇسەدى ال بۇزاۋلاردىڭ بۇرىنعىشا ءولۋى توقتالمايدى.
– قوي، بولماس، – دەيدى، ءبىر كۇنى شال كەمپىرىنە، – ءبىر جىلعا ءبىر نارسە ەتىپ شىدارمىز. سيىردى ساۋماي-اق كويشى، بۇزاۋى ءوسسىن.
– جارايدى، – دەپ، كەمپىر دە كەلىسە كەتەدى. ءۇش كۇننەن سوڭ سيىر ەركەك بۇزاۋ تۋادى. بۇعان قۋانعان ولار قانشا تارىعا تۇرسا دا سيىردى ساۋماي، بارلىق ءسۇتتى بۇزاۋعا بەرەدى. ەنەسىنىڭ ءسۇتىن ءبىر ءوزى ەمىپ وسكەن بۇزاۋ ۇلكەن وگىز بولادى. كەلە-كەلە ول ءوزىنىڭ سەمىزدىگىنە ماستانادى. وعان مىنانداي وي كەلەدى: «وسىنداي زور دەنەمەن سيىرلاردىڭ اراسىندا جايىلامىن. جوق، بۇل لايىقسىز، تۇيەلەرگە قوسىلايىن». ءسويتىپ، ول تۇيەلەرگە قوسىلادى. ءوزىن ەرەكشە زور سەزىنىپ جۇرگەن ول بارىنشا-اق تۇيە بولۋعا تىرىسىپ باعادى. سولاردىڭ جەگەن ءشوبىن جەيدى، ولارمەن شولگە كەتىپ، سورتاڭ جالايدى. اقىرىندا، شولدەن قاتىپ، ءىشى اۋىرىپ، شىداي الماي: «جىلقىلارعا بارايىن، تۇيەدەن كىشىرەك قوي، ازابى دا جەڭىلىرەك بولار»، – دەپ ۇيعارادى. ءسويتىپ، جىلقىعا قوسىلادى. ءبىراق بۇل دا جايلى تيمەيدى. سولاردىڭ ساناتىنان قالماي شاۋىپ جۇرەمىن دەپ تيتىعى قۇريدى. ءبىر كۇنى قاسقىر ءتيىپ، جىلقىلار دۇركىرەي قاشادى. بۇل ىلەسە الماي، ايدالادا قالادى. باقىتىنا قاراي، قىر استىندا سيىرلار جايىلىپ ءجۇر ەكەن. وگىزدىڭ وكىرگەن داۋسىن ەسىتىپ، جولداسىن مۇيىزدەرىمەن قورعاي ءجۇرىپ، قاسقىردان قۇتقارىپ الادى. وگىز قۋانعاننان جىلاپ جىبەرىپتى.
– ءوز توبىڭنان بولىنسەڭ، كورەر كۇنىڭ وسى ەكەن، – دەپتى، ول جاسىن ءسۇرتىپ تۇرىپ. وگىزدىڭ بۇل ءسوزى بۇزاۋلارعا ءتالىم بولىپتى.
You Might Also Like
-
ءبىر قاڭباقتى جەل ايداپ، ۇلكەن تاۋدىڭ ەتەگىنە اكەپ تاستاپ كەتتى. مۇنى بيىكتەن كورىپ تۇرعان تاۋ:
