InfoHub Logo

ءبىر كۇندەردە وگىز بەن ەسەك جولداس بولىپ، اۋىل ماڭىندا بىرگە جايىلىپ ءجۇرىپتى. بىردە ەكەۋى وڭاشاراق شىعىپ كەتەدى دە اعاشى قالىڭ ءبىر باۋعا كىرىپتى. باۋدىڭ ءىشى جايقالعان شالعىن ەكەن، ەكەۋى ولەڭ شوپكە سىلقيا تويىپ الىپتى.

         قارنى تويعان سوڭ، ەندى ەسەكتىڭ باقىرىپ، كوڭىل اشقىسى كەلەدى. سوعان ىڭعاي بىلدىرگەندە وگىز:

         – سەن اقىرما، – دەيدى اۋزىن باسىپ. – ءبىز بۇل باۋعا ۇرلانىپ كىرىپ تۇرمىز عوي، دىبىس شىعارما.

         بۇعان كونگىسى كەلمەگەن ەسەك:

         – قارىن تويعان سوڭ اقىرۋ كەرەك، توعىڭ باسىلادى. سودان ابزال نە بار؟ – دەپتى ەكىلەنىپ.

         وگىز:

         – قوي، قوي!.. – دەسە، تىڭداماپتى.

         ودان ارىگە توزۋگە ءداتى جەتپەي، ەلىرە اقىرىپ-اقىرىپ جىبەرىپتى. ەسەكتىڭ باۋ ءىشىن جاڭعىرتقان اششى داۋسىن ەستىگەن سوڭ، باعبان كەلەدى دە وگىز بەن ەسەكتى ۇستاپ الادى.

         – ەسىرگەن ەكەنسىڭدەر، كورەيىن كۇشتەرىڭدى، – دەپ، ەسەكتى تاس ديىرمەنگە جەگىپ، كوپ ماشاقاتقا سالىپتى. ال وگىزدى سويىپ، ەتىن قاقتاپ، سورپا-سۋعا قارىق بولىپتى.

ءسويتىپ، ەسەكتىڭ ەسەرلىگىنەن وگىز اجالعا ۇشىراپتى دا ەسەكتىڭ ءوزى اۋىر ازاپ شەگىپتى.

---