InfoHub Logo

ءبىر قاڭباقتى جەل ايداپ، ۇلكەن تاۋدىڭ ەتەگىنە اكەپ تاستاپ كەتتى. مۇنى بيىكتەن كورىپ تۇرعان تاۋ:

— ە، قاڭباعىم، قايدان ءجۇرسىڭ، نە قىپ كەلدىڭ مۇندا؟ — دەدى. قاڭباق تۇرىپ:

— التى باتپان اۋىردى كوتەرگەن الىپ ەدىم. جەتى قابات جەر استىنان شىعىپ، الىپ دەگەن اتاعىڭدى ەستىپ، الىسۋ ءۇشىن ادەيى سەنى ىزدەپ كەلدىم، — دەيدى.

تاۋ بۇعان جىميىپ كۇلدى. سول كەزدە قۇيىن سوعىپ، قاڭباقتى دەدەكتەتكەن بويى اسپانعا الىپ شىقتى. اسپاننان قايتا جەرگە اكەلىپ، ارى-بەرى اۋناتتى. ويعا-قىرعا دومالاتتى. اقىر اياعى ءولدىم-تالدىم دەگەندە، تاۋدىڭ بەتىنە وسكەن ءبىر شوق توبىلعىنىڭ باسىنا ءىلىپ تاستاپ، جايىنا ءجۇرىپ كەتتى. قانى قاشىپ، قاباعى تۇسكەن قاڭباقتىڭ قاسىنا ءبىر بۇركىت كەلدى. ول:

— ە، قاڭباعىم، نە قىپ جاتىرسىڭ؟ — دەدى.

قاڭباق:

— التى باتپان اۋىردى ارقالاعان ەدىم. جەتى قابات جەر استىنان شىعىپ، الىپ دەگەن اتاعىن ەستىپ، استىمدا جاتقان تاۋمەن ادەيىلەپ كەلىپ الىسىپ ەدىم، التى كۇن الىسىپ، جەتى كۇن دەگەندە، ارەڭ دەپ جىعىپ، جەلكەسىنەن باسىپ جاتىرمىن، — دەيدى.

— بولسا بولار! — دەدى بۇركىت وعان. — توبىلعىعا زورعا ءىلىنىپ قالعان ەكەنسىڭ!

— البەتتە، — دەدى قاڭباق، — ودان باسقا قولايلى جەر بولماعان سوڭ، توبىلعىسىنان ۇستاپ جاتقانىم عوي.

سول كەزدە قۇيىن سوعىپ، قاڭباقتى تاعى دا دەدەكتەتە جونەلدى. بۇركىت تۇرىپ:

— ە، باتىر، قايدا باراسىڭ، تاۋدى تاستاپ؟ تۇرىپ كەتپەي مە ول ەندى ورنىنان؟ — دەدى.

ۋاقا ەمەس، بۇركىتىم. الدىمدا الىساتىن ءالى دە كوپ الىپتار بار ەدى. سولارعا جەتۋگە اسىعىپ بارامىن! — دەۋگە عانا شاماسى كەلدى قاڭباقتىڭ. قۇيىنمەن بىرگە قۇلدىراپ، ۇشىپ كەتە باردى. اقىرىندا كۇلىپ، بۇركىت پەن تاۋ قالدى.

---